ការពិតដ៏អាក្រក់ក្នុងជីវិតម្នាក់ៗ គ្រប់គ្នាគួរព្រមទទួលស្គាល់ដើម្បីជាសំណាងវិញមុនពេលជួបព្យុះភ្លៀង
- 2020-05-18 08:35:00
- ចំនួនមតិ 0 | ចំនួនចែករំលែក 0
ការពិតដ៏អាក្រក់ក្នុងជីវិតម្នាក់ៗ គ្រប់គ្នាគួរព្រមទទួលស្គាល់ដើម្បីជាសំណាងវិញមុនពេលជួបព្យុះភ្លៀង
ជីវិតនេះពេញដោយរឿងចម្រុះជាច្រើន ដែលមិនមែនកើតឡើងត្រឹមរឿងពណ៌ស៊ីជម្ពូសុទ្ធតែល្អឥតខ្ចោះដូចអ្វីដែលគ្រប់គ្នាចង់បានទេ។ ពិភពលោកនេះនឹងធ្វើឲ្យមនុស្សខ្វះទំនុកចិត្ត ជួនកាលត្រូវបាត់បង់របស់ជាទីស្រលាញ់ទៀតក៏មាន។ ការស្ដីបន្ទោសខ្លួនឯងពេលជួបបញ្ហា គឺជារឿងអយុត្តិធម៌ជាទីបំផុត ព្រោះគ្មាននរណាចង់បានបែបនេះក្នុងជីវិតឡើយ។ ម្ល៉ោះហើយ មានតែហ៊ានទទួលស្គាល់និងផ្លាស់ប្ដូរតាមវិធីដែលអ្នកឃើញ បែបងាយៗ កុំបង្កើតឲ្យវាស្មុគស្មាញ។
ទាំងនេះជារឿងអាក្រក់ក្នុងជីវិត តែបើអ្នកហ៊ានទទួលយកការពិត និងបង្កើតវាឲ្យទៅជារឿងធម្មតា នោះអ្នកនឹងពេញដោយសំណាងល្អ ព្រមទាំងមានសុវត្ថិភាពមុនពេលព្យុះភ្លៀងជីវិតចូលមកដល់។
១. មិនមែនគ្រប់គ្នាសុទ្ធតែខ្វល់ពីបញ្ហារបស់អ្នកឡើយ
មនុស្សជាច្រើនមានទម្លាប់រអ៊ូរទាំពីបញ្ហាផ្ទាល់ខ្លួនដាក់អ្នកជុំវិញ ដើម្បីឲ្យគេជួយខ្វល់ពីរឿងរបស់ខ្លួន។ ការពិតទៅ មានមនុស្សយ៉ាងច្រើន ២ -៣ ប៉ុណ្ណេះដែលនឹងខ្វល់ពីរឿងនេះ ព្រោះថាមនុស្សម្នាក់ៗគេសុទ្ធតែមានបញ្ហាផ្ទាល់ខ្លួនរបស់គេដែរ។ ម្ល៉ោះហើយ បើអ្នកឧស្សាហ៍និយាយរឿងរបស់ខ្លួនប្រាប់គេពេក វានឹងក្លាយជាធ្វើឲ្យគេមិនស្រណុកចិត្តទៅវិញ។
២. ប្រើស្ទីលជីវិតដដែលៗ យូរទៅនឹងក្លាយជារឿងគួរឲ្យធុញទ្រាន់
ចេញពីផ្ទះទៅធ្វើការ ហើយចេញពីធ្វើការមកផ្ទះ យូរៗម្តងចូលរួមកម្មវិធីរបស់មិត្តភក្កិ។ សកម្មភាពនេះយូរៗទៅនឹងធ្វើឲ្យអ្នកក្លាយជាធុញទ្រាន់។ អ្នកគួរឆ្លៀតពេលដើរកម្សាន្ត រៀនភាសាថ្មីៗ... នោះអ្នកនឹងកត់សម្គាល់ឃើញថា អ្នកមានអ្វីថ្មីច្រើនគួរឲ្យចាប់អារម្មណ៍ ។ អ្នកដទៃក៏ប្រហែលធ្លាប់ឆ្លងកាត់បទពិសោធន៍នេះដែរ ដូច្នេះអ្នកកុំមានអារម្មណ៍ទុទ្ទិដ្ឋិនិយមអី។
៣. មនុស្សនៅជុំវិញអ្នក គេកាន់តែក្មេងទៅ ស្អាតទៅៗ និងពូកែជាងអ្នក
មានមនុស្សជាច្រើនតែងគិតថាខ្លួនជាមនុស្សពិសេសលើសអ្នកដទៃ ដែលគំនិតនេះហើយធ្វើឲ្យខ្លួនឯងមោទកភាពជ្រុល។ លើសពីនេះ នៅចាត់ទុកខ្លួនឯងថា ជាមនុស្សសំខាន់បំផុតក្នុងបេះដូងគូស្នេហ៍និងតែងតែយល់ថាខ្លួនជាមនុស្សដែលគេមិនអាចបោះបង់ចោលបាន ។ តែតាមពិតទៅគំនិតបែបនេះវាអាចទៅរួចតិចណាស់។
