Davikah បង្ហើបអាថ៌កំបាំងថ្មី ៥ យ៉ាង ដើម្បីបានចង្កេះតូចច្រឡឹងដូចអង្រ្កង

2020-06-02 06:40:00
ចំនួនមតិ 0 | ចំនួនចែករំលែក 0

តារាស្រីថៃ Davikah មិនត្រឹមតែមានទម្រង់មុខស្រស់ស្អាត ទាក់ទាញ និងប៉ិនប្រសព្វខាងសម្តែងប៉ុណ្ណោះទេ នាងថែមទាំងមានឈ្មោះល្បីខាងផ្នែកថែរូបរាងនិងចង្កេះឲ្យតូចក្រឡឹង ដែលធ្វើឲ្យគ្រប់គ្នាមិនច្រណែនមិនបាន។ កាលពីថ្មីៗនេះ Davikah បានបង្ហោះរូបថត បង្ហាញដងខ្លួនជាច្រើនសន្លឹក ដែលធ្វើឲ្យអ្នកតាមដាន ចង់ដឹងពីវិធីថែរក្សារបស់នាង។ ក្រៅពីការធ្វើលំហាត់ប្រាណ តួឯកស្រីរូបនេះ បានបង្ហើបអាថ៌កំបាំង ៥យ៉ាងដែលអាចជួយឲ្យនាងបានចង្កេះអង្រ្កងតូចច្រឡឹង ជាមួយនឹងដងខ្លួនដ៏ស្លីមស្អាតទាក់ទាញ។

១. បែងចែកពេលវេលាញ៉ាំឲ្យបានត្រឹមត្រូវ

ចង់សម្រកទម្ងន់ឲ្យមានប្រសិទ្ធភាពខ្ពស់ លុះត្រាតែអ្នកចេះគ្រប់គ្រងរបបអាហារឲ្យបានល្អ។ ដើម្បីឲ្យចង្កេះតូចបានយូរ នាងត្រូវញ៉ាំអាហារ៣ ដង ក្នុងរយៈពេល៨ ម៉ោង ប៉ុន្តែមិនមែនញ៉ាំជាប់ៗគ្នាពេកទេ គឺត្រូវចាំទុកឲ្យឃ្លានបន្តិចសិន។ នាងញ៉ាំតែអាហារណាដែលមានប្រយោជន៍ចំពោះសុខភាព និងជៀសឲ្យផុតពីប្រភេទអាហារ Fast Food។ នៅសល់ ១៦ម៉ោងទៀត នាងទុកពេលឲ្យរាងកាយធ្វើការគ្រប់គ្រងអាហារដោយខ្លួនឯង ក្នុងបរិមាណសមរម្យ។ ប៉ុន្តែភាគច្រើន Davikah តែងជ្រើសរើសអាហារដែលមានវីតាមីន ជាតិសរសៃច្រើន ដូចជាផ្លែឈើ និងគ្រាប់ធញ្ញជាតិ ដែលអាចកាត់បន្ថយការឃ្លាន ធ្វើឲ្យមានអារម្មណ៍ឆ្អែតបានយូរ និងមិនបណ្តាលឲ្យឡើងគីឡូផងដែរ។

២. កាត់បន្ថយអាហារដែលផលិតចេញពីម្សៅនិងមានជាតិស្ករ

ជាតិម្សៅនិងស្ករ គឺជាសត្រូវចម្បងនៃការសម្រកទម្ងន់។ បើអ្នកព្យាយាមកាត់បន្ថយនិងជៀសវាងរបស់២មុខនេះ អ្នកនឹងបានរាងស្អាតជាក់ជាមិនខាន។ ទោះបីជាចង់យ៉ាងណា ត្រូវញ៉ាំក្នុងបរិមាណតិចបំផុត ដើម្បីជួយអារម្មណ៍ល្អ ប៉ុន្តែកុំភ្លេចថា អាហារទាំង២នេះ កាន់តែញ៉ាំវានឹងកាន់តែធ្វើឲ្យអ្នកឆាប់ឃ្លាន។

៣. ដើរឲ្យបាន២គីឡូម៉ែត្រឬលើសពីនេះជារៀងរាល់ថ្ងៃ

អ្នកមិនចាំបាច់ហាត់ប្រាណធ្ងន់ៗពេកក៏បាន ត្រឹមការដើរប្រចាំថ្ងៃ ក៏អាចជួយដុតបំផ្លាញជាតិខ្លាញ់ក្នុងរាងកាយបានច្រើនផងដែរ។ ជាទូទៅ Davikah តែងដើរយឺតៗ បន្ទាប់មកត្រូវដើរលឿនៗឲ្យបាន ២គីឡូម៉ែត្រឬលើសពីនេះជារៀងរាល់ថ្ងៃ។ បើគ្មានពេលចេញទៅខាងក្រៅទេ អ្នកអាចហាត់ប្រាណបញ្ចេញញើសនៅក្នុងផ្ទះក៏បាន។ ព្យាយាមហាត់ជាប្រចាំ គង់តែបានរាងដូចប្រាថ្នា។

៤.ផឹកទឹកឲ្យបានច្រើន

កុំមើលរំលងឲ្យសោះ ចំពោះការផឹកទឹក ព្រោះវាជាវិធីដ៏សំខាន់សម្រាប់អ្នកដែលចង់បានរាងស្អាត។ នាងតែងព្យាយាមផឹកទឹកឲ្យបាន១-២ដបធំៗរាល់ថ្ងៃ។ ទឹកមិនត្រឹមតែអាចជួយរំលាយជាតិខ្លាញ់ប៉ុណ្ណោះទេ ថែមទាំងអាចជួយដល់ការរំលាយអាហារ ល្អសម្រាប់សុខភាព ធ្វើឲ្យស្បែកសភ្លឺថ្លា មានសំណើម ដងខ្លួនស្លីមស្អាតហើយមិនងាយឡើងគីឡូទៀត។

៥. ផ្តល់ជីវជាតិនិងវីតាមីនសំខាន់ៗដល់រាងកាយ

ក្នុងដំណាក់កាលសម្រកគីឡួ រាងកាយនឹងបាត់បង់ជីវជាតិសំខាន់ៗមួយចំនួន ជាហេតុអាចបណ្តាលឲ្យមានផលប៉ះពាល់ចំពោះសុខភាព។ ដូច្នេះអ្នកត្រូវញ៉ាំអាហារបំប៉ន ដែលអាចផ្តល់វីតាមីនគ្រប់គ្រាន់ និងជីវជាតិផ្សេងៗដែលរាងកាយត្រូវការជាចាំបាច់។ នៅពេលរាងកាយទទួលបានសារធាតុចិញ្ចឹមល្អៗ អ្នកនឹងអាចទទួលបានរូបរាងស្អាត ចង្កេះតូច និងមានសុខភាពរឹងមាំ មិនចុះខ្សោយកម្លាំង។