ត្រចៀកកាំ លុបចោលរូបភាពប្ដីទាំងអស់លើបណ្ដាញសង្គម ពាក្យចចាមអារ៉ាមលែងលះលេចឡើងសារជាថ្មី
- 2020-07-06 02:55:00
- ចំនួនមតិ 0 | ចំនួនចែករំលែក 0
ត្រចៀកកាំ លុបចោលរូបភាពប្ដីទាំងអស់លើបណ្ដាញសង្គម ពាក្យចចាមអារ៉ាមលែងលះលេចឡើងសារជាថ្មី
កំពូលតារាសម្ដែងស្រីចិន Zhao Wei កំពុងធ្វើឲ្យអ្នកគាំទ្រព្រួយបារម្ភជាខ្លាំងចំពោះចំណងអាពាហ៍ពិពាហ៍របស់នាងនិងស្វាមី ក្រោយពេលសិល្បការិនីរូបនេះ លុបចោលរូបប្ដីរបស់ខ្លួនទាំងស្រុង។
កាលពីថ្ងៃទី ៥ ខែកក្កដាកន្លងទៅនេះ បណ្ដាញព័ត៌មាន QQ បានរាយការណ៍ថា តារាសម្ដែងស្រីជើងចាស់ចិន Zhao Wei បានលុបចោលរូបភាពដែលពាក់ព័ន្ធនឹងប្ដីរបស់ខ្លួនទាំងអស់នៅលើបណ្ដាញសង្គមរបស់ខ្លួន។ បច្ចុប្បន្ន មិនមានរូបភាពណារបស់សេដ្ឋី Huang You Long ទៀតឡើយ។ សកម្មភាពចុងក្រោយរបស់តារាវ័យ ៤៤ឆ្នាំ បានធ្វើឲ្យគេជឿជាក់ថា មង្គការរបស់នាង បានដើរដល់ទីបញ្ចប់មែនទែនហើយ។
អ្នកគាំទ្របានរកឃើញថា តួរឿង ព្រះនាងយេយេ ព្រមទាំងប្ដី មិនបានប្រាស្រ័យទាក់ទងគ្នា លើបណ្ដាញសង្គមជាយូរណាស់មកហើយ។ មុននោះដែរ បណ្ដាញព័ត៌មានតូចធំបានរាយការណ៍ថា ចំណងស្នេហារបស់អ្នកទាំង២ រអាក់រអួលយូរណាស់មកហើយ តែនៅពេលបង្ហាញខ្លួន ត្រចៀកកាំនៅពាក់ចិញ្ជៀនរៀបការនៅឡើយ ហើយនៅខែមុនពួកគេបានទិញផ្ទះរួមនៅសិង្ហបុរីទៀតផង។
យ៉ាងណាក្ដី គេជឿជាក់ថា ទោះខំផ្សះផ្សារយ៉ាងណា ក៏ចំណងមនោសញ្ចេតនាមិនអាចទៅមុខរួច។ ប្រភពខាងក្នុងបានលើកឡើងថា ការបែកបាក់នេះអាចបណ្ដាលមកពីបញ្ហាលុយកាក់ ក្រោយពេលស្វាមីរបស់ស្រីស្អាតរូបនេះរកស៊ីឡុងចុង ជំពាក់បំណុលច្រើន។ ទាក់ទងនឹងបញ្ហានេះ ភាគីទាំងសងខាងនៅតែរក្សាភាពស្ងៀមស្ងាត់ ដោយមិនបញ្ចេញយោបល់អ្វីទាំងអស់៕