លើលោកនេះគ្មានឡើយមនុស្សស្រីអេ មានតែមនុស្សស្រីដែលមិនទាន់រកឃើញស្នេហាពិតប្រាកដ

2020-07-09 03:05:00
ចំនួនមតិ 0 | ចំនួនចែករំលែក 0

ក្នុងជីវិតមួយនេះ សុខចិត្តយឺតប្រសើរជាង លឿនតែប្រហែស។ កុំដោយសារតែឃើញគេមានគូ ហើយឆ្វេឆ្វារកដៃគូឲ្យខ្លួនឯងដែរ ទាំងមិនពេញចិត្ត។

មនុស្សមិនតិចឡើយ ដែលគិតថា អាពាហ៍ពិពាហ៍គឺជាជម្រើសដែលមិនអាចអត់បានសម្រាប់នារីគ្រប់រូបក្រោយពេលចេញពីសកលវិទ្យាល័យរួច និងមានការងារសមរម្យមួយ។ តែមានខ្ញុំម្នាក់ បែរជាខុសគេ ដែលគិតថា វាគ្រាន់តែជាជម្រើសមួយ ដែលអាចជ្រើសយក ឬមិនជ្រើសយកប៉ុណ្ណោះ។ ប្រសិនបើ ខ្ញុំរកឃើញមនុស្សម្នាក់ដែលស័ក្ដិសមនឹងខ្លួនខ្ញុំ នោះខ្ញុំនឹងរៀបការ។

បើខ្ញុំនៅតែរកមិនទាន់ឃើញ ខ្ញុំនឹងរីករាយជីវិតនៅលីវបែបនេះរហូតដល់ថ្ងៃណាមួយដែលបានជួបគេ។ យើងគួរតែដឹងថា អ្វីក៏មានតម្លៃរបស់វាដែរ។ នៅពេលដែលបុគ្គលណាមួយចូលក្នុងជីវិតអ្នកយឺត មានន័យថា គេនឹងពាំនាំនូវអ្វីដែលល្អមកក្នុងជីវិត ដើម្បីឲ្យអ្នកយល់ពីតម្លៃនៃការរង់ចាំអ្វីមួយដែលល្អលើសគេ។ ដ្បិតប្រសិនបើរបស់ល្អ ហើយបានមកដោយងាយៗ ភាគច្រើនយើងមិនឲ្យតម្លៃវាឡើយ។ ហើយនៅពេលគូស្រករបង្ហាញខ្លួនយឺត វានឹងធ្វើឲ្យយើងកាន់តែចាស់ទុំ និងចេះវាយតម្លៃមនុស្សជាងនៅពេលក្មេងខ្ចី។ ទោះបីជាសម័យជឿនលឿនច្រើនហើយក្ដី តែមិនខ្វះឡើយនូវករណី ឆាប់ការ ឆាប់បែក។ ដោយគេសង្កេតឃើញ ស្ទើរតែគ្រប់ភូមិទៅហើយ ដែលមានកូនចៅការនៅវ័យក្មេងខ្លាំង មិនទាន់ស្គាល់អ្វីច្បាស់លាស់។ លទ្ធផលគឺបានត្រឹមខាងស្រីក្លាយជាមេម៉ាយ ខាងប្រុសក្លាយជាពោះម៉ាយ។

ទោះបីជាឃើញបែបនេះនឹងភ្នែកក៏ដោយ តែញាតិមួយចំនួន នៅតែមានសម្ដីស្ដាប់មិនចូលដូចជា មីកូនហ្នឹងអេហើយ គ្មានអ្នកយកទេ ទាំងដែលកូនស្រីគេខ្លះអាយុមិនទាន់សាមក៏ដោយ។ នៅលើលោកនេះ គ្មានឡើយមនុស្សស្រីអេ ព្រោះទោះបីជានៅក្នុងវ័យណាក៏ដោយ ក៏គេអាចរកគូស្រករគេបានដែរ។ ហើយកត្តាដែលមានអាយុជ្រេហើយនៅមិនទាន់មានគូនោះ គឺមកពីគេមិនទាន់រកឃើញបុគ្គលដែលស័ក្ដិសមនឹងគេពិតប្រាកដ។ ដូចនេះហើយ នៅពេលឃើញគេមិនទាន់មានគូ សូមកុំប្រញាប់វាយតម្លៃថាគេអេឲ្យសោះ ព្រោះវាមិនមានសុជីវធម៌៕

ប្រភព៖ Guu ប្រែសម្រួល៖ Caramel