ជួបរឿងហត់នឿយ និងឈឺចាប់ ត្រូវដាស់តឿនខ្លួនឯងនូវពាក្យ ៣ ម៉ាត់នេះ

2020-05-13 01:35:00
ចំនួនមតិ 0 | ចំនួនចែករំលែក 0

ជីវិតមនុស្ស បើមិនឆ្លងកាត់បញ្ហា គឺមិនអាចហៅថាជីវិតបាននោះឡើយ។ បើទោះបីពេលខ្លះ មនុស្សអាចជួបប្រទះបញ្ហាដូចគ្នា ប៉ុន្តែអ្វីដែលខុសគ្នានោះគឺនៅត្រង់ថា ម្នាក់ៗជ្រើសរើសប្រឈមមុខនឹងបញ្ហានោះដោយរបៀបណា និងសម្លឹងមើលបញ្ហាក្នុងផ្លូវណាវិញដូច្នោះឯង។ មនុស្សដែលរឹងមាំ មិនមែនជាមនុស្សដែលមិនធ្លាប់យំ ឬជួបរឿងអស់សង្ឃឹមនោះឡើយ ប៉ុន្តែគឺជាមនុស្សដែលមិនអនុញ្ញាតឲ្យអារម្មណ៍អវិជ្ជមានទាំងឡាយនោះនៅជាមួយគេបានយូរ។

ចាំទុក ៣ម៉ាត់ខាងក្រោមនេះនៅពេលជួបបញ្ហាជីវិត…!

ត្រូវ "ឈឺ" ទើបចាំ

ត្រូវ "ក្រ" ទើបខំ

ត្រូវ "ហត់" ទើបឈប់

អ្វីដែលចូលមកក្នុងជីវិតយើង គឺសុទ្ធតែបានផ្ដល់មេរៀន និងកសាងខ្លួនយើងឲ្យកាន់តែរឹងមាំ ប្រសិនបើយើងចេះរៀនសូត្រ និងចាប់យកមេរៀនពីវា។ ហើយត្រូវចាំទុកដែរថា៖

អ្វីដែលធ្វើឲ្យយើង “ឈឺចាប់” យើងនៅអាច ដើរ ទៅរកវាបាន ប៉ុន្តែកុំ រត់ ទៅរកវា។

អ្វីដែលធ្វើឲ្យយើង “ក្រ” សូមកុំ រអ៊ូ ដាក់វា ប៉ុន្តែត្រូវ ផ្លាស់ប្ដូរ វា។

អ្វីដែលធ្វើឲ្យយើង "ហត់នឿយ" ត្រូវឈប់ តស៊ូ ដើម្បីវា បើជីវិតរបស់យើងមិនបាន មានតម្លៃ ដោយសារវា។

ប្រើពេលវេលា រៀនសូត្រ អ្វីថ្មីៗ កុំបង្ហិនពេលវេលា រៀនសូត្រអ្វីដដែលៗ ព្រោះយើងកើតមក ដើម្បីរៀនសូត្រ ពីកំហុសឆ្គង។

ភាពទន់ខ្សោយនឹងធ្វើយើងបានស្គាល់ ភាពរឹងមាំ ដោយគ្រាន់តែយើងត្រូវចេះរៀនតស៊ូជាមួយភាពទន់ខ្សោយនោះ។ ចុងផ្លូវដែលស្រស់បំព្រង គង់មិនឆ្ងាយហួសពីអ្វីដែលយើងអាចទៅដល់នោះឡើយ។

ចុះឥលូវនេះ គិតថាខ្លួនយើងបានរៀនសូត្រច្រើនគ្រប់គ្រាន់ហើយឬនៅ?