និយាយដើមគេឈ្ងុយ ចរិតមនុស្សអន់ដែលគ្មានថ្ងៃអភិវឌ្ឍន៍ទៅមុខរួច

2020-07-06 01:55:00
ចំនួនមតិ 0 | ចំនួនចែករំលែក 0

ដូចកំពូលតារាសម្ដែងស្រីចិន Fan Bingbing ធ្លាប់បាននិយាយរួចទៅហើយថា មានតែអ្នកអន់ជាងអ្នកទេ ទើបនិយាយដើមអ្នក ព្រោះបើគេពូកែជាង គេឈប់ខ្វល់ពីយើងយូរណាស់ទៅហើយ។

មិនថានៅទីណាក៏ដោយ ក៏មានអ្នកចរិតមិនល្អដូចគ្នា ដូចនេះការនិយាយដើមគេមាននៅគ្រប់សង្គម និងវប្បធម៌។ យ៉ាងណាក៏ដោយ ជាមួយទម្លាប់រស់នៅបែបភូមិផងរបងជាមួយគ្នារបស់ស្រុកយើង កាន់តែធ្វើឲ្យទម្លាប់មួយនេះរីកចម្រើនខ្លាំងជាងមុនទៅទៀត។

ដោយសារតែមានទម្លាប់និយាយដើមគ្នានេះហើយ ទើបម្នាក់ៗខំប្រឹងត្រៀមឲ្យខ្លួនឯងដឹងរឿងរបស់គេជាច្រើន កាន់តែអាក្រក់កាន់តែល្អ។ ដើម្បីសម្រេចបានដូចនេះ ពួកគេមិនត្រឹមតែនិយាយគ្នាទេ ពេលខ្លះថែមទាំងជួយថែមអំបិល ប្រហុកឲ្យស្នាដៃរបស់ខ្លួនកាន់តែមានឱជារសទ្វេដង។ ហើយពីការនិយាយគ្នានេះហើយ អាចបណ្ដាលឲ្យមានដល់ការប៉ះទង្គិចអំពើហិង្សាក៏មាន។

មនុស្សម្នាក់ដែលមានចរិតបែបនេះគឺគ្រោះថ្នាក់ទៅហើយ បើមានច្រើនទៀត មិនដឹងជាសាហាវយ៉ាងណា។ វាធ្វើឲ្យបុគ្គលដែលត្រូវគេនិយាយដើមនោះ មានខ្លួនដូច១០០ ព្រោះអ្នកនេះនិយាយអញ្ចេះ អ្នកនោះនិយាយអញ្ចោះ។

បន្ថែមពីនេះ ការនិយាយដើមគេ ធ្វើឲ្យខ្លួនឯងមានអារម្មណ៍ថាយើងល្អជាងគេ យើងមិនមែនជាមនុស្សអាក្រក់។ យើងមានអារម្មណ៍ថាសុវត្ថិភាពនៅពេលរកឃើញចំណុចខ្សោយរបស់អ្នកដទៃ។ អ្នកខ្លះប្រឹងនិយាយដើមគេ ព្រោះខ្លាចគេវ៉ាមុខ និងខ្លាចអន់ជាងគេ។ នេះគឺជាភាពអន់ថយដែលមិនហ៊ានប្រឈមមុខនឹងការពិត ហើយប្រកួតជាមួយគេដោយស្មើភាព ចង់ទម្លាក់គេដោយអំពើអាក្រក់។

នៅក្នុងក្រុមហ៊ុនមួយ បុគ្គលដែលពូកែបំផុត ជាពិសេសអ្នកដែលក្មេងៗតែងត្រូវគេថាឲ្យថា ពួកមានខ្សែឬពូកែអែបអបជាដើម។ នេះគឺសុទ្ធតែជាអ្នកមិនអាចប្រជែងឈ្នះគេ ទើបប្រើល្បិចទម្លាក់គេ។ អ្នកខ្លះបានត្រឹមយកលេសថា ខ្លួននិយាយទៅគឺរិះគន់ដើម្បីស្ថាបនា ហើយប្រាកដណាស់ នេះគ្រាន់តែជាលេសរបស់ជនខិលខូចតែប៉ុណ្ណោះ។

និយាយដើមគេ មិនត្រឹមតែធ្វើឲ្យអ្នកនិយាយក្លាយជាអ្នកនិពន្ធដ៏ឆ្នើមនោះទេ វាក៏ជួយឲ្យពួកគេងាយស្រួលរកបក្សពួករបស់ខ្លួនផងដែរ ព្រោះមនុស្សប្រភេទនេះងាយស្រួលរកគ្នាឃើញណាស់។

សំណាងល្អដែរ តាមការពិត គេសង្កេតឃើញថា អ្នកនិយាយពីក្រោយខ្នងគេ នៅតែជាអ្នកនៅពីក្រោយខ្នងគេ ទៅមុខមិនរួច។ ព្រោះបើគេមានឆន្ទៈមោះមុតក្នុងការងារ ការសិក្សា គេគ្មានពេលឯណាឯណាអង្គុយរាប់ម៉ោងនិយាយរឿងគេទេ។ ពេលវេលាដែលខ្ជះខ្ជាយនោះ យកមករកលុយប្រសើរជាងឆ្ងាយណាស់៕

ចុចអាន៖

អត្ថបទ៖ caramel