មិនមែនរឿងមានឬសង្ហា តែបើបានប្ដីហ៊ានធ្វើរឿងទាំង៥ អ្នកជាស្រីសំណាងបំផុតហើយ!

2020-09-03 02:17:00
ចំនួនមតិ 0 | ចំនួនចែករំលែក 0

អ្នកណាថារៀបការបានប្ដីអ្នកមាន ឬប្ដីរូបសង្ហាគឺជាសំណាងរបស់មនុស្សស្រី? វាអាចជារឿងត្រឹមត្រូវមួយផ្នែក តែអាចត្រូវត្រឹមតែក្ដីសុខផ្លូវកាយខាងក្រៅប៉ុណ្ណោះ! ប៉ុន្តែបើអ្នកអាចរកបានមនុស្សប្រុសដែលអាចធ្វើរឿងទាំង៥យ៉ាងនេះចំពោះភរិយា និងគ្រួសារទៀត ទើបអាចចាត់ទុកជានារីដែលមានសំណាងក្នុងលោក ទាំងផ្លូវកាយ និងផ្លូវចិត្ត។

មានរឿងអីក៏មិនមាត់ធំ ឬស្រែកដាក់អ្នក

មនុស្សប្រុសជាមនុស្សចិត្តអំណត់ មិនងាយបង្ហាញអារម្មណ៍ចេញងាយៗឡើយ។ ប៉ុន្តែពេលមានបញ្ហាមិនត្រូវគ្នាជាមួយប្រពន្ធ អាចមានមនុស្សប្រុសតិចនាក់ណាស់ដែលអាចស៊ូអត់ធ្មត់ មិនស្រែកតប ឬសម្លុតប្រពន្ធនោះ។ មនុស្សប្រុសខ្លះមិនស្រែកតបនឹងប្រពន្ធ តែបែរជាបោះបោករបស់ក្នុងផ្ទះ វាយកូនបញ្ជោះជាដើម។

ហ៊ានដាក់ចិត្តជួយរំលែកការងារក្នុងផ្ទះដោយមិនខ្មាសអៀន

នេះរឹតតែជាករណីកម្រ ព្រោះបុរសត្រូវចេញទៅធ្វើការខាងក្រៅ ហើយរអ៊ូថាអស់កម្លាំងមិនអាចជួយការងារក្នុងផ្ទះបានទេ។ អ្នកខ្លះទៀតក៏និយាយថា ការងារទាំងនេះមានតែមនុស្សស្រីទេទើបធ្វើបានល្អ និងជាតួនាទី។ ដូច្នេះគេជាមនុស្សប្រុសមិនសមធ្វើឡើយ។ ដូច្នេះបើអ្នកអាចរកបានបុរសដែលសុខចិត្តហត់នៅខាងក្រៅហើយ ចូលដល់ផ្ទះនៅជួយរំលែកការងារកំប៉ិកកំប៉ុកក្នុងផ្ទះដូចជា មើលកូន បោកខោអាវ ធ្វើម្ហូប លាងចាន ឬសូម្បីតែបោកផ្ទះនោះ អ្នកកំពុងមានគ្រាប់ពេជ្រមួយគ្រាប់នៅក្នុងដៃហើយ។

យកភ្នែកមើល តែមិនយកស្រីដទៃដាក់ក្នុងចិត្ត

មនុស្សប្រុសនិងស្រីស្អាត វាមិនខុសពីស្រមោចនិងស្ករទេ។ ប៉ុន្តែបើស្វាមីអ្នកអាចមើលស្រីស្អាត តែមិនរវល់ ដៀមដាម ឌឺដង លែបខាយ ឬដៃដល់ លេងសើចជាមួយស្រីក្រៅទេ អ្នកប្រហែលជាដុំពេជ្រក្នុងភ្នែកគាត់វិញម្ដងហើយ។ អ្នកប្រហែលមិនអាចឃាត់ភ្នែកគាត់មិនឱ្យមើលស្រីដទៃបាន តែអ្នកអាចឃាត់បេះដូងរបស់គាត់ឱ្យនៅចាក់សោក្នុងបេះដូងអ្នកបាន បើគាត់ពិតជាប្ដីល្អមែននោះ។

សុខចិត្តហត់យ៉ាងណា ក៏ដើម្បីឱ្យតែបានប្រពន្ធកូនសុខស្រួល

ប្រហែលមានបុរសមួយចំនួនពោលថា "ស៊ូលំបាកយ៉ាងណាឱ្យតែបាននៅក្បែរប្រពន្ធកូន" ប៉ុន្តែក៏នឹងអាចមានបុរសមួយចំនួនផ្សេងទៀតដែលនឹងពោលថា "ស៊ូឃ្លាតប្រពន្ធកូនមួយរយៈ ឱ្យតែអាចរកប្រាក់ចិញ្ចឹមប្រពន្ធកូនឱ្យរស់ស្រួល"។

បើគាត់ជាស្វាមីដែលចេះគិតគូររឿងអនាគតគ្រួសារ គាត់នឹងកំណត់គោលដៅមួយដើម្បីធ្វើយ៉ាងណាឱ្យតែក្រុមគ្រួសារមានក្ដីសុខ ទោះត្រូវលំបាកម្នាក់ឯង ឬត្រូវទៅឆ្ងាយមួយរយៈក៏ដោយ។ គាត់នឹងដឹងថាពេលវេលាកម្រិតណាដែលគួរត្រលប់មកវិញ មិនមែនយកលេសទៅឆ្ងាយ ហើយបានស្វាយណាយក្រូចដូចពាក្យចាស់លោកថានោះទេ។

ចេះបែងចែក ដឹងទុក្ខធុរៈគ្រួសារសង្ខាង

មនុស្សប្រុសភាគច្រើនមិនសូវបានគិតគូរពីរឿងនេះប៉ុន្មានទេ ព្រោះគិតថាគួរតែប្រពន្ធជាអ្នកចាត់ចែង។ ប៉ុន្តែអ្នកនឹងអាចមានសំណាង បើរកបានប្ដីដែលចេះដឹងទុក្ខធុរៈ ថ្លឹងថ្លែងបន្ទុកគ្រួសារទាំងសង្ខាងបានស្មើគ្នា អាចធ្វើជាខ្នងបង្អែកសម្រាប់គ្រួសារទាំងពីរ មិនថាមានបញ្ហាតូចឬធំនោះ អ្នកគួរតែរក្សាគាត់ឱ្យបានល្អ ហើយគ្រួសាររបស់អ្នកក៏កម្រនឹងមានជម្លោះដែរ៕

អត្ថបទ៖ សរ សុគន្ធី