កុំខ្វល់សម្ដីរបស់មនុស្សដែលមិនបានឲ្យលុយអ្នកចាយ តែចូរប្រាប់ខ្លួនឯង ១០ចំណុចនេះ

2020-07-21 03:00:00
ចំនួនមតិ 0 | ចំនួនចែករំលែក 0

គេនិយាយអ្វីពីអ្នកក៏ស្រេចតែគេចុះ គេចង់រិះគន់អ្វីដែលធ្វើយ៉ាងម៉េច ស្រេចតែគេចុះ បើអ្នកពេញចិត្តនឹងអ្វីដែលខ្លួនធ្វើ អ្នកមានលុយ ហើយក៏មានជីវិតប្រសើរថ្លៃថ្នូរ នោះអ្នកក៏មិនបាច់ខ្វល់អីដែរ ព្រោះមនុស្សដែលវាយប្រហារអ្នកបំផុត តែងជាមនុស្សដែលច្រណែនអ្នកបំផុត។

រូបតំណាង

បណ្ដោយឲ្យគេសើចអ្នកឮៗ ប៉ុន្តែធាតុពិតក្នុងជម្រៅចិត្តរបស់គេគឺមានអារម្មណ៍អន់ជាងអ្នក។ ចំណែកអ្នកលួចសើចគេតិចៗក៏បាន ប៉ុន្តែអ្នកច្បាស់ក្នុងចិត្តថាអ្នកមានជីវិតល្អជាងគេ។

ចាំទុក បើអ្នកជាមនុស្សល្អ មនុស្សពូកែ មនុស្សមានតម្លៃស្រាប់ហើយ អ្នកមិនបាច់ខ្វល់ពាក្យសម្ដីអ្នកដទៃទៀតក៏បាន។ ជីវិតខ្លីណាស់ ដូច្នេះគួរយកពេលមកគិតខ្វល់ខ្វាយពីមនុស្សដែលអ្នកស្រលាញ់ និងមនុស្សដែលឲ្យលុយអ្នកវិញល្អជាង។ កុំផ្លាស់ប្ដូរខ្លួនឯងដើម្បីអ្នកដទៃ កុំកើតទុក្ខថាអ្នកដទៃគិតយ៉ាងណា។ ចូរធ្វើជាខ្លួនឯង ហើយមានក្ដីសុខនឹងអ្វីដែលខ្លួនជ្រើសរើស ពេលនោះមនុស្សដែលស្រលាញ់អ្នក នឹងទទួលស្គាល់វា ហើយមនុស្សដែលមិនចូលចិត្តវា នឹងបានចាកចេញពីជីវិតអ្នក។ ខ្វល់ពីមនុស្សដែលអ្នកត្រូវខ្វល់ និងបំភ្លេចចោលការវាយតម្លៃរបស់អ្នកដទៃ ព្រោះអ្នកទាំងនោះគ្មានប្រយោជន៍អ្វីឡើយសម្រាប់ជីវិតអ្នក។

រូបតំណាង

១០ចំណុចខាងក្រោមជាអ្វីដែលត្រូវប្រាប់ខ្លួនឯង៖

១. មុនចង់គ្រប់គ្រងអ្វីៗ ត្រូវរៀនគ្រប់គ្រងខ្លួនឯងឲ្យបានសិន។

២. កុំរំពឹងចង់បានអ្វីលើមេឃ ព្រោះអ្វីដែលអ្នកកំពុងមាននៅពេលនេះគឺល្អបំផុតហើយ។

៣. មិនថាអ្នកធ្លាប់ស្រលាញ់មនុស្សប៉ុន្មាននាក់ មិនថាស្នេហាដែលចូលមកផ្ដល់សុខ ឬទុក្ខ មេរៀននេះមិនបានបង្រៀនថា អ្នកគួរស្រលាញ់គេបែបណានោះទេ ប៉ុន្តែវាបង្រៀនថាត្រូវចេះស្រលាញ់ខ្លួនឯងសិន។

៤. មានមនុស្សដែលខ្លួនស្រលាញ់ មានការងារធ្វើ មានសង្ឃឹម។ បើមាន ៣យ៉ាងនេះ ជីវិតយើងគឺមានក្ដីសុខហើយ។

៥. កុំរវល់តែរអ៊ូថាខ្លួនសំណាងអាក្រក់ ព្រោះមនុស្សដែលសំណាងអាក្រក់ជាងអ្នក គេនៅព្យាយាមធ្វើឲ្យជីវិតគេប្រសើរឡើងនៅឡើយ។

៦. បើអ្នកមើលឃើញចំណុចខ្វះខាតរបស់ខ្លួនឯង ដូចមើលឃើញចំណុចខ្វះខាតរបស់អ្នកដទៃ ជីវិតអ្នកនឹងកាន់តែស្ងប់សុខ។ កុំរវល់តែមើលគុណវិបត្តិអ្នកដទៃ រហូតភ្លេចថាខ្លួនឯងក៏មានគុណវិបត្តិដូចគ្នា។

៧. ចូរស្មោះត្រង់ជាមួយគូជីវិតឲ្យដូចកាលដែលអ្នកស្រលាញ់គេថ្មីៗ។

៨. មានអ្នកខ្លាច មិនប្រាកដថាជារឿងមោទនភាពទាំងអស់ទេ មានអ្នកមើលងាយ ក៏មិនប្រាកដថាជារឿងដែលត្រូវខូចចិត្តទាំងអស់ដែរ។

៩. ការច្រណែន មិនបានធ្វើឲ្យជីវិតរបស់យើងល្អជាងអ្នកដទៃឡើយ។

១០. នៅថ្ងៃណាបានជួបក្ដីសុខ ចូរប្រាប់ខ្លួនឯងថាក្ដីសុខមិនអាចនៅជាមួយយើងរៀងរហូតទេ ថ្ងៃណាជួបទុក្ខ ចូរប្រាប់ខ្លួនឯងថាក្ដីទុក្ខក៏មិននៅជាមួយយើងរហូតដូចគ្នា ៕

ចុចអាន៖

ប្រភព៖ sb.in.th ប្រែសម្រួល៖ ស្វាយ វ៉ាន់ថន