កុំខ្លាចនឹងទទួលកាដូពីអ្នកដទៃ ហើយក៏មិនភ្លេចឲ្យកាដូខ្លួនឯងដែរ
- 2020-10-20 04:14:00
- ចំនួនមតិ 0 | ចំនួនចែករំលែក 0
កុំខ្លាចនឹងទទួលកាដូពីអ្នកដទៃ ហើយក៏មិនភ្លេចឲ្យកាដូខ្លួនឯងដែរ
កុំខ្លាចនឹងទទួលកាដូ
ខ្ញុំចាំបានថា នៅពេលមួយខ្ញុំបានឲ្យផ្កាមួយបាច់ទៅមិត្តរបស់ខ្ញុំ ចំថ្ងៃទី២០ ខែតុលា ដែលជាថ្ងៃខួបកំណើតរបស់វា។ ពេលនោះមិត្តខ្ញុំនិយាយថា ៖ "អំណោយដោយប្រើលុយអ៊ីចឹង វាខ្ជះខ្ជាយពេកហើយ។ លើកក្រោយមិនបាច់ទិញវាឲ្យវាទៀតទេ"។ ខ្ញុំគិតថា ប្រហែលវាមិនចូលចិត្តផ្កា ទើបវានិយាយបែបនេះ។ ប៉ុន្តែ ខ្ញុំឃើញមិត្តរបស់ខ្ញុំទុកផ្កានេះនៅក្នុងផ្ទះឡើងយូរ សូម្បីតែវាស្វិតក្រៀមក៏វានៅទុកវាដែរ។
ថ្ងៃផ្សេងមួយទៀត ខ្ញុំបានឲ្យអាវយឺតមួយទៅវា ក៏វានៅតែបង្ហាញប្រាប់ខ្ញុំថា កុំចំណាយលុយខ្ជះខ្ជាយទិញអំណោយឲ្យវាទៀត។ តែខ្ញុំឃើញវានៅតែរក្សាអាវយឺតនោះបានយ៉ាងប្រុងប្រយ័ត្ន ហើយពេលដើរលេងចំថ្ងៃសំខាន់ៗ វាតែងពាក់វាជានិច្ច។ រំពេចនោះខ្ញុំយល់ភ្លាម ។
អ្នកដឹងទេ មនុស្សស្រីកើតមក តែងតែត្រូវបានគេស្រលាញ់។ ពេលខ្លះ មនុស្សដែលឲ្យតម្លៃអ្នក គេចង់បង្ហាញក្តីស្រលាញ់កាន់តែខ្លាំងតាមរយៈការជូនកាដូនៅក្នុងឱកាសពិសេសណាមួយ ព្រោះគេគិតថា អ្នកសក្តិសមនឹងទទួលបាន ហើយកាដូតូចក៏មិនមែនមិនអាចបង្ហាញពីការដឹងគុណ ឬក្តីស្រលាញ់បាននោះដែរ។ កុំបញ្ចេញអារម្មណ៍ថា អ្នកមិនចង់បានកាដូនោះ ឬអ្នកមិនត្រូវការក្តីស្រលាញ់ នៅចំពោះមុខគេឲ្យសោះ។
ការឲ្យអំណោយ គឺបង្ហាញពីការកោតសរសើរ ហើយអ្នកក៏មានសិទ្ធរីករាយជាមួយអ្វីដែលអ្នកសក្តិសមនឹងទទួលបានដូចគ្នា។ កុំខ្លាចក្នុងការទទួលយកអំណោយ ពិសេសពីមនុស្សដែលអ្នកស្រលាញ់។ អ្នកគួរតែមានអារម្មណ៍ថា ខ្លួនឯងមានតម្លៃក្នុងការទទួលអំណោយកិត្តិយសមួយ។
តែក៏មិនត្រូវភ្លេចឲ្យកាដូចំពោះខ្លួនឯងដែរ
មនុស្សស្រីដែលទទួលបានអំណោយក្នុងថ្ងៃពិសេស ពិតណាស់គឺជាថ្ងៃដ៏រីករាយមួយ។ តែកុំរង់ចាំតែទទួលអំណោយពីអ្នកដទៃ គួរឲ្យអំណោយសម្រាប់ខ្លួនឯងដែរ។ អ្នកដទៃនឹងឲ្យអំណោយអ្នក ព្រោះអ្នកសមនឹងទទួលបានក្តីស្រលាញ់ ហើយប្រសិនបើអ្នកឲ្យកាដូដល់ខ្លួនឯង គឺមានន័យថា អ្នកផ្តល់តម្លៃចំពោះខ្លួនឯង។
អ្នកដឹងអត់ មានមនុស្សស្រីមួយចំនួន តែងតែត្រូវបានបុរសគិតដល់ជានិច្ចនៅពេលថ្ងៃពិសេសម្តងៗ ហើយពួកគេក៏បានកាដូផងដែរ។ នោះ គឺមិនមែនមកពីនាងស្អាតឡើយ តែតម្លៃរបស់ស្រ្តីនៅក្នុងក្រសែភ្នែកបុរស គឺស្ថិតនៅក្នុងកម្រិតដែលស្រ្តីស្រលាញ់ខ្លួនឯងតិចឬច្រើន។
ដូច្នេះ មនុស្សស្រីឆ្លាតនឹងមិនភ្លេចផ្តល់កាដូដល់ខ្លួនឯង ក្នុងថ្ងៃពិសេសដាច់ខាត។ អ្នកកាន់តែឲ្យតម្លៃខ្លួនឯង បុរសកាន់តែចង់ឱបក្រសោបអ្នកដូចគ្នា។ ដូច្នេះ មនុស្សស្រីដែលចង់ឲ្យគេស្រលាញ់ លុះត្រាតែនាងចេះស្រលាញ់ខ្លួនឯងជាមុនសិន៕