វិធីថែស្បែកខុសនានា ដែលកាន់តែថែ ស្បែកកាន់តែខ្មៅស្រអាប់
- 2020-06-12 09:10:00
- ចំនួនមតិ 0 | ចំនួនចែករំលែក 0
វិធីថែស្បែកខុសនានា ដែលកាន់តែថែ ស្បែកកាន់តែខ្មៅស្រអាប់
មនុស្សមិនតិចឡើយ ដែលខំចំណាយទាំងកម្លាំងកាយ និងថវិការមិនតិចឡើយទៅលើការថែរក្សាស្បែកមុខ។ តែដោយសារតែខ្វះចំណេះដឹងខាងថែរក្សាស្បែកមុខ គឺកាន់តែថែ កាន់តែធ្វើឲ្យស្បែកខ្មៅលើសដើម។
១. លាបឡេការពារកម្ដៅថ្ងៃខុស
មនុស្សមួយចំនួនយល់ច្រឡំថា ឲ្យតែលាបឡេការពារកម្ដៅថ្ងៃគឺអាចចេញថ្ងៃដោយសេរី។ នេះគឺជាការគិតខុស ដ្បិតឡេនេះមិនអាចចម្រោះកាំរស្មី UV បានទាំងស្រុងឡើយ។ បន្ថែមពីនេះ ការលាបឡេការពារកម្ដៅមិនគ្រប់គ្រាន់ ឬមិនសព្វក៏ធ្វើឲ្យស្បែកស្រអាប់ដូចគ្នា។ ជាពិសេស អត្រាការពារកម្ដៅថ្ងៃដែលមានស្រាប់នៅក្នុងគ្រឿងផាត់មុខដូចជាម្សៅផាត់ ម្សៅទ្រនាប់គឺមិនអាចប្រើជំនួសឡេការពារកម្ដៅថ្ងៃបានឡើយ។
២. ប្រើប្រាស់គ្រឿងសំអាងមានជាតិអាស៊ីត
មនុស្សស្រីមិនតិចឡើយដែលតែងស្ដាប់ឮតៗគ្នា ថាក្រូចឆ្មាអាចជួយឲ្យធ្វើមុខសបាន ទើបពួកគេយកក្រូចឆ្មាទៅដុះមុខ។ ទោះបីជាក្រូចឆ្មាអាចជួយឲ្យស្បែកភ្លឺថ្លាជាងមុនក៏ពិតមែន តែជាតិអាស៊ីតខ្លាំងនៅក្នុងក្រូចឆ្មា នឹងធ្វើឲ្យស្បែកស្ដើង ងាយស្រអាប់ជាងមុន។ ប្រសិនបើប្រើក្រូចឆ្មាហើយ មិនបិទបាំងឲ្យជិត នោះស្បែកនឹងរឹតតែស្រគាំលើសដើម។ ត្រូវចងចាំថា ការដុះដោយក្រូចឆ្មានេះ គួរធ្វើពេលយប់ ចៀសវាងធ្វើពេលថ្ងៃ។
៣. ប្រើគ្រឿងសំអាងគ្មានគុណភាព
នៅលើទីផ្សារបច្ចុប្បន្ន មិនខ្វះឡើយនូវឡេលាបមុខដែលគ្មានប្រភព និងគុណភាពច្បាស់លាស់។ ដោយភាគច្រើនឡេទាំងនេះ ត្រូវបានលាយឡើងដោយដាក់ជាតិកាត់ច្រើន ដើម្បីធ្វើឲ្យឆាប់សស្បែក។ នៅពេលប្រើដំបូង ស្បែកឆាប់ឃើញស្អាត តែប្រើពេលយូរ ស្បែកនឹងស្ដើង ហើយនៅពេលត្រូវថ្ងៃ នឹងត្រូវជាំ។
៤. ប្រើកាកកាហ្វេមកខាត់ស្បែក
ដើម្បីទទួលបានស្បែកម៉ដ្ឋទន់ភ្លឺរលោង ការខាត់ស្បែកគឺមិនអាចខ្វះបាន។ ទន្ទឹមនឹងផលិតផលខាត់ស្បែកជាច្រើននៅលើទីផ្សារ មិត្តៗនារីជាច្រើនក៏និយមយកកាហ្វេដែលឆុងរួច មកខាត់ស្បែកដូចគ្នា។ យ៉ាងណាក្ដី ដោយសារគ្រាប់កាហ្វេធំ ព្រមទាំងរឹងមុតនោះ នឹងធ្វើឲ្យមុខរងរបួសពេល ដែលធ្វើឲ្យស្បែកក្រហាយ ស្រអាប់លើសដើមពេលលាងចេញ។ ដូចនេះបើអ្នកចង់ខាត់ស្បែកនឹងកាហ្វេ គួរប្រើលាយគ្នាជាមួយទឹកដោះគោ ទឹកឃ្មុំ ឬប្រេងអូលីវជាដើម ចៀសវាងការប្រើកាកកាហ្វេតែឯង៕