បើអ្នកជាមនុស្សឆ្លាតមែន នឹងមិនរារាំងខ្លួនឯងដោយសារតែរឿង៤យ៉ាងនេះ

2020-04-27 09:30:00
ចំនួនមតិ 0 | ចំនួនចែករំលែក 0

ការរំខាននិងបញ្ហាក្នុងជីវិតរបស់មនុស្សបច្ចុប្បន្ន ភាគច្រើនចេញពីរង្វង់ផ្លូវចិត្ត។ នៅពេលអ្នកមិនសូវរងការប៉ះពាល់ពីមជ្ឈដ្ឋានខាងក្រៅ ចិត្តអ្នកប្រែជាធម្មតា ហើយមើលឃើញពិភពលោកប្រែជាបរិសុទ្ធ។ មិនថាអ្នកបានងូតទឹកផ្កាក្រអូប ឬគ្រប់គ្នាឱនលំទោនអ្នកទេ ព្រោះសេចក្តីសុខពិតប្រាកដគឺនៅពេលគ្មានឧបសគ្គក្នុងគំនិតរបស់អ្នកទៅវិញទេ។ ដូច្នេះហើយ មនុស្សឆ្លាតនឹងមិនរារាំងសេចក្តីសុខខ្លួនឯងដោយរឿង៤យ៉ាងខាងក្រោម៖

១. មិនរារាំងខ្លួនឯងដោយសារតែអាយុ

តើវ័យមួយណាដែលមានន័យបំផុតក្នុងជីវិតមនុស្សនោះ? អ្នកមានអាយុ២០ឆ្នាំ? ៣០ឆ្នាំ? ឬ៤០ឆ្នាំ? តាមពិត វ័យដែលស្អាត និងមានន័យបំផុតរបស់មនុស្សគឺ "ការមិនព្រមចាស់តាមអាយុ" ជារៀងរហូត។ មិនថាអ្នកមានអាយុ៣០នោះទេ ក៏នៅតែដូចអាយុ១៥ឆ្នាំបានដែរ បើសិនអ្នករស់ជាមួយទំនុកចិត្តនិងស្នាមញញឹមលើផ្ទៃមុខ។ ម្ល៉ោះហើយ មិនថាអ្នកមានអាយុ៤០ឆ្នាំ ក៏អាចដូច២០ឆ្នាំបានដែរ ឲ្យតែអ្នកត្រួសត្រាយខ្លួនឯងលើផ្លូវឲ្យបានល្អ នោះអាយុប៉ុន្មានក៏មិនសំខាន់ដែរ។

២. មិនរារាំងខ្លួនឯងដោយសារតែគម្លាត

ក្នុងជីវិតនេះ តែងតែមានអ្នកដែលរស់នៅសមប្រកបជាងអ្នក រស់នៅរីករាយជាងអ្នក និងថែមទាំងមានអ្វីច្រើនយ៉ាងជាងអ្នក។ មួយក្នុងចំណោមជំងឺធំបំផុតក្នុងទំនាក់ទំនងសង្គមបច្ចុប្បន្ន គឺចូលចិត្តប្រៀបធៀបខ្លួនឯងនិងអ្នកដទៃ។

នៅអាមេរិចខាងត្បូង មានអំបូរបក្សីមួយប្រភេទមានចរិតខុសពីគេឯង ។ កាលណារាងកាយវាកាន់តែតូច វាប្រឹងធ្វើសំបុកកាន់តែធំ។ សំបុករបស់វាខ្លះធំជាងមាឌដល់២ -៣ ដងក៏មាន។ អ្នកចិត្តវិទ្យាខាងសត្វបក្សីរកឃើញថា បើសិនបក្សីនេះរស់នៅតែឯងដោយគ្មានបក្សីដទៃរស់នៅក្បែរ វាគ្រាន់តែធ្វើសំបុកតូចល្មមសម្រាប់វារស់នៅប៉ុណ្ណោះ។ តែបើមានបក្សីណាមករស់នៅក្បែរវាដែរ វាតែងមានគំនិតសម្តែងអំណាចដោយការធ្វើសំបុកដើម្បីប្រៀបធៀប។ ពេលឃើញបក្សីមួយទៀតធ្វើសំបុកធំជាងវាបន្តិច វានឹងប្រឹងធ្វើសំបុកឲ្យធំជាងសំបុកបក្សីនោះ។ ទោះជាវាអស់កម្លាំង ក៏វាមិនបញ្ឈប់ដែរ។ វានៅតែរក្សាគំនិតនេះ រហូតទាល់តែមានម្ខាងអស់កម្លាំងដល់ស្លាប់ ទើបម្ខាងទៀតព្រមឈប់។

