Park Bom បញ្ជាក់ថាខ្លួនគ្មានបញ្ហាអ្វីទេ ក្រោយបង្ហាញខ្លួនប្លែកពីមុនខ្លាំង
- 2020-06-05 02:55:00
- ចំនួនមតិ 0 | ចំនួនចែករំលែក 0
Park Bom បញ្ជាក់ថាខ្លួនគ្មានបញ្ហាអ្វីទេ ក្រោយបង្ហាញខ្លួនប្លែកពីមុនខ្លាំង
បង្ហាញខ្លួនក្នុងកម្មវិធីថ្មីបំផុត អតីតសំនៀងឯករបស់ក្រុមចម្រៀង 2NE1 តារាចម្រៀងស្រី Park Bom បានធ្វើឲ្យអ្នកគាំទ្រព្រួយបារម្ភជាខ្លាំងជាមួយនឹងមុខមាត់ខុសពីមុន។
ដោយសារតែធ្លាប់ត្រូវគេសង្ស័យថា ញៀននឹងការវះកាត់កែសម្រស់ ដូចនេះហើយរាល់សកម្មភាពរបស់តារាចម្រៀងស្រីល្បីឈ្មោះកូរ៉េ Park Bom តែងទទួលបានចំណាប់អារម្មណ៍ជានិច្ច ដ្បិតគេចង់ដឹងថាសិល្បការិនីរូបនេះផ្លាស់ប្ដូរបែបណា។
ជាក់ស្ដែង ក្នុងកម្មវិធីប្រគល់ពានរង្វាន់ Grand Bell Awards 2020 ត្រូវបានប្រព្រឹត្តឡើងនៅទីក្រុងសេអ៊ូល ប្រទេសកូរ៉េ ដោយមានការចូលរួមជាច្រើនពីសំណាក់សិល្បករប្រទេសនេះ។
គួរឲ្យចាប់អារម្មណ៍ជាងគេ គឺ Park Bom ដែលបានបាត់មុខពីទូរទស្សន៍មួយរយៈពេលហើយ។ យ៉ាងណាក្ដី រូបសម្បត្តិរបស់ម្ចាស់បទ Bom Bom Bom បានធ្វើឲ្យទស្សនិកជនភ្ញាក់ផ្អើលជាខ្លាំង ដ្បិតគេសង្កេតឃើញថា មុខនាងហាក់ហើមជាងមុនច្រើន។ យ៉ាងណាក៏ដោយ ឆ្លើយតបជាមួយបណ្ដាញព័ត៌មាន Star News តំណាងរបស់តារាវ័យ ៣៦ឆ្នាំបានឲ្យដឹងថា នាងមិនមានបញ្ហាអ្វីឡើយ ដោយក្នុងរយៈពេលមិនបង្ហាញខ្លួននេះ ផលិតកម្មបានប្រាប់ឲ្យនាងសម្រាកកុំខ្វល់ច្រើន បណ្ដាលឲ្យស្រីស្អាតរូបនេះ ទទួលទានច្រើន ក៏ឡើងគីឡូ។
ចុងបញ្ចប់ ផលិតកម្ម D-Nation បានឲ្យដឹងថា តារារបស់ខ្លួនកំពុងត្រៀម Come Back ដោយប្រហែលជានៅក្នុងរដូវស្លឹកឈើជ្រុះឆ្នាំនេះ៕