ងងឹតមុខធ្វើការ មនោសញ្ចេតនាក៏មិនជោគជ័យ ថ្ងៃមួយដឹងថាយើងចាស់ហើយ
- 2020-06-08 07:15:00
- ចំនួនមតិ 0 | ចំនួនចែករំលែក 0
ងងឹតមុខធ្វើការ មនោសញ្ចេតនាក៏មិនជោគជ័យ ថ្ងៃមួយដឹងថាយើងចាស់ហើយ
ជីវិតមនុស្សការពិតទៅខ្លីខ្លាំងណាស់ មួយប៉ប្រិចភ្នែកក៏ឆ្លងផុតយុវវ័យទៅហើយ។ ទាន់ពេលមិនទាន់ហួស កុំដាក់សម្ពាធលើខ្លួនឯងខ្លាំងពេក គួរយកក្ដីសុខដាក់ខ្លួនឲ្យបានច្រើន។
រាល់ថ្ងៃនេះ អ្នកមានដែលសួរខ្លួនឯងអត់ថា ហេតុអ្វីក៏យើងរវល់គ្មានពេលសម្រាប់ខ្លួនឯងបែបនេះ។ ដល់ពេលឈរមុខកញ្ចក់ទើបភ្ញាក់ព្រើតដឹងខ្លួនថា ខ្លួនចាស់ប៉ុណ្ណា។ សូម្បីតែខ្លួនឯងក៏ជឿថាខ្លួនផ្លាស់ប្ដូរដល់ថ្នាក់នេះ។ ផ្ទៃមុខដែលពោរពេញទៅដោយយុវភាព នៅពេលនេះជំនួសមកវិញនូវស្នាមជ្រួញ លទ្ធផលនៃពេលវេលាជាច្រើនទៀត។
ពេលវេលាផ្លាស់ប្ដូរ ចរិតមនុស្សក៏ផ្លាស់ប្ដូរ។ ការជួបជុំមិត្តភ័ក្ដិផឹកស៊ីសប្បាយរាល់ល្ងាច ក៏ប្ដូរទៅជាការចង់ទៅផ្ទះ ទម្លាក់ខ្លួនលើគ្រែវិញ ព្រោះកម្លាំងក៏លែងដូចមុន។ ហើយជួបជុំច្រើនក៏ហត់ ចង់តែនៅម្នាក់ឯង ក្រោយការងារពេញមួយថ្ងៃទៅហើយ។ ការពីមុនធុញនៅម្នាក់ឯងច្រើនប៉ុណ្ណា ពេលនេះបន់ឲ្យតែមានថ្ងៃសម្រាកដើម្បីនៅតែឯងក្នុងបន្ទប់ មិនចេញក្រៅតែម្ដងក៏គ្មានបញ្ហា។
នៅលើលោកនេះ មនុស្សម្នាក់ៗ សុទ្ធតែមានវិថីដើររៀងៗខ្លួន អ្នកខ្លះទ្វារជោគជ័យ ក៏ឆាប់បើក អ្នកខ្លះក៏ក្របើក។ គ្មានអ្នកណាជោគជ័យរហូត ក៏គ្មានអ្នកបរាជ័យមួយជីវិត។ គ្រាន់តែថា អាយុកាន់តែច្រើន ទំនួលខុសត្រូវក៏កើនតាមនោះដែរ។ កាលពីក្មេង យើងធ្វើអ្វីតាមតែទំនោរចិត្ត ចាស់ទៅទើបដឹងថា ហេតុអ្វីឪពុកម្ដាយត្រូវងើមពីព្រលឹម។ ការពិតមិនមែនពួកគាត់ចង់ដូចនេះឡើយ តែទំនួលខុសត្រូវ ប្រៀបដូចជាម៉ោងរោទិ៍សម្រាប់ពួកគាត់ទៅហើយ។
ដោយសារតែយើងមួយចំនួន អាជីពការងារមិនទាន់ជោគជ័យ ភ្ជាប់មកជាមួយវានោះ គឺជាមនោសញ្ចេតនាដែលមិនអំណោយផលដូចគ្នា។ ចង់ ឬមិនចង់ នៅក្នុងសង្គមសម្ភារៈនិយមដូចបច្ចុប្បន្ន ភាគច្រើនគឺរកដៃគូជីវិតដែលធូរធារដែរហើយ។ ព្រោះសួរថា អ្នកណាចង់យកមនុស្សដែលយកមកហើយកើតទុក្ខទាំង២នាក់នោះ។
តែដូចនិយាយពីដំបូងដែរ មនុស្សម្នាក់ៗ សុទ្ធតែមានវាសនាផ្សេងគ្នា។ សូមកុំសម្លឹងទៅគេហើយយកសម្ពាធដាក់ខ្លួន។ យើងមានតិច រកក្ដីសុខតិចៗដាក់ខ្លួនទៅ។ គេមានច្រើនជារឿងរបស់គេ។ ថ្ងៃខែនៅមានតទៅមុខ ដរាបណាយើងមិនបោះបង់ នៅតែមានសង្ឃឹម៕