ការថ្លឺងទម្ងន់ និង BMI (សន្ទស្សន៍ម៉ាសរាងកាយ) អាចនឹងមិនគ្រប់គ្រាន់ទេក្នុងការយល់ដឹងអោយបានច្បាស់ពីរាងកាយអ្នក។ អ្នកអាចមានទំងន់ដែលមើលទៅសមស្រប មានសុខភាពល្អ តែអ្នកអាចនឹងត្រូវការសម្រកទម្ងន់ក៏ថាបាន។ នេះជាសញ្ញាដែលអ្នកគួរយកចិត្តទុកដាក់បំផុត។

១. ឆាប់ហត់

បើសិនជាអ្នកមានអាការៈះឆាប់អស់ដង្ហើម និង ដង្ហក់ពេលធ្វើសកម្មភាពសាមញ្ញដូចជាដើរឡើងជណ្តើរ អ្នកប្រហែលជាត្រូវការហាតើប្រាណជាបន្ទាន់។ ការធ្វើលំហាត់ប្រាណបេះដូងទៀងទាត់ដូចជាការរត់អាចជួយជំរុញដល់ការរំលាយអាហាររបស់អ្នកនិងធ្វើឱ្យប្រសើរឡើងនូវប្រព័ន្ធសរសៃឈាមបេះដូងរបស់អ្នក។

២. ឈរមិនត្រង់ខ្លួន 

ម៉ាក់ៈ មើលធ្វើដើរអោយត្រង់ខ្លួន?

អ្នកៈ ត្រង់អស់ប៉ុនហ្នឺងហើយតើម៉ាក់!

មានត្រូវរឿងអត់? បើមែនល្មម ដល់ពេលហាត់ប្រាណហើយ។ ការដែលមានខ្នងកោង ឈរមិនត្រង់ខ្លួនរបៀបនេះ ទោះជាព្យាយាមកែហើយយ៉ាងណាក្ដី អាចនឹងជាសញ្ញារាងកាយអ្នក មិនរឺងម៊ាំល្អនោះទេ ដែលធ្វើអោយអ្នកតែងតែពិបាកក្នុងរក្សាខ្លួនអោយត្រង់ល្អ ដោយហេតុអ្នកមានសាច់ដុំមិនរឹងម៊ាំ ព្រមទាំងមានជាតិខ្លាញ់លើស។

៣. មានអារម្មណ៏ល្ហិតល្ហៃជាប្រចាំ

តែងមានអារម្មណ៏ហត់នឿយគ្រប់ពេល អាចជាសញ្ញាពីរាងកាយអ្នកទាមទារ អោយបញ្ចេញញើសខ្លះហើយ។ បើសិនជាអ្នកព្យាយាមសម្រាកនៅផ្ទះមិនធ្វើអ្វី ហើយនៅតែមានអារម្មណ៍ថានឿយហត់ និងស្រពាប់ស្រពោននោះ មានតែការធ្វើលំហាត់ប្រាណអោយបានទៀងទាត់ទេដែលអាចជួយឱ្យអ្នកមានថាមពលពេញមួយថ្ងៃបាននោះ។

៤. ពិបាកគេងលក់

បើសិនជាអ្នកឧស្សាហ៏ប្រែចុះឡើង ហើយនៅតែគេងមិនលក់នោះ អ្នកគួរតែចាប់ផ្ដើមហាត់ប្រាណខ្លះៗ។ ការធ្វើលំហាត់ប្រាណបង្កើនសីតុណ្ហភាពរាងកាយរបស់អ្នកហើយការថយចុះសីតុណ្ហភាពក្រោយហាត់ប្រាណអាចជួយសម្រួលដល់ការគេងលក់ស្រួល។

៥. ទល់លាមកជាប្រចាំ

ក្រៅពីផឹកទឹកឱ្យបានច្រើននិងទទួលទានអាហារដែលមានជាតិសរសៃច្រើនការហាត់ប្រាណក៏អាចជួយពង្រឹងសុខភាពពោះវៀនអ្នកបានដែរ។ ពេលអ្នកហាត់ប្រាណកាន់តែច្រើន អ្នកត្រូវចំណាយពេលតិចធ្វើដំណើរឆ្លងកាត់ពោះវៀនធំ ដែលជួយសម្រូលដល់ការបន្ទោរបង់បាន។

៦. ឧស្សាហ៏ឈឺ

ធ្លាក់ខ្លួនឈឺជាញឹកញាប់គឺជាសញ្ញានៃប្រព័ន្ធភាពស៊ាំចុះខ្សោយ។ ការធ្វើលំហាត់ប្រាណទៀងទាត់ក៏ដូចជារបបអាហារដែលមានសុខភាពល្អនិងការគេងឱ្យបានគ្រប់គ្រាន់ អាចជួយប្រព័ន្ធការពាររាងកាយអ្នកបាន។

៧. ចូលចិត្តទទួលទានអាហារដែលមិនល្អសម្រាប់សុខភាព

ក្រៅពីការដុតបំផ្លាញកាឡូរីពីការទទួលទានពីអាហារប្រភេទនេះ ការធ្វើលំហាត់ប្រាណក៏អាចជួយកាត់បន្ថយការឃ្លានអាហាររបស់អ្នកផងដែរ ដោយរាងកាយអ្នកនឹងចាប់ផ្ដើមកាត់បន្ថយការបញ្ចេញសារអរម៉ូនដែលបណ្ដាលអោយអ្នកមានអារម្មណ៏ថាឃ្លាន។

៨. តែងមានអារម្មណ៏មិនល្អ

យើងតែងមានថ្ងៃដែលមិនសប្បាយចិត្ត វាជារឿងធម្មតានោះទេ តែបើសិនជាអារម្មណ៏បែបនេះតែងនៅជាមួយអ្នកជាប្រចាំនោះ រាងកាយអ្នកកំពុងត្រូវការសកម្មភាពយ៉ាងចាំបាច់។ ការធ្វើលំហាត់ប្រាណជួយរាងកាយបញ្ចេញអរម៉ូន endorphins និងរំញោច serotonin ដែលអាចមានឥទ្ធិពលវិជ្ជមានទៅលើអារម្មណ៍។