ហេតុអ្វីបានជាគូស្វាមីភរិយាជប៉ុនរៀបការរួចគេងបែកគ្នា?

2020-07-28 08:00:00
ចំនួនមតិ 0 | ចំនួនចែករំលែក 0

ជាធម្មតា រាល់គូស្វាមីភរិយាទំាងឡាយដែលរៀបការរួចហើយតែងតែនៅបន្ទប់គេងជាមួយគ្នាឬក៏គេងជាមួយគ្នា។ តែអ្នកប្រហែលជាប្លែកអារម្មណ៍ ប្រសិនបើដឹងពីគូស្វាមីភរិយាជប៉ុនរៀបការរួចពុំបានគេងជាមួយគ្នាទេ។ ទោះបីជាមានការកើនឡើងបន្ទប់តូចៗនិងផ្ទះល្វែងច្រើនយ៉ាងណាក៏ដោយ ក៏មិនអាចឲ្យគូស្វាមីជប៉ុនគេងជាមួយគ្នាបានឡើយ។ ហើយរឿងនេះមិនមែនដោយសារមានបញ្ហាទំនាក់ទំនង ឬបញ្ហាអ្វីនោះទេ នោះក៏ព្រោះតែពួកគេមានជំនឿថាការគេងបែកគ្នាគឺល្អសម្រាប់ពួកគេ។ ហេតុដូចនេះហើយ ដើម្បីដោះស្រាយចម្ងល់នេះ ចូរអ្នកមកដឹងនូវហេតុផលទំាង ៤ យ៉ាងនេះរួមមាន៖

១. ពួកគេមានកាលវិភាគគេងខុសៗគ្នា

រឿងដែលធ្វើឲ្យគូស្វាមីភរិយាជប៉ុនគេងបែកគ្នានោះគឺដោយសារតែពួកគេមានកាលវិភាគធ្វើការខុសគ្នា។ ការភ្ញាក់ពីគេងដើម្បីទៅធ្វើការងារផ្សេងៗពេលខ្លះអាចរំខានដល់ដំណេករបស់អ្នកផ្សេងទៀតដូចជា អ្នកទៅធ្វើការពេលព្រលឹម និងមកពីធ្វើការយឺតជាដើម។ នេះជាហេតុផលជាក់លាក់មួយដែលធ្វើឲ្យពួកគេគេងបែកគ្នា។ មិនត្រឹមតែប៉ុណ្ណោះ ការគេងបែកគ្នាជួយរក្សាគុណភាពការគេងនិងមិនមានការរំខានឡើយ។

២. កូនៗគេងជាមួយម៉ាក់ៗ

ម្តាយរបស់ក្មេងនៅប្រទេសជប៉ុនតែងគេងជាមួយកូនៗរបស់ពួកគេ ហើយនេះចាត់ទុកថាជារឿងដ៏សំខាន់មែនទែន ហេតុដូចនេះហើយ លោកប៉ាតែងតែគិតថាគួរគេងជាមួយឬក៏អត់។ សូម្បីតែខាងវិទ្យាសាស្ត្រក៏បានបង្ហាញឲ្យដឹងដែរថា ការគេងរួមគ្នាជាមួយឪពុកម្តាយអាចនំាមកដល់លទ្ធផលគេងលក់ស្កប់ស្កល់។ វាជួយរក្សាសីតុណ្ហភាពនិងចង្វាក់បេះដូងរបស់កុមារតូចៗក្នុងពេលតែមួយនោះដែរ វាក៏ជួយកាត់បន្ថយការស្លាប់ភ្លាមៗរបស់ទារកផងដែរ។ លើសពីនេះ វាជួយឲ្យកុមារកាន់តែមានការគោរពខ្លួនឯងច្រើនឡើង ក្លាយជាមនុស្សឯករាជ្យ និងមានលទ្ធផលល្អក្នុងការសិក្សា។

៣. ពួកគេមានក្តីសុខស្ងប់ស្ងាត់

មានគូស្វាមីភរិយាមួយជាច្រើនគិតថាការគេងបែកគ្នាអាចនំាឲ្យការលែងលះយ៉ាងងាយស្រួល តែសម្រាប់ជនជាតិជប៉ុនវិញគឺពុំគិតដូច្នោះទេ។ ពួកគេឲ្យតម្លៃទៅលើការគេងសំខាន់ណាស់ ហើយក៏មិនចង់បានការរំខានពេលគេងផងដែរ។ បានសេចក្តីថា ពួកគេក៏មិនចូលចិត្តនិងមិនត្រូវការការគេងស្រម៉ុក ការគេងមិនស្រួល និងការធាក់អំឡុងពេលគេងដែរ។ បើទោះបីជាគូស្វាមីភរិយាមួយចំនួនមិនមានឱកាសគេងបែកគ្នាក៏ដោយ ក៏ពួកគេនៅតែត្រូវការការគេងដែលនំាមកនូវសម្រស់ដែរ។

៤. ពួកគេមានប្រវត្តិនៃការគេងបែកគ្នា

ពូកប្រភេទ Futon គឺគ្របដណ្តប់ទៅដោយកប្បាសដែលធ្វើឲ្យមានភាពកក់ក្តោនិងទ្រំាទ្រខ្លួនអ្នក។ កាលពីមុនមានតែទំហំមួយប៉ុណ្ណោះដែលត្រូវបានយកមកប្រើជំនួសគ្រែ។ ដូច្នោះ ប្រសិនបើអ្នកចង់អោបមនុស្សជាទីស្រឡាញ់របស់អ្នក អ្នកនឹងត្រូវអោបពូកនោះជាមុនសិន។ ទោះបីជាយ៉ាងណាក៏ដោយ ក៏នាពេលបច្ចុប្បន្ននេះ នៅតែមានការប្រើប្រាស់ពូកនេះដែរ គ្រាន់តែគេធ្វើការផ្លាស់ប្តូរម៉ូដនិងងាយស្រួលទុកដាក់តែប៉ុណ្ណោះ៕