អតីតសមាជិក F(X) ត្រូវគេចោទជារាជិនីបក្សីមាសអាក្រក់បំផុត ហើយកេងបន្លំសន្លឹកឆ្នោត Zhao Li Ying ទៀត

2020-10-19 02:27:00
ចំនួនមតិ 0 | ចំនួនចែករំលែក 0

នៅចុងបញ្ចប់ តំណែងរាជិនីបក្សីមាសឆ្នាំ ២០២០ ក៏ត្រូវរកបានម្ចាស់ហើយ នោះគឺតារាសម្ដែង និងចម្រៀងស្រីល្បីឈ្មោះចិន Song Qian Victoria តែរឿងអាស្រូវជុំវិញតំណែងនេះរបស់នាងបានក្ដៅគគុកជាទីបំផុត ទោះបីកម្មវិធីត្រូវចប់ហើយក៏ដោយ។

ដូចទស្សនិកជនបានដឹងស្រាប់ហើយ តំណែងរាជិនីបក្សីមាសត្រូវបានប្រព្រឹត្តឡើង ២ឆ្នាំម្ដង សម្រាប់បើកឆាកកម្មវិធីប្រគល់ពានរង្វាន់ភាពយន្ត Golden Eagle Awards ដែលជាកម្មវិធី១ក្នុងចំណោមកម្មវិធីប្រគល់ពានទូរទស្សន៍ធំបំផុតប្រទេសចិន។ ឆ្នាំនេះ តំណែងនេះក្រោយពេលអ្នកគាំទ្រប្រតាយប្រតប់គ្នាជាយូរ ក៏ធ្លាក់ចូលដៃរបស់តារាសម្ដែង និងចម្រៀងស្រី Song Qian Victoria អតីតសមាជិកក្រុមចម្រៀងកូរ៉េ F(X)។

យ៉ាងណាក្ដី ខុសពីការរំពឹងទុករបស់អ្នកគាំទ្រ ទាំងរ៉ូប និងទាំងសម្រស់តារាវ័យ ៣៣ឆ្នាំ ត្រូវគេរិះគន់ជាខ្លាំង។ ជាក់ស្ដែងកម្រងរូបភាពខាងក្រោយឆាករបស់ម្ចាស់បទ Nu ABO បានបង្ហាញឲ្យឃើញថានាងមិនស្អាត និងរាងយារមិនដូចជារាជិនីឆ្នាំមុនៗ។ ទស្សនិកជនតាមដានកម្មវិធីផ្ទាល់បានបញ្ចេញមតិថា តារាកើតឆ្នាំ ១៩៨៧ គឺជារាជិនីអាក្រក់បំផុត ក្នុងប្រវត្តិរាជិនីបក្សីមាសទាំងអស់។

មិនបញ្ឈប់ត្រឹមនេះ មុនពេលប្រកាសពាន តារាសម្ដែងស្រីឆ្នើមបំផុត ស្រីស្អាតរូបនេះ ក៏ត្រូវគេបកអាក្រាតព្រោះបន្លំសន្លឹកឆ្នោត។ ជាក់ស្ដែង មុនពេលកម្មវិធីបិទបោះឆ្នោត២ថ្ងៃ សន្លឹកឆ្នោតរបស់នាងជាប់លេខ ៣ ពោលគឺឈរក្រោយ តារាសម្ដែងស្រីល្បីឈ្មោះ Zhao Li Ying តែនៅពេលកៀកម៉ោងបិទបោះឆ្នោត នាងស្រាប់តែហក់ឡើងតំណែងទី ១ វ៉ាមុខតួរឿង និស្ស័យស្នេហ៍ដាវទេពទៅទៀត។

យ៉ាងណាក៏ដោយ មុនកម្មវិធីចាប់ផ្ដើមមួយថ្ងៃ សន្លឹកឆ្នោតបន្លំត្រូវកាត់ចោលអស់ជាង កន្លះលានសំឡេងធ្វើឲ្យតារាស្រីរូបនេះ បាត់អស់២ភាគ៣នៃសំឡេងឆ្នោតរបស់ខ្លួន ហើយមកឈរលេខ ៣វិញ។ មនុស្សជាច្រើនបានលាន់មាត់ថា តំណែងរាជិនីនេះមិនត្រឹមតែមិននាំមកនូវសំណាងឲ្យអតីតតារាផលិតកម្ម SM នោះទេ វាថែមទាំងធ្វើឲ្យនាងអាម៉ាសមុខទៀតផង៕