នារីវៀតណាមញ៉ាំប៊ីយែរតាំងពីម៉ោង២ថ្ងៃ ជិះឡានទំនើបបុកគេហើយមិនឈប់ ព្រោះហេតុផលស្ដាប់ហើយហួសចិត្ត

2020-08-31 03:30:00
ចំនួនមតិ 0 | ចំនួនចែករំលែក 0

ក្រោយពេលផឹកស្រវឹង នារីមកពីប្រទេសវៀតណាមរូបនេះ ក៏បើកឡានត្រលប់ទៅផ្ទះវិញ តែតាមផ្លូវបានប៉ះទង្គិចជាមួយអ្នកផ្សេង តែនាងមិនបានឈប់ឡាននោះទេ ដោយសារមានមូលហេតុពិសេស។

កាលពីថ្ងៃទី ៣០ ខែសីហាកន្លងទៅនេះ នៅលើបណ្ដាញសង្គមវៀតណាម ទស្សនិកជនជាច្រើនបាននាំគ្នាចែករំលែកវីដេអូឃ្លីបមួយ ដែលបង្ហាញឲ្យឃើញថា ឡានទំនើបពណ៌ក្រហមមួយបានប៉ះនឹងម៉ូតូមួយគ្រឿង បណ្ដាលឲ្យដួល និងបែកផ្កាភ្លើង។ យ៉ាងណាក្ដី អ្នកបើកឡាននេះមិនបានឈប់ឡើយ។

ក្រោយនោះមិនយូរប៉ុន្មាន ប្រជាជនបានរាយការណ៍ទៅកាន់ប៉ូលិសខណ្ឌទី១ ក្រុងហូជីមិញ ដើម្បីតាមចាប់ឡានមានផ្លាកលេខខាងលើ។ នៅប៉ុស្តិ៍ប៉ូលិស គេបានរកឃើញថា ម្ចាស់ឡានមានឈ្មោះ Luu Thi L. អាយុ៣៥ឆ្នាំ ស្រុកកំណើតនៅខេត្ត Quang Binh។

តាមការស៊ើបសួរ នារីរូបនេះបានជួបជុំមិត្តភ័ក្ដិញ៉ាំប៊ីយែរតាំងពីម៉ោង២ថ្ងៃម្ល៉េះ ដល់ម៉ោង១២យប់ក៏បើកឡានទៅផ្ទះវិញ។ តែរយ៉ែឡានបានតែ១០០ម៉ែត្រ នាងក៏បុកម៉ូតូមួយ តែមិនបានឈប់ឡានឡើយ។ នៅពេលនោះ មានម៉ូតូ ៤-៥គ្រៀងជិះដេញតាមដើម្បីឲ្យនាងឈប់ឡាន តែនារីរូបនេះបានឆ្លើយថា ដោយសារតែយប់ជ្រៅហើយ នាងស្មានតែម៉ូតូទាំងនេះ ជាចោរចង់ប្លន់នាង ទើបនាងមិនហ៊ានឈប់ឡាននោះទេ។

“ពេលនោះយប់ជ្រៅហើយ ស្រាប់តែមានអ្នកជិះមកវ៉ៃកញ្ចក់ ហើយវ៉ៃគូទឡាន ឃើញមិនស្រួល ខ្ញុំស្មានតែជាចោរ ទើបខំជិះលឿនជាងមុនទៀត”នារីបង្ករហេតុឲ្យដឹង។ ទាក់ទងនឹងការបុកមនុស្សវិញ នាងប្រាប់ថា នាងមិនបានដឹងឡើយថា នាងមានបុកមនុស្សធ្វើឲ្យគេដួល។ តាមការឲ្យដឹងរបស់ប៉ូលិស តាមផ្លូវរត់គេចនេះ នាងបានធ្វើឲ្យម៉ូតូ៣គ្រឿងទៀតត្រូវខូចខាតព្រោះជិះលឿនពេក។