កាយវិការដែលអ្នកធ្វើឡើងដោយមិនដឹងខ្លួនពេលនិយាយជាមួយនរណាម្នាក់ ប្រាប់ពីបុគ្គលិកលក្ខណៈរបស់អ្នកបាន
- 2020-07-14 09:20:00
- ចំនួនមតិ 0 | ចំនួនចែករំលែក 0
កាយវិការដែលអ្នកធ្វើឡើងដោយមិនដឹងខ្លួនពេលនិយាយជាមួយនរណាម្នាក់ ប្រាប់ពីបុគ្គលិកលក្ខណៈរបស់អ្នកបាន
តើអ្នកធ្លាប់កត់ចំណាំពីខ្លួនឯងទេថា ខណៈពេលជជែកជាមួយនរណា យើងតែងមានទំនោរបង្ហាញកាយវិការចម្លែកមួយនៅចំពោះមុខអ្នកដទៃ។ មិនថាតែចំពោះមនុស្សជិតស្និទ្ធ ក៏យើងពិបាកលាក់កាយវិការនេះដែរ។ យ៉ាងណាក្តី កាយវិការនេះវាអាចបង្ហាញពីបុគ្គលិកលក្ខណៈរបស់អ្នកបានយ៉ាងពិតប្រាកដ។ នេះជាអាថ៌កំបាំងដែលបានកើតឡើងនៅពេលយើងធ្វើវាជាញឹកញាប់ ដោយមិនដឹងខ្លួន។ តោះ សាកល្បងផ្ទៀងផ្ទាត់ចម្លើយទាំងអស់គ្នា៖
១. ចូលចិត្តប៉ះច្រមុះ
សម្រាប់អ្នកដែលភ្លេចៗខ្លួនពេលនិយាយគ្នាតែងតែយកដៃទៅប៉ះច្រមុះ បុគ្គលិកលក្ខណៈរបស់គេជាមនុស្សមានទម្លាប់រឹងរូសបន្តិច មិនសូវចូលចិត្តធ្វើតាមបញ្ជាអ្នកដទៃងាយៗ តែងមានអាថ៌កំបាំង និងស្ងប់ស្ងាត់។ ពេលខ្លះមាត់ថា Yes តែបេះដូង No តែបើដើរជាក្រុមវិញ គេច្រើនជាមនុស្សចេះអត់ធ្មត់ ពូកែលាក់អារម្មណ៍នៅក្នុងចិត្តមិនឲ្យអ្នកណាទាយដឹងឡើយ។
២. ចូលចិត្តប៉ះត្រចៀក
ជាមនុស្សមានគោលជំហរផ្ទាល់ខ្លួនរឹងមាំ មិនចំណាយពេលផ្ដោតលើរឿងឥតប្រយោជន៍ តែក៏ជាមនុស្សពិបាកយល់ពីចិត្តផងដែរ។ យ៉ាងណាក៏ដោយ នៅពេលដែលបុគ្គលនេះដាក់ចិត្តដាក់កាយធ្វើរឿងអ្វីមួយហើយ មនុស្សនៅជុំវិញនឹងកត់សម្គាល់ពីគេ ព្រមទាំងមើលឃើញពីការខំប្រឹងរបស់គេថែមទៀត។
៣. ចូលចិត្តប៉ះសក់
ឲ្យតែនិយាយគ្នាលេងយូរបន្តិច ដឹងតែប៉ះសក់លេង មានន័យថាគេជាមនុស្សរៀងអៀនបន្តិច គេឆាប់ភ័យនិងបារម្ភច្រើននៅពេលណាដែលឈរចំពោះមុខអ្នកដទៃយូរ។ គេជាមនុស្សមិនសូវមានទំនុកចិត្តលើខ្លួនឯងនិងគិតច្រើនលើសម្ដីរបស់អ្នកដទៃ។ ម្ល៉ោះហើយ ដើម្បីបិទបាំងភាពអៀនប្រៀននេះ គេច្រើនយកដៃទៅអង្អែលសក់ខ្លួនឯងដោយមិនដឹងខ្លួន ។
