តារាអនឡាញចិនបង្ករការភ្ញាក់ផ្អើលព្រោះមុខស្អាតដូចតុក្កតា តែរាងមិនខុសពីកីឡាកាស
- 2020-08-24 03:25:00
- ចំនួនមតិ 0 | ចំនួនចែករំលែក 0
តារាអនឡាញចិនបង្ករការភ្ញាក់ផ្អើលព្រោះមុខស្អាតដូចតុក្កតា តែរាងមិនខុសពីកីឡាកាស
តារាបណ្ដាញសង្គមចិន ឈ្មោះ Cheng Lu កំពុងទទួលបានចំណាប់អារម្មណ៍ជាច្រើន ព្រោះមានកម្ពស់ទាប និងមុខគួរឲ្យស្រលាញ់ដូចតុក្កតាជ័រ តែបែរជាមានសាច់ដុំកង់ៗដូចកីឡាកាស។
កាលពីពេលថ្មីៗនេះ កម្រងរូបភាពរបស់ស្រីស្អាតមកពីប្រទេសចិនឈ្មោះ Cheng Lu អាយុ ២៣ឆ្នាំត្រូវបានគេចែករំលែកពេញបណ្ដាញសង្គម។ តាមនោះដែរ តារាបណ្ដាញសង្គមរូបនេះ ត្រូវបានគេដាក់រហស្សនាមឲ្យថា King Kong Barbie ព្រោះទម្រង់មុខ និងរាងកាយមិនសមគ្នាទាល់តែសោះ។
ជាក់ស្ដែង នារីកើតឆ្នាំ ១៩៩៧ មានស្រុកំណើតនៅខេត្ត Liaoning មានកម្ពស់ត្រឹមតែ ១,៥២ម តែប៉ុណ្ណោះ ហើយទម្រង់មុខរបស់នាងវិញ ត្រូវបានគេសរសើរថា គួរឲ្យស្រលាញ់មិនខុសពីកូនក្រមុំជ័រឡើយ។
យ៉ាងណាក្ដី មនុស្សជាច្រើនបានភ្ញាក់ផ្អើលជាខ្លាំង នៅពេលស្រីស្អាតរូបនេះបង្អួតរាងរបស់ខ្លួន ដោយរាងរបស់នាងមិនខុសពីអ្នកកីឡាកាសឡើយ គឺពោរពេញទៅដោយសាច់ដុំតែម្ដង។ ចែករំលែកពីរាងកាយរបស់ខ្លួន Cheng Lu បានឲ្យដឹងថា កាលរៀនថ្នាក់អនុវិទ្យាល័យ នាងបានស្ញប់ស្ញែងរាងកីឡាករអត្តពលកម្មជាខ្លាំង ដែលធ្វើឲ្យនាងមានទឹកចិត្តហាត់បានដូចសព្វថ្ងៃ ហើយបានបញ្ចប់ការសិក្សានៅសកលវិទ្យាល័យ កីឡា Shen Yang។
ដោយសារតែភាពល្បីឈ្មោះរបស់ខ្លួន នាងឧស្សាហ៍បង្ហោះលំហាត់ប្រាណនៅលើបណ្ដាញសង្គម ដើម្បីឲ្យអ្នកដទៃមានសុខភាពល្អ និងអាចហាត់រៀនតាមបាន។ ខណៈមនុស្សមួយចំនួនរិះគន់ថា នាងមានរាងបែបនេះគ្មានអ្នកស្រលាញ់នោះ មនុស្សជាច្រើនកាន់ជើង Cheng Lu ថានេះជាចំណូលចិត្តរបស់នាង បើអត់អ្នកស្រលាញ់ក៏គ្មានបញ្ហាដែរ៕