ចង់គេងលក់ស្រួល គួរមានរបស់២យ៉ាង និងចៀសវាង៣យ៉ាង
- 2020-09-11 09:44:00
- ចំនួនមតិ 0 | ចំនួនចែករំលែក 0
ចង់គេងលក់ស្រួល គួរមានរបស់២យ៉ាង និងចៀសវាង៣យ៉ាង
មនុស្សជាច្រើន ជាញឹកញាប់មិនបានយកចិត្តទុកដាក់ខ្លាំងលើវត្ថុមួយចំនួននៅក្បែរគ្រែរបស់គេឡើយ ដែលជាហេតុធ្វើឲ្យពួកគេពេលខ្លះគេងមិនលក់ ។ ដូច្នេះ អ្នកគួរដឹងពីវត្ថុ២យ៉ាងដែលគួរដាក់នៅក្បែរគ្រែ និងចៀសវាង៣យ៉ាង ដែលគួរតែដាក់ឲ្យឆ្ងាយតាមដែលអាចធ្វើបាន ប្រសិនបើអ្នកមិនចង់មានអារម្មណ៍មិនល្អ ឬផលអវិជ្ជមានមកលើសុខភាពរយៈពេលយូរ។
១៖ ទឹកមួយកែវដែលមានគំរបបិទជិត
ទោះជាអ្នកគេង ក៏រាងកាយនៅតែធ្វើការរំលាយឆ្លងកាត់តាមរយៈផ្លូវដង្ហើមផងដែរ។ ម្ល៉ោះហើយ បន្ទាប់ពីក្រោកពីគេង ជាញឹកញាប់អ្នកប្រាកដជាមានអារម្មណ៍ ថាស្រេកទឹកនិងស្បែកស្ងួតបន្តិច។ នៅត្រង់នេះ បើអ្នកគ្រាន់តែដាក់ទឹកមួយកែវក្បែរគ្រែគេង វានឹងជួយបំពេញបន្ថែមពេលអ្នកស្រេកទឹកភ្លាមៗ។ មិនថាពេលយប់ ឬព្រឹកព្រលឹម ទឹកមួយកែវពិតជាជួយអ្នកឲ្យក្រោកឡើងយ៉ាងស្វាហាប់ និងដើរចេញពីគ្រែយ៉ាងស្រស់ស្រាយទៀតផង។
យ៉ាងណាក៏ដោយ អ្នកត្រូវចងចាំថា កុំផឹកទឹកច្រើនពេកនៅពេលយប់ដើម្បីចៀសវាង ដល់ដំណេករបស់អ្នក។
២៖ ដបភាយឧស្ម័ន ( Humidifier)
កាន់តែយប់ជ្រៅ បរិយាកាសក្នុងបន្ទប់គេងកាន់តែហប់ ដែលងាយធ្វើឲ្យមាត់ស្ងួត ស្ងួតក និងឆួលច្រមុះ។ ដើម្បីបង្កើនសំណើមក្នុងរាងកាយ វិធីដ៏ល្អបំផុតគឺត្រូវទិញ Humidifier មួយដាក់ក្បែរគ្រែគេង។ តែត្រូវចាំថា កុំភ្លេចជ្រើសរើស humidifier ណាដែលមិនបង្កសំលេងរំខានពេក ដែលធ្វើឲ្យអ្នកគេងមិនលក់។
១៖ ទូរសព្ទដៃ ឬឧបករណ៍អេឡិចត្រូនិច
តើអ្នកដឹងអត់ថា វិទ្យសកម្មចេញពីទូរសព្ទ អាចបំផ្លាញប្រព័ន្ធប្រសាទរបស់អ្នកបាន ដូច្នេះវាងាយនឹងធ្វើឲ្យខួរក្បាលក្លាយជាស្ពឹកស្រពន់ គិតអ្វីមិនចេញណាស់។ ម្ល៉ោះហើយ នៅពេលអ្នកដាក់ទូរសព្ទក្បែរគ្រែនៅពេលយប់ នៅពេលព្រឹកអ្នកច្បាស់ជាក្រោកឡើងមកដោយស្មារតីធីងធូង អស់កម្លាំង និងមិនសូវមានទំនោរខ្ពស់ចាប់អារម្មណ៍ចង់ធ្វើអ្វីមួយឡើយ។ ហេតុនេះ ពេលគេង អ្នកគួរដាក់ទូរសព្ទឲ្យឆ្ងាយពីគ្រែតាមដែលអាចធ្វើបាន ដើម្បីឲ្យប្រសិទ្ធភាពនៃការគេងរបស់អ្នកល្អប្រសើរ។
២៖ នាឡិការរោទិ៍
វាពិតជាកត្តាមួយដែលជះឥទ្ធិពលផ្ទាល់មកលើខួរក្បាលនៅពេលព្រឹកជាទីបំផុត។ នៅពេលដែលអ្នកកំពុងគេងលក់ស្កប់ស្កល់ ហើយភ្លាមៗបែរជាភ្ញាក់ឡើងដោយសារសំលេងម៉ោងរោទិ៍ វាពិតជាស្រ្តេសលើសពីការរំពឹងទុកពេកហើយ។ ពិសេសជាងនេះទៀត មនុស្សដែលធ្លាប់មានបទពិសោធន៍ដូចជា សម្ពាធឈាមឡើងខ្ពស់ ជំងឺធ្លាក់ទឹកចិត្ត គួរតែរក្សាវត្ថុទាំងនេះឲ្យឆ្ងាយពីគ្រែគេងតាមដែលអាចធ្វើបាន។
ក្នុងករណី អ្នកត្រូវការវាចាំបាច់ គប្បីជ្រើសយកនាឡិការដែលមានសំលេងរោទិ៍ខ្សោយ ឬដាក់លំញ័រ ដើម្បីចៀសវាងធ្វើឲ្យភ្ញាក់ដោយតក់ក្រហល់ពេក។
៣៖ តុក្កតា ឬ គ្រឿងលេង
គ្រឿងលេង ឬតុក្កតា ជាទូទៅតែងឃើញមានជាញឹកញាប់នៅលើគ្រែគេងរបស់មនុស្សជាច្រើន តែតាមពិតទៅ វាមិនសូវល្អប៉ុន្មាននោះឡើយ។ អ្នកដែលមានបញ្ហាស្បែក ឬជំងឺផ្លូវដង្ហើម គួរតែទុករបស់ទាំងនេះឲ្យឆ្ងាយពីគ្រែទើបជាការល្អ។ ព្រោះតុក្កតាដែលធ្វើឡើងពីសំឡី កប្បាស អាចផ្ទុកនូវមេរោគ រួមទាំងសារធាតុគីមីដែលបង្កគ្រោះថ្នាក់បាន។ នៅពេលអ្នកឱបវាមកប៉ះនឹងរាងកាយ វាពិតជាងាយធ្វើឲ្យអ្នកហៀរទឹកភ្នែក ឬស្បែកមានកន្ទួលក្រហម៕