ហេតុអ្វីពិបាករកមនុស្សដែលយល់ពីយើងខ្លាំងម្ល៉េះ? ពេលណាទើបជួបម្នាក់នោះ?
- 2020-05-30 01:00:00
- ចំនួនមតិ 0 | ចំនួនចែករំលែក 0
ហេតុអ្វីពិបាករកមនុស្សដែលយល់ពីយើងខ្លាំងម្ល៉េះ? ពេលណាទើបជួបម្នាក់នោះ?
រស់នៅក្នុងពិភពលោកមួយអ្វីដែលពិបាកខ្លាំងជាងគេគឺរកមនុស្សម្នាក់ដែលយល់យើងច្បាស់ តែបើយើងរកឃើញជីវិតនេះគឺសំណាងណាស់។
ហេតុអីពិបាករកមនុស្សបែបនេះម្ល៉េះ?
មានមនុស្សប៉ុន្មាននាក់ទៅដែលអាចរកឃើញមនុស្សម្នាក់ដែលយល់ពីខ្លួន ហើយទទួលបានគ្រប់យ៉ាងដោយមិនប្រកាន់អ្នកនោះ?
អ្នកខ្លះស្រឡាញ់គ្នា ៣ឆ្នាំ ៥ឆ្នាំ នៅតែមិនអាចរស់នៅជាមួយគ្នាបាន នៅតែមិនយល់ពីគ្នាបាន។ ចុងក្រោយមនោសញ្ចេតនាទាំងប៉ុន្មានក៏រលាយខ្ទេចគ្មានសល់។ អ្នកធ្លាប់ទុកចិត្តមនុស្សម្នាក់រហូតខកបំណងទេ? អ្នកធ្លាប់គិតថាគេជាមនុស្សដែលអាចយល់ពីអ្នកគ្រប់យ៉ាង តែចុងក្រោយក៏មិនមែនឡើយ។ អ្នកធ្លាប់មានអារម្មណ៍ថាមានក្ដីសុខពេលអ្នករកឃើញគេ តែចុងក្រោយគេក៏ជាអ្នកធ្វើឲ្យអ្នកយំរហេមរហាមដែរ។
នេះក៏ប្រហែលគេអស់ចិត្ត គេមានជម្រើសថ្មី គេហត់នឹងយល់ពីអ្នក គេទ្រាំនឹងចរិតដែលអ្នកមានលែងបាន។ នៅពេលមនុស្សម្នាក់មើលឃើញអ្វីដែលល្អជាងអ្វីដែលមាននៅក្នុងដៃ គេនឹងហក់ទៅចាប់របស់ថ្មី នេះជាធម្មជាតិរបស់មនុស្សដែលមិនអាចប្រកែកបាន។ តែស្នេហាជាអារម្មណ៍ម្យ៉ាងដែលពិបាកនឹងពន្យល់ ព្រោះនៅពេលដែលអ្នកបានជួបមនុស្សដែលជាគូពិតរបស់អ្នក ទោះអ្នកជាអ្នកណាក៏ជានៅតែស្រឡាញ់អ្នក និងរស់នៅជាមួយអស់មួយជីវិត។ កាលដែលមនុស្សម្នាក់ដែលអ្នកជឿជាក់បំផុតនោះ លែងដៃអ្នកនោះមកពីគេមិនមែនជាស្នេហាពិតរបស់អ្នក ឬក៏មកពីសំណាងអ្នកមិនទាន់មកដល់។
បើមួយជីវិតហើយអ្នកនៅតែមិនអាចរកមនុស្សដែលយល់ពីអ្នកឃើញទេ នោះមានន័យថាអ្នកគ្មានសំណាង អ្នកគ្មាននិស្ស័យនឹងទទួលបានមនុស្សល្អ។
មិនងាយមានមនុស្សណាដែលអាចទ្រាំជាមួយយើងបានគ្រប់ចរិតនោះទេ ដូច្នេះបើអ្នករកឃើញហើយ ចូរថែរក្សាផង ព្រោះពេលខ្លះអ្នកមានសំណាងហើយ តែមិនចេះចាប់យកសំណាង។ កុំរំពឹងថាអាចមានមនុស្សល្អបែបនេះច្រើនសម្រាប់អ្នកអី ពេលខ្លះអ្នកគ្មានសូម្បីសំណាងលើកទី២។
បើពេលនេះអ្នកគិតថាមនុស្សដែលអ្នកកំពុងស្រឡាញ់មិនមែនជាមនុស្សដែលអាចយល់ពីអ្នកទេ អ្នកគួរតែសម្រេចចិត្តដោះលែងគេ ហើយវាក៏ដូចជាដោះលែងខ្លួនឯងដែរ។ បើនៅជាមួយគ្នាមានតែភាពទាស់ទែង រកាំរកូស កើតទុក្ខ សុំកុំបន្តជីវិតដែលនៅសល់រស់ក្នុងភាពឈឺចាប់បែបនេះទៀតអី។
សំណាងអាចនឹងមករកអ្នកនៅពេលដែលអ្នកចេះស្រឡាញ់ខ្លួនឯង និងបើកឱកាសថ្មីឲ្យខ្លួនឯង៕
ចុចអាន៖“អរគុណដែលក្បត់ខ្ញុំ” ការសងសឹករបស់ប្រពន្ធម្នាក់ដែលធ្វើឲ្យប្ដីនាងស្ដាយក្រោយបំផុត