គ្រប់យីហោម៉ាសផលិតខុសៗគ្នា ចៀសវាងអនុវត្តខុស គួរដឹងចំណុចសំខាន់ទាំងនេះសិន

2020-08-24 03:00:00
ចំនួនមតិ 0 | ចំនួនចែករំលែក 0

មុខជាសម្រស់មុនគេ ដែលនារីណាក៏ត្រូវយកចិត្តទុកដាក់ដែរ។ ម្ល៉ោះហើយនៅពេលចង់បានស្បែកមុខមានសំណើមនិងស្រស់ថ្លា នារីជាច្រើនតែងបិទម៉ាសជាប្រចាំ។ យ៉ាងណាក៏ដោយ កំហុសពីការបិទម៉ាសអាចបំផ្លាញស្បែករបស់អ្នកបាន។ ដូច្នេះ គួរដឹងពីគន្លឹះមួយចំនួន ដើម្បីចៀសវាងហានិភ័យ។

រូបតំណាង

**១. លាងដៃសិន មុនពេលលាងមុខ**

មុនពេលទៅហែកកញ្ចប់ម៉ាសយកមកបិទមុខ អ្នកគូរទៅលាងដៃសិនហើយចាំលាងមុខរបស់អ្នក។ ដោយសារធូលីពីដៃនិងមុខ អាចបង្កមេរោគដែលធ្វើឲ្យពេលបិទម៉ាសទៅ ស្បែកមិនបានស្រូបសារជាតិចិញ្ចឹមឡើយ។ ផ្ទុយទៅវិញ វាបែរជាស្រូបកាកសំណល់ធូលីដី បង្កជាកើតមុនទៅវិញ។

២. ម៉ាសបិទរួច កុំទុកប្រើម្ដងទៀត

មាននារីជាច្រើនតែងយល់ច្រឡំថា ម៉ាសសន្លឹកអាចទុកប្រើបានច្រើនដង តែតាមពិតគឺប្រើបានតែម្ដងប៉ុណ្ណោះ។ ហេតុផល ពេលអ្នកយកប្រើលើកដំបូង គឺយើងហែកកញ្ចប់វាចេញដែលធ្វើឲ្យធូលីនិងខ្យល់ងាយចូលណាស់។ ដូច្នេះ កុំប្រើម៉ាសមួយសន្លឹកច្រើនដងអី ព្រោះអាចបំផ្លាញស្បែកមុខបាន។

រូបតំណាង

៣. កុំបិទម៉ាសចោលពេញមួយយប់ ឬយូរពេក

ម៉ាសត្រូវបានគេចាត់ទុកជាផលិតផលថែបំប៉នស្បែកមុខល្អពិសេសមួយ ប៉ុន្តែមិនមានន័យថាវាគ្មានគុណវិបត្តិទេ។ បើអ្នកបិទវាចោលពេញមួយយប់ ឬយូរជាងកាលកំណត់ មុខរបស់អ្នកអាចយ៉ាប់លើសសភាពដើមក៏ថាបាន។ បន្ថែមពីនេះ ការបិទម៉ាសយូរពេក វាមានតែធ្វើឲ្យមុខស្ងួតនិងគ្រោះថ្នាក់ដោយសារម៉ាសបានស្រូបយកសារធាតុចិញ្ចឹមពីស្បែកមុខរបស់អ្នកចេញអស់។

រូបតំណាង

៤. ត្រូវច្បាស់ថា បិទម៉ាសរួចត្រូវលាងមុខចេញឬអត់

គ្រប់យីហោម៉ាសទាំងអស់ សុទ្ធតែផលិតសម្រាប់ប្រើខុសៗគ្នា។ ម្ល៉ោះហើយ មិនមែនគ្រប់ម៉ាសសុទ្ធតែត្រូវលាងមុខចេញ ក្រោយបិទរួចនោះទេ។ ម៉ាសខ្លះ តម្រូវឲ្យអ្នកបន្តលាបគ្រីមបន្ថែមដោយមិនបាច់លុបមុខ ម៉ាសខ្លះតម្រូវឲ្យលាងទឹកចេញ ក្រោយបិទរួច។ ដូច្នេះអ្នកត្រូវធ្វើតាមការណែនាំដែលបានដាក់លើសម្បកកញ្ចប់ឲ្យបានលម្អិត ចៀសវាងស្បែកងាយអាឡែហ្សី និងមុនកើតឡើង។

រូបតំណាង

៥. ទុកម៉ាសក្នុងទូទឹកកក

នារីជាច្រើនជឿថា ទុកម៉ាសក្នុងទូទឹកកក ប្រហែលអាចជួយពន្យាររក្សាម៉ាសបានយូរជាងធម្មតា។ តាមការពិត គឺផ្ទុយស្រឡះ ព្រោះសីតុណ្ហភាពត្រជាក់អាចបំផ្លាញសមាសធាតុមួយចំនួនក្នុងម៉ាសមិនសូវមានប្រសិទ្ធភាព។ ដូច្នេះ ពេលទិញគួរពិនិត្យមើលថ្ងៃផុតកំណត់ ហើយប្រើវាឲ្យបានមុនការបរិច្ឆេទ។ មួយវិញទៀត គួរទុកម៉ាសក្នុងបន្ទប់ដែលមានកម្រិតសីតុណ្ហភាពល្មមនិងមិនត្រូវចំពន្លឺថ្ងៃដោយផ្ទាល់៕

អានបន្ត៖ តិចនិកងាយៗដោះស្រាយបញ្ហាស្បែកក្រិន អុជខ្មៅ គ្រើមដូចស្បែកមាន់

ប្រភព៖ Tonkit360 ប្រែសម្រួល៖ លឹម សុនា