មិនបាច់ចាំយូរទើបស្បែកខូច កំហុស៤នេះដឹងតែខូចតាំងពីព្រឹកព្រលឹមតែម្តង

2020-05-15 05:05:00
ចំនួនមតិ 0 | ចំនួនចែករំលែក 0

ពេលព្រឹក ជាពេលសំខាន់ក្នុងការថែរក្សាស្បែក ព្រមទាំងជួយពង្រឹងគុណភាពស្បែកបានទៀតផង។ នេះមានន័យថា បើអ្នកមិនអើពើ ឬសាងកំហុសដល់ស្បែកអំឡុងពេលនេះ នោះស្បែករបស់អ្នកច្បាស់ជាឆាប់ខូចមិនខាន។ ដូចនេះ អ្នកត្រូវប្រាកដថា ស្បែកនឹងមិនត្រូវបំផ្លាញ តែជំនួសមកវិញដោយភាពស្រស់ស្អាតពីមួយថ្ងៃទៅមួយថ្ងៃ។

១. អ្នកមិនលុបលាងស្បែកនៅពេលព្រឹក

ការសម្អាតស្បែកនៅពេលព្រឹក មានគុណសម្បត្តិច្រើនណាស់ ព្រោះវាជួយលាងសម្អាតញើស បាក់តេរី ធាតុកខ្វក់ រួមទាំងកាកសំណល់ខ្លាញ់លើផ្ទៃមុខដែលបន្សល់នៅពេលយប់។ លើសពីនេះ វាក៏កាត់បន្ថយហានិភ័យការកើតរោគមុនផងដែរ។ ការលាងសម្អាតស្បែកមុខនៅពេលព្រឹក វាជួយការពារនិងធ្វើឲ្យស្បែកអាចស្រូបយកជីវជាតិពីផលិតផលថែសម្រស់ចូលស្បែកបានល្អថែមទៀត។

២. ប្រើផលិតផលខុស

ដើម្បីប្រយុទ្ធប្រឆាំងភាពចាស់ឲ្យមានប្រសិទ្ធភាព អ្នកត្រូវដឹងនៅពេលប្រើផលិតផលដែលផ្ទុកលើសលប់នូវសារធាតុដូចជា AHA/BHA ឬរ៉េតាណុល។ សារធាតុទាំងនេះ នឹងជម្រុះកោសិកាចាស់ៗ ព្រមទាំងជម្រុញការបង្កើតស្បែកឡើងវិញ ធ្វើឲ្យស្បែកងាយធន់នឹងកម្ដៅថ្ងៃ និងងាយជួសជុលឡើងវិញ។ ម្ល៉ោះហើយ អ្នកកុំប្រើផលិតផលមានសារធាតុទាំងនេះនៅពេលព្រឹកអី គួរលាបពេលយប់វិញល្អជាង។

៣. មិនលាបផលិតផលមានផ្ទុកសារធាតុប្រឆាំងអុកស៊ីតកម្ម

ស្បែកងាយនឹងឈឺចាប់ បើអ្នកមិនប្រើផលិតផលបន្ថែមដែលផ្ទុកសារធាតុប្រឆាំងអុកស៊ីតកម្មនៅពេលព្រឹក។ ឆ្លងកាត់រយៈពេលពេញមួយថ្ងៃ សារធាតុប្រឆាំងអុកស៊ីតកម្មនឹងការពារស្បែកពីរ៉ាឌីកាល់សេរី និងមជ្ឈដ្ឋានខាងក្រៅ។ ហេតុនេះ ជម្រើសល្អគួរប្រើសេរ៉ូមវីតាមីន C ដើម្បីលាបឲ្យមានប្រសិទ្ធភាព។ អ្នកគួរលាបមុនពេលប្រើគ្រីម និងឡេការពារកម្ដៅថ្ងៃ។

៤. អ្នកមិនខ្វល់រឿងលាបឡេផ្ដល់សំណើម

ស្បែកដែលគ្មានសំណើមនឹងឆាប់ស្ងួត ស្រអាប់ និងពិបាកគ្រប់គ្រងជាតិខ្លាញ់ ព្រមទាំងស្បែកងាយវិវត្តទៅរកភាពចាស់មុនអាយុកាល។ នេះជាមូលហេតុ ដែលស្បែករបស់អ្នកត្រូវការសំណើមមិនអាចខ្វះបាននៅពេលព្រឹក។ យ៉ាងណា មិនមែនគ្រប់ផលិតផលផ្ដល់សំណើមសុទ្ធតែស័ក្ដិសមសម្រាប់ស្បែកនោះទេ អ្នកត្រូវលាបឡេផ្ដល់សំណើមដែលមានជាតិស្រាលៗ ព្រោះមិនធ្វើឲ្យស្អិតស្ទះរន្ធញើស និងគ្មានផាសុកភាព៕