គួរដឹង! តិចនិក ៧ យ៉ាងជួយការពារ និង កម្ចាត់មុនខ្នងយ៉ាងមានប្រសិទ្ធភាព
- 2020-04-16 06:30:00
- ចំនួនមតិ 0 | ចំនួនចែករំលែក 0
គួរដឹង! តិចនិក ៧ យ៉ាងជួយការពារ និង កម្ចាត់មុនខ្នងយ៉ាងមានប្រសិទ្ធភាព
មុននឹងអនុវត្តនូវវិធីការពារ និងបំបាត់មុនខ្នង អ្នកគប្បីដឹងពីមូលហេតុដែលនាំឱ្យកើតមានវាជាមុនសិន។កត្តាដែលធ្វើឲ្យស្បែកខ្នងមានបញ្ហាមុនអាចមានច្រើន ដែលក្នុងនោះរួមមាន៖ ការបែកញើស កង្វះខាតអនាម័យ កត្តាអ៉រមូន កត្តាតំណពូជ ការប៉ះពាល់នូវសាច់កំណាត់មិនស្អាត ឬ ស្បែកប្រតិកម្មជាដើម។ វិធីសាស្រ្ដ ៧ យ៉ាងដែលអាចជួយទប់ស្កាត់ និងកាត់បន្ថយមុនខ្នងដ៏គួរឱ្យរំខាននោះរួមមាន៖
**១. ឧស្សាហ៍ជម្រុះកោសិកាចាស់ៗចោល៖** ជួនកាលបាក់តេរីដែលទំជាប់លើស្បែកក្នុងរយៈពេលយូរធ្វើឱ្យកករន្ធញើសដែលអាចនឹងបង្កទៅជាមុនខ្នង ដោយមិនដឹងខ្លួនដែរ។ ដូចនេះ យកល្អ អ្នកគួរសាកល្បងប្រើប្រភេទស្ក្រាប់ខាត់ស្បែកដែលមាននាទីជួយជម្រុះនូវកោសិកាចាស់ៗចោល ជួយកម្ចាត់រាល់បាក់តេរី បំបាត់បញ្ហាមុនខ្នង និងជួយឱ្យស្បែកទន់រលោងឡើងវិញ។
២. ចងសក់ឡើង៖ សម្រាប់នារីដែលមានសក់វែង ហើយឧស្សាហ៍ទម្លាក់ ក៏អាចជាកត្តាដែលនាំឲ្យកើតមុននៅផ្នែកខ្នងដែរ ព្រោះសក់ជាបណ្ដុំនៃមេរោគដែលងាយធ្វើឱ្យកកើតជាបញ្ហាមុននៅលើស្បែក។
៣. បោកសម្អាតរបស់ដែលប្រើប្រាស់ជាប្រចាំ៖ ជាពិសេសប្រភេទកំណាត់ដែលអ្នកប៉ះពាល់ជាប្រចាំដូចជា កម្រាលពូក ស្រោមខ្នើយ កន្សែង និង សម្លៀកបំពាក់ ព្រោះការប្រើប្រាស់កំណាត់ដែលមិនស្អាតក៏ងាយធ្វើឱ្យកើតមានបញ្ហាស្បែកដែរ។
៤. ប្រើផលិតផលថែទាំស្បែក៖ ស្រដៀងនឹងមុននៅលើមុខ មុនខ្នងក៏ត្រូវការការថែទាំជាប្រចាំឲ្យបានខ្ជាប់ខ្ជួនដែរ ជាពិសេសត្រូវប្រើផលិតផលដែលផ្ទុកនូវសារធាតុប្រឆាំងនឹងការកកើតមុនឲ្យបាន ២ដង ក្នុង១ថ្ងៃ។
៥. ត្រូវសម្អាតខ្លួនក្រោយពេលហាត់ប្រាណ៖ ថ្វីដ្បិតតែការហាត់ប្រាណគឺល្អសម្រាប់សុខភាពនិងស្បែកតែវាក៏ងាយបង្កទៅជាមេរោគដែលអាចកកើតជាបញ្ហាស្បែកនានា បើមិនបានលាងសម្អាតខ្លួនភ្លាមៗ។
៦. ជ្រើសរើសសាប៊ូកក់សក់ឲ្យបានត្រឹមត្រូវ៖ គួរឱ្យដឹងថា ពេលកក់ឬអប់សក់ ទឹកសាប៊ូដែលហៀរមកត្រូវខ្នងអាចបង្កជាមុនបាន ប្រសិនបើមិនលាងចេញភ្លាមៗ។ លើសពីនេះ អ្នកគួរកត់ចំណាំថាសាប៊ូប្រភេទណាដែលអ្នកប្រើទៅធ្វើឲ្យមានប្រតិកម្មឬបញ្ហាមកលើស្បែក ហើយព្យាយាមប្ដូរសាប៊ូប្រើប្រាស់យូរៗម្ដង ដើម្បីដឹងថាសាប៊ូណាដែលគ្មានសារធាតុប៉ះពាល់ដល់ស្បែកខ្នងរបស់អ្នក។
៧. ស្វែងរកអ្នកជំនាញសើស្បែក៖ បើវិធីសាស្ត្រខាងលើគ្មានប្រសិទ្ធភាពក្នុងការជួយកាត់បន្ថយបញ្ហាមុនខ្នងអ្នក អ្នកអាចទៅពិគ្រោះព្យាបាលជាមួយអ្នកជំនាញសើស្បែកបានដើម្បីទទួលបាននូវការពិនិត្យដោយហ្មត់ចត់និងត្រឹមត្រូវតាមក្បួនវេជ្ជសាស្រ្ដ៕
ចុចអានបន្ត៖ វិធីសាស្រ្ដ ៥ យ៉ាងការពារស្នាមជ្រួញនៅរង្វង់ភ្នែក នារីភាគច្រើនមើលរំលង