៤. អង្អែលចង្កា
បើទោះបីមនុស្សស្រីអត់មានពុកចង្កាក៏ដោយ តែអ្នកខ្លះគឺមានទម្លាប់អង្អែលចង្កាលេងបែបនេះ តែម្តង។ ជាទូទៅ គេជាមនុស្សពេញដោយទំនុកចិត្តខ្ពស់តែលាក់មិនឲ្យគេដឹង ជឿជាក់លើគំនិតខ្លួនឯងថាតែងតែត្រឹមត្រូវរហូត ព្រមទាំងកម្រស្តាប់មតិរបស់អ្នកដទៃណាស់ ។
៥. យកដៃក្រពាត់ចូលគ្នា
កាយវិការនេះ បង្ហាញថាគេមនុស្សមានការគិតជ្រៅ គេតែងដាស់តឿនខ្លួនជានិច្ចនិងមានព្រំដែនកំណត់រវាងអ្នកដទៃ និងចំពោះខ្លួនគេផ្ទាល់ ។ សូម្បីនៅក្បែរមិត្តជិតស្និទ្ធក៏ដោយ ប្រភេទមនុស្សនេះមានទំនោរមិនសូវបើកចិត្តនិយាយរឿងអាថ៌កំបាំងចេញពីចិត្តឡើយ គេតែងប្រើពេលយូរបន្តិចទម្រាំជឿជាក់លើនរណាម្នាក់។
៦. យកដៃខ្ទប់មាត់
មនុស្សដែលឲ្យតែចាប់ផ្តើមសន្ទនាគ្នាហើយយកដៃខ្ទប់មាត់ ភាគច្រើនគេមនុស្សមានការលាក់បាំងអ្វីម្យ៉ាងតិចតួច។ គេអាចកុហក តែមិនមែនជារឿងធំដុំឡើយ។ បើទោះមើលពីខាងក្រៅជាមនុស្សស្ងាត់ស្ងៀម ចេះគ្រប់គ្រងអារម្មណ៍ក៏ពិតមែន តែបើនិយាយពីក្នុងចិត្តគេវិញ ជាមនុស្សមានទុក្ខព្រួយច្រើន មានការគិតអ្វីមួយដោយសម្ងាត់ ដែលតែងរំខានចិត្តរបស់គេស្ទើរគ្រប់ពេល។
៧. យកដៃម្ខាងកាន់ដៃម្ខាងទៀត
ជាមនុស្សឆាប់បាក់ទឹកចិត្ត សូម្បីតែរឿងបន្តិចបន្តួច គេជាមនុស្សបារម្ភច្រើនរហូតដល់ក្លាយជាស្រេ្តស។ ជួនកាលក៏ជាមនុស្សដែលទុទិដ្ឋនិយម និងតឹងតែងចំពោះខ្លួនឯងទៀតផង។
៨. ចូលចិត្តយកដៃទ្រចង្កា
ជាមនុស្សដែលលាក់អារម្មណ៍បានល្អ បើទោះក្នុងចិត្តកំពុងដូចភ្នំភ្លើងផ្ទុះក៏ដោយ។ ហេតុនេះហើយ មនុស្សនៅជុំវិញគេ មិនសូវដឹងថាគេមនុស្សចិត្តក្តៅកម្រិតណាឡើយ ដោយសារតែជំនាញលាក់អារម្មណ៍គ្មានពីរនេះ។ តែនៅពេលដែលគេអត់ធ្មត់លែងបានហើយ គេប្រៀបដូចជាដែកក្តៅក្នុងឡរាប់សិបឆ្នាំ ដែលនរណាក៏បើកភ្នែកធំៗនិងពិតជាគួរឲ្យខ្លាចជាមិនខាន។