អាថ៌កំបាំងចម្លែកៗពីក្រោយភាពស្រស់ស្អាតរបស់នារីកូរ៉េ សូម្បីខ្លាញ់សេះក៏យកមកប្រើ
- 2020-07-07 08:55:00
- ចំនួនមតិ 0 | ចំនួនចែករំលែក 0
អាថ៌កំបាំងចម្លែកៗពីក្រោយភាពស្រស់ស្អាតរបស់នារីកូរ៉េ សូម្បីខ្លាញ់សេះក៏យកមកប្រើ
នារីជាច្រើនតែងតែមានក្តីស្រមៃចង់បានស្បែកស្អាតដូចតារាកូរ៉េ ហើយសូម្បីតែសក់ក៏ប្រាថ្នាឲ្យក្រាស់និងទន់រលោងដូចដែរ។ យ៉ាងណា មានអាថ៌កំបាំងខ្លះនៅពីក្រោយភាពស្រស់ស្អាតនេះ ដែលអ្នកមិនធ្លាប់ដឹង ថាគ្រឿងផ្សំនៃផលិតផលរបស់កូរ៉េភាគច្រើន គេនិយមប្រើអ្វី។ ខាងក្រោមនេះ ជាផលិតផលថែសម្រស់មួយចំនួនរបស់នារីកូរ៉េ៖
១. សក់ក្រាស់ដោយប្រើខ្លាញ់សេះ
ស្តាប់ទៅហាក់ចម្លែកបន្តិច តែវាជាសាធាតុដ៏ពិសេសមួយដែលអ្នកមិនគួរអើពើនោះទេ បើពិតជាចង់បានសក់ទន់រលោងមែន។ ប្រសិនបើសក់ស្ងួតខ្លាំង នារីកូរ៉េជាច្រើនមិនសូវប្រើសាប៊ូកក់សក់ ឬក្រែមបន្ទន់អីរញ៉េរញ៉ៃឡើយ ពួកគេនិយមប្រើផលិតផលគ្រីមខ្លាញ់សេះ ដែលមិនត្រឹមមានតម្លៃសមរម្យទេ ថែមទាំងគុណភាពវិញក៏អស្ចារ្យផងដែរ។ ក្រៅពីនេះ គេយកវាទៅលាបបំបាត់ស្នាមសន្លាក កាត់បន្ថយស្បែកស្ងួត ដោយនិយមប្រើនៅពេលយប់ជាដើម។
២. ថែទាំស្បែកមុខដោយប្រើទឹកមាត់ខ្យង និងពិសសត្វឃ្មុំ
ទឹកមាត់ខ្យងត្រូវបានគេចាត់ទុកជារូបមន្តនៃសម្រស់អស់រយៈពេលយូរឆ្នាំណាស់មកហើយ។ តែសម្រាប់ ពិសសត្វឃ្មុំវិញ នារីជាច្រើនមិនបានដឹងនិងស្តាប់ទៅកាន់តែចម្លែកនិងគួរឲ្យរអា។ យ៉ាងណាក៏ដោយ វាគឺជាធាតុផ្សំដែលជួយព្យាបាលផ្ទៃមុខបានយ៉ាងល្អឥតខ្ចោះ។ ផលិតផលថែសម្រស់ដែលផ្ទុកសារធាតុនេះ ពិតជាកម្រ និងមានប្រសិទ្ធភាពណាស់ ដូច្នេះនៅពេលចង់រកម្តងៗតែងតែអ្នកលក់ឆ្លើយថាអស់ស្តុក ហើយបើបញ្ជាទិញវិញទាល់តែតម្លៃថ្លៃ និងប្រើពេលយូរ។
៣. ម៉ាសពងត្រី