ករណីផ្សេងទៀត តែងយល់ថាខ្លួនឯងជាផ្នែកមួយយ៉ាងសំខាន់ក្នុងក្រុមហ៊ុន ហើយពេលអន់ចិត្តបន្តិចបន្តួចក៏ហ៊ានដាក់ពាក្យលាឈប់ ព្រោះយល់ថាចៅហ្វាយនឹងចរចាសុំឲ្យត្រលប់មកធ្វើការវិញមិនខាន។ តែផ្ទុយមកវិញ លទ្ធផលមានតែអស់ការងារធ្វើ ដោយសារតែគិតថាខ្លួនឯងសំខាន់ពេក។ ដូចនេះហើយ ក្នុងឆាកជីវិតនេះអ្នក គួរដឹងពីទីតាំងដែលអ្នកកំពុងនៅជាមួយមនុស្សជុំវិញ ហើយព្យាយាមធ្វើអត្តចរិតនិងអាកប្បកិរិយាឲ្យល្អបំផុតទៅ គឺគ្រប់គ្រាន់ហើយ។
៤. កាន់តែចូលកៀក កាន់តែឈឺចាប់
មនុស្សដែលស្និទ្ធនឹងអ្នកខ្លាំង អ្នកក៏នឹងត្រូវឈឺចាប់ដោយសារគេខ្លាំងដូចគ្នា ព្រោះពួកគេជាម្នាក់ដែលស្គាល់អ្នកច្បាស់ ដឹងពីចំណុចខ្លាំងនិងខ្សោយរបស់អ្នកជាងគេ។ ដូច្នេះ ពេលអ្នកទាំងពីរបែកបាក់គ្នា នៅពេលនោះពិតជាពិបាកទទួលយកណាស់ ថាមិត្តភាពបានបំផ្លាញទៅហើយ។ ហេតុនេះ អ្នកគួរមានសតិមួយមករំលឹក ដើម្បីកុំឲ្យជីវិតចូលមកបង្ខំឲ្យអ្នកឈឺចាប់បាន។
៥. បើអ្នកមិនចេះគោរពខ្លួនឯង អ្នកដទៃក៏គ្មានថ្ងៃគោរពអ្នកវិញដូចគ្នា
មុនពេលសុំជំនួយ អ្នកត្រូវព្យាយាមធ្វើឲ្យអស់ពីលទ្ធភាពសិន ព្រោះបើអ្នកអាងតែលើគេពេក ថ្ងៃណាមួយគេនឹងធុញ ហើយនឹងចាកចោលអ្នក។ ជំនួយអាចសុំបាន ក្នុងលក្ខខណ្ឌសមល្មម តែមិនមែនសូម្បីតែរឿងតូចតាចនោះទេ។ ដូច្នេះ ហេតុអ្វីអ្នកមិនចំណាយពេលឲ្យបានច្រើនដើម្បីសាងសមត្ថភាពដល់ខ្លួនឯង ដើម្បីឲ្យអ្នកដទៃមើលឃើញនិងគោរពអ្នកវិញ?
៦. សុខភាពអ្នកនឹងកាន់តែយ៉ាប់ទៅៗ
សុខភាពរបស់មនុស្សនឹងកាន់តែចុះខ្សោយទៅៗពីមួយឆ្នាំទៅមួយឆ្នាំ។ នេះជាការពិតដ៏អាក្រក់មួយ ដែលទាំងអស់គ្នាត្រូវទទួលស្គាល់ឲ្យបាន។ ត្រូវដឹងថា សុខភាពកាលពីអាយុ២០ឆ្នាំ និង៣០ឆ្នាំគឺខុសគ្នា ដូច្នេះអ្នកគួរគោរពរាងកាយខ្លួនឯងផង។ ព្យាយាមញ៉ាំអាហារប៉ូវ បន្លែ និងហាត់ប្រាណ ព្រោះមានតែសុខភាពល្អមួយទេ ដែលជួយឲ្យអ្នករស់នៅបានយូរ និងមានសុភមង្គល។
៧. មនុស្សដែលស្រលាញ់អ្នក មិនអាចរស់ក្បែរអ្នកអស់មួយជីវិតទេ
ច្បាស់ណាស់ក្នុងជីវិតនេះ ទោះជាស្នេហាមានភាពស្រស់ស្អាតនិងរស់ជាមួយគ្នាយូរកម្រិតណា ប៉ុន្តែបុគ្គលម្នាក់នោះនឹងមិនអាចរស់ក្បែរអ្នករហូតឡើយ។ ជីវិតគ្មានអ្នកណាទស្សន៍ទាយដឹងមុនឡើយ ដូចនេះអារម្មណ៍ក៏មិនអាចបង្ខំបានដូចគ្នា។ ប្រហែលនៅថ្ងៃនេះ គេស្រលាញ់អ្នកណាស់ តែថ្ងៃស្អែកគេនឹងស្អប់ហើយឈប់ស្រលាញ់អ្នកវិញក៏ថាបាន។ ហេតុនេះ កុំឲ្យពេញមួយជីវិតនិងក្តីស្រលាញ់អ្នកទៅគេយ៉ាងប្តូរផ្តាច់អស់ពីខ្លួន ត្រូវរក្សាទុកសម្រាប់ខ្លួនឯងខ្លះ នៅពេលមានរឿងអ្វីកើតឡើង អ្នកក៏អាចបន្តរស់បានយ៉ាងមានក្តីសុខ៕
អានបន្ត៖ វិធីងាយស្រួលទាំង៧ យ៉ាងជួយឲ្យជីវិតរីករាយ ទោះអ្នកមិនសូវមានពេលវេលាគ្រប់គ្រាន់ក៏ដោយ