ការប្រៀបធៀបរវាងមនុស្សវិញ ក៏មិនខុសគ្នាខ្លាំងពីរឿងរបស់បក្សីខាងលើដែរ។ បើអ្នកប្រឹងអង្គុយតែប្រៀបធៀបខ្លួនឯង នោះចុងបញ្ចប់ បុគ្គលដែលអស់កម្លាំងក្នុងការពង្រីកសំបុករហូតដល់ស្លាប់គឺជាខ្លួនអ្នកផ្ទាល់។

៣. កុំរារាំងខ្លួនឯងដោយគិតថាហួសពេលហើយកុំបារម្ភអំពីអ្វីដែលមិនទាន់កើតឡើង

តើការវេទនាបំផុតនៅក្នុងជីវិតគឺជាអ្វី? តើអ្នកកំពុងចងខ្លួនឯងជាប់នឹងអតីតកាលហើយខ្វល់ខ្លាំងពីរឿងដែលមិនទាន់កើតឡើងដែរឬទេ? អ្នកដឹងទេ បើអ្នករស់នៅជាមួយអតីតកាលរហូត មិនខុសពីចងខ្លួនឯងនោះទេ ព្រោះជីវិតប្រៀបដូចចុះនរកខ្មៅងងឹត គ្មានពន្លឺ។ ចំណែកមនុស្សដែលរស់នៅខ្វល់ជ្រុលលើរឿងដែលមិនទាន់កើតឡើង អារម្មណ៍ពេញដោយការជ្រួលច្របល់ និងក្រៀមក្រំនោះក៏ជីវិតគ្មានថ្ងៃមានសុខសុវត្ថិភាពឡើយ។

ព្រះសង្ឃមួយអង្គមានសង្ឃដីកាទៅឧបាសកម្នាក់ថា ៖ ប្រសិនបើញោមដើរទៅមុខត្រូវស្លាប់ តែបើថយក្រោយក៏នឹងស្លាប់ដូចគ្នា តើញោមសម្រេចនឹងធ្វើបែបណា? ឧបាសកនោះតបវិញថា ៖ អាត្មានឹងដើរទៅជ្រុងម្ខាងទៀត។

ន័យនេះចង់សំដៅថា ក្នុងជីវិតមនុស្សក៏ដូចគ្នា ពេលអ្នកមានអារម្មណ៍ថាជាប់គាំង ត្រូវតែប្រញាប់ប្តូរទិសដៅ នោះអ្នកនឹងរកឃើញផ្លូវចេញមិនខាន។ ត្រូវចាំថា ច្រកមិនមែនមានតែមុខនិងក្រោយនោះទេ ដូច្នេះវាតែងតែមានវិធីដោះស្រាយជានិច្ច។

៤. មិនរារាំងខ្លួនដោយសារតែរវល់ផ្គាប់ចិត្តអ្នកដទៃ

ក្នុងជីវិត តើអ្វីដែលជារឿងលំបាកបំផុត? នោះគឺរៀនធ្វើឲ្យខ្លួនឯងសប្បាយចិត្ត ព្រោះជីវិតអ្នកមានតែម្តងគត់ ដូច្នេះកុំចេះតែធ្វើឲ្យខ្លួនឯងគ្រាំគ្រា ចងចាំតែរឿងមិនល្អ បង្ខំខ្លួនឯងឲ្យធ្វើតាមអ្នកដទៃអី។ មិនថាអ្នកស្ថិតក្នុងវ័យណាទេ អ្នកត្រូវតែរៀនពីរបៀបធ្វើឲ្យជីវិតរីករាយក្នុងបច្ចុប្បន្នកាល។ អ្នកគួរតែលើកលែងទោសចំពោះខ្លួនឯងថា អ្នកមិនមែនកើតមកល្អឥតខ្ចោះនោះទេ។ ហេតុនេះហើយ ត្រូវរក្សាគោលជំហវិជ្ជមាន និងមិនបោះបង់។ ពេលអ្នកដែលអ្នកដើរចូលក្នុងពិភពលោកនេះ គឺអ្នកគួរតែរស់នៅឲ្យបានសុខរៀងរាល់ថ្ងៃ៕

អានបន្ត៖ ពេលជួបស្ថានភាពលំបាកទាំង១៦ បើអាចប្រាប់ខ្លួនឯងនូវពាក្យទាំងនេះ ជីវិតនឹងរឹងមាំឡើងវិញ

ប្រភព៖ soha ប្រែសម្រួល៖ លឹម សុនា