ឈ្មោះរបស់វា ស្ដាប់ទៅធ្វើឲ្យអ្នកពិបាកស្រមើលស្រមៃបន្តិច រហូតមិនដឹងថាតើវាជាផលិតផលអ្វីឲ្យពិតប្រាកដ។ នេះគឺជាគ្រីមម្យ៉ាងដែលគេរចនាឡើងស្រដៀងនឹងពងត្រីសាម៉ុន ដែលមានសមត្ថភាពផ្តល់សំណើម និងពន្លឺដល់ស្បែកយ៉ាងអស្ចារ្យ។ ដើម្បីទទួលបានប្រសិទ្ធភាពទ្វេគុណ គួរប្រើ២ដងក្នុងមួយថ្ងៃ គឺព្រឹកមួយ ល្ងាចមួយ។ សូមកុំច្រលំថានេះគឺជាថ្នាំលេបថែរក្សាសម្រស់ ព្រោះការពិតទៅវាជាប្រភេទគ្រីម ដែលគេដាក់វាក្នុងប្រអប់បែបនេះឲ្យមើលទៅប្លែកបន្តិច។
៤. ម៉ាសសន្លឹកមាស ២៤x
នេះជាផលិតផលកម្រនិងប្រណិតរបស់កូរ៉េដែលមិនត្រឹមមានប្រសិទ្ធភាពដល់ស្បែកឡើយ តែក៏ត្រូវបានទទួលស្គាល់ពីនារីជាច្រើនផងដែរ។ ម៉ាសមាសត្រូវបានគេប្រើសម្រាប់បំបាត់ស្នាមជាំដែលបន្សល់ពីការកើតមុន ជួយបន្សុទ្ធស្បែកយ៉ាងល្អឥតខ្ចោះ ព្រមទាំងពង្រឹងស្បែកមុខឲ្យតឹងណែនផងដែរ។ យ៉ាងណា មិត្តនារីគួរពិនិត្យឲ្យបានម៉ត់ចត់ ប្រយ័ត្នប៉ះចំរបស់ក្លែងក្លាយដែលធ្វើឲ្យស្បែកងាយអាឡែហ្ស៊ី។
៥. មុជចូលទឹក ក្រោយផាត់មុខរួច
នេះជាវិធីសាស្រ្តរបស់នារីកូរ៉េ ដែលទទួលបានគុណភាពល្អពិសេស និងថ្មីសន្លាងតែម្តង ដោយគេនិយមហៅថា Diving Makeup។ តាមពិតទៅ នេះជាអាថ៌កំបាំងជួយឲ្យសាច់ម្សៅពេលលាប មើលទៅជ្រាបចូលសាច់មុខបានល្អ ដោយការស្រូបតាមរយៈដាក់មុខចូលក្នុងទឹកស្អាតមួយ ហើយប្រើពេល ៣០វិនាទី ក្រោយផាត់មុខរួច។ វិធីសាស្រ្តនេះ មិនត្រឹមជួយឲ្យការផាត់មុខរបស់អ្នកជាប់បានយូរនោះទេ តែក៏ជួយមើលទៅម៉ត់ទន់រលោង កុំឲ្យសសាព្រុះផងដែរ។ វិធីសាស្រ្តនេះត្រូវបាននារីកូរ៉េជាច្រើនអនុវត្តបានជោគជ័យយូរមកហើយ អ្នកក៏អាចសាកល្បងប្រើបានដូចគ្នា។
៦. ផលិតឡេលាបឲ្យសតាមបែបធម្មជាតិដោយខ្លួនឯង
នារីកូរ៉េតែងតែមានរូបមន្តសំងាត់ថែរក្សាស្បែកបែបធម្មជាតិដោយប្រើដូចជា ទឹកក្រូចឆ្មា ក្រមួនសំណើម និង សេរ៉ូមធ្វើឲ្យស្បែកសតាមរូបមន្តលាយខ្លួនឯងដូចជា ទឹកផ្កាកុលាប គ្លីសេរីន ជែលប្រទាលកន្ទុយក្រពើ វីតាមីន E … ជាដើម ដែលទាំងអស់នេះជាគ្រឿងផ្សំជួយស្បែកឲ្យទន់រលោងនិងសបែបស៊ីជម្ពូ៕