មូលហេតុ ៧ យ៉ាង មនុស្សធំគួររៀនអនុវត្ត "ការគិតដូចកូនក្មេង"អាយុ ៧ ឆ្នាំ
- 2020-04-21 06:00:00
- ចំនួនមតិ 0 | ចំនួនចែករំលែក 0
មូលហេតុ ៧ យ៉ាង មនុស្សធំគួររៀនអនុវត្ត "ការគិតដូចកូនក្មេង"អាយុ ៧ ឆ្នាំ
តើអ្នកធ្លាប់គិតថាចង់ក្លាយជាកូនក្មេងម្ដងទៀតទេ បើសិនជាអាច? ជាពិសេស ពេលជួបឧបសគ្គ ឬ រឿងស្មុគស្មាញច្រើនក្នុងជីវិត អ្វីដែលគិតមុនគេគឺ កាលពេលនៅជាកុមារគឺស្រួលខ្លាំងណាស់ សប្បាយក៏សប្បាយ រំភើបក៏រំភើប មួយថ្ងៃៗគិតតែរឿងរីករាយ មិនដែលខ្វល់ខ្វាយច្រើនដូចពេលធំដឹងក្ដីសោះ។
ដឹងអត់? អ្នកអាចនឹងធ្វើឲ្យជីវិតអ្នកស្រស់បំព្រង និង រីករាយឡើងវិញបាន ដោយគ្រាន់តែអនុវត្តតាមការគិតរបស់កូនក្មេង។ តោះ! មកដឹងពីមូលហេតុទាំង ៧ ដែលគំនិតរបស់ក្មេង ៧ ឆ្នាំ អាចធ្វើឲ្យជីវិតមានក្ដីសុខជាងមុន៖
**១. ពួកគេមិនដែលខ្វល់ពីទស្សនៈអ្នកដទៃ៖** អ្នកធ្លាប់ឆ្ងល់ទេថា ហេតុអ្វីបានជាកូនក្មេងហ៊ានធ្វើសកម្មភាពមួយចំនួនដែលមនុស្សធំគ្មានថ្ងៃធ្វើបាន? ងាយៗ! ពីព្រោះ ពួកគេមិនបានគិតពីទស្សនៈរបស់អ្នកដទៃមកកាន់ខ្លួនឡើយ សំខាន់គឺពួកគេបានធ្វើនូវអ្វីដែលគេសប្បាយចិត្ត ពោលគឺយកក្ដីសុខរបស់ខ្លួនដាក់មុនអ្វីៗទាំងអស់។
២. ពួកគេចេះឆ្ងល់និងស្វែងរកចម្លើយ៖ មូលហេតុដែលកូនក្មេងចូលចិត្តសួរច្រើន គឺព្រោះពួកគេចង់ដឹងចង់ឭនូវដែលពួកគេមិនច្បាស់ ឬ មិនយល់ ដោយមិនតាំងខ្លួនជាអ្នកចេះឡើយ។ រីឯមនុស្សធំ ពេលខ្លះមិនសូវហ៊ានសួរ ឬ បង្ហាញថាខ្លួនមិនយល់នោះទេ ព្រោះគិតពីមុខមាត់ជាធំ។
៣. ពួកគេនិយាយត្រង់៖ ជាការពិត កូនក្មេងមិនចេះរកលេស ភូតភរកុហក ឬ លាក់បាំងអ្វីឡើយ ហើយ ច្រើនតែនិយាយត្រង់ៗតែម្ដង។ នេះក៏ជាចំណុចមួយសំខាន់ដែលមនុស្សធំដឹងក្ដី ភាគច្រើនមិនអាចធ្វើបាន ហើយ គួរយកគំរូតាមកូនក្មេងដែរ។
៤. ពួកគេមិនខ្លាចនឹងយំ៖ យោងតាមការស្រាវជ្រាវ ការយំគឺជាវិធីសាស្រ្ដមួយដ៏មានប្រសិទ្ធភាពក្នុងការបញ្ចេញនូវអារម្មណ៍តឹងតែង និង ភាពឈឺចាប់ក្នុងចិត្ត។ វាជួយកាត់បន្ថយសម្ពាធឈាមខ្ពស់ និង កម្រិតស្រេ្តសនៅក្នុងអរម៉ូននៃរាងកាយ។ ដូច្នេះហើយ យើងឃើញថា ក្រោយពេលយំ កុមារនឹងត្រឡប់មកសភាពធម្មតាវិញបានយ៉ាងលឿន។ ឯមនុស្សធំច្រើនតែបៀមទុក្ខ និង ភាពស្មុគស្មាញ មិនហ៊ានបញ្ចេញមកក្រៅ នោះហើយទើបជីវិតកាន់តែដុនដាប និង គ្មានភាពធូរស្រាល។
៥. ពួកគេមិនចេះគុំកួន៖ ក្មេងមានការចងចាំរយៈពេលខ្លី ហើយក៏ជារឿងដែលល្អម្យ៉ាងដែរសម្រាប់ពួកគេ។ បើមនុស្សធំដឹងក្ដី អាចរៀនបោះចោលនូវអារម្មណ៍គុំកួន ឬ ក្នក់ចិត្តបានខ្លះ នោះអ្នកនឹងឃើញពីការផ្លាស់ប្ដូរដ៏អស្ចារ្យនៅក្នុងជីវិតរបស់អ្នក។
៦. ពួកគេចូលចិត្តរៀនសូត្រអ្វីដែលថ្មី៖ ចំណុចដ៏គួរឲ្យសរសើរមួយទៀតរបស់កូនក្មេងគឺ ពួកគេចូលចិត្តចង់រៀនអ្វីដែលថ្មីនិង ធ្វើអ្វីប្លែកៗដែលពួកគេមិនដែលធ្វើពីមុន។
៧. ពួកគេមិនងាយរាថយ៖ អ្នកដែលឃើញពេលកុមាររៀនជិះកង់ទេ? ពេលចាប់ផ្ដើមរៀនដំបូង មិនថាដួលប៉ុន្មានដង គឺពួកគេតែងងើបមកវិញហើយបន្តការជិះទៅមុខរហូតដល់លែងដួល ហើយចេះជិះស្ទាត់។ នេះហើយជាចំណុចដែលបង្ហាញពីភាពតស៊ូ មិនងាយចុះចាញ់របស់កូនក្មេង ហើយពួកគេក៏មិនខ្លាចនឹងភាពបរាជ័យនោះដែរ ដរាបណាមានកម្លាំងចិត្តបន្តទៅមុខ៕
ចុចអានបន្ត៖ អវយវៈដែលអ្នកសម្អាតមុនគេ ពេលងូតទឹក អាចបង្ហាញពីអត្តចរិតរបស់អ្នកបានយ៉ាងច្បាស់