មិនមែនជាការសឹងសឹក តែនេះជាអ្វីដែលមនុស្សស្រីត្រូវធ្វើពេលគេបោះបង់អ្នក
- 2020-04-07 11:15:00
- ចំនួនមតិ 0 | ចំនួនចែករំលែក 0
មិនមែនជាការសឹងសឹក តែនេះជាអ្វីដែលមនុស្សស្រីត្រូវធ្វើពេលគេបោះបង់អ្នក
គ្មានមនុស្សស្រីឯណាចង់ជួបការបែកបាក់ ឬស្រឡាញ់មនុស្សខុសនោះទេ ប៉ុន្តែពេលខ្លះវាតម្រូវឲ្យជួបរឿងបែបនេះ។ បើមានមនុស្សប្រុសបានដើរចេញពីជីវិតអ្នក ទុកអ្នកចោលដោយគ្មាននឹកនាស្ដាយនោះ ទាំងនេះជាអ្វីដែលអ្នកត្រូវធ្វើ ព្រោះមិនមែនដើម្បីបញ្ឈឺ ឬឌឺដងអ្នកណាទេ តែគឺដើម្បីខ្លួនឯង ៖
១. បញ្ឈប់រាល់ការទាក់ទងគ្នាទោះក្នុងឋានៈជាអ្វីក៏ដោយ
ជ្រុលជាគេជាអ្នកដើរចេញទៅហើយ ហេតុអីចាំបាច់ព្យាយាមទាក់ទងទៅគេទៀត។ មិនបាច់ចង់រាប់អានគេជាមិត្តភក្តិ ឬបងប្រុសអីទៀតនោះទេ ព្រោះនាំឲ្យជំពាក់ជំពិនមិនដាច់ស្រឡះ ហើយម្យ៉ាងទៀតនាំតែឲ្យគេគិតថាអ្នកនៅតែស្រឡាញ់គេ ហើយរស់ខ្វះគេមិនបាន។
២. ធ្វើខ្លួនឲ្យខ្ពស់
បើគេជាអ្នកដើរចេញពីអ្នក ហើយបន្ទាប់មកអ្នកធ្វើខ្លួនឲ្យដុនដាបទៀតនោះ គេកាន់តែសប្បាយចិត្តព្រោះគេគិតថាគេរើសផ្លូវត្រូវដែលបែកពីអ្នក។ កុំបន្ទាបតម្លៃអ្នកដោយសារមនុស្សប្រុសម្នាក់ដើរចេញ ហើយរឹតតែមិនត្រូវទៅអង្វរគេឲ្យនៅជាមួយអ្នក អង្វរឲ្យគេស្រឡាញ់អ្នក។ គេចង់ទៅឲ្យគេទៅៗ តែអ្វីដែលអ្នកត្រូវធ្វើគេរក្សាចិត្តមិនឲ្យទៅលូកលាន់ជីវិតគេទៀត។
៣. រីករាយ
ទោះខាងក្នុងអ្នកពេលនេះឈឺខ្លាំងក៏ដោយ ក៏មិនត្រូវបង្ហាញឲ្យគេឃើញដែរ។ បើអ្នកនៅជា Friend ក្នុង Facebook ជាមួយគ្នាទៀតនោះរឹតតែត្រូវធ្វើឲ្យគេឃើញថាអ្នកនៅតែអាចសប្បាយចិត្តទោះគ្មានគេក៏ដោយ។ Post រូបណាដែលស្អាតៗ មានស្នាមញញឹម និងសប្បាយចិត្តច្រើន ហើយឲ្យគេមើលទៅអ្នកមានសេរីភាព និងរីករាយជាមួយជីវិតដែលគ្មានគេ។
៤. មានការងារកាន់តែល្អ
ទោះខូចចិត្ត ទោះបាក់ទឹកចិត្តប៉ុណ្ណាក៏ដោយ ក៏មិនត្រូវបោះបង់ការងារចោលដែរ តែជំនួសមកវិញត្រូវធ្វើឲ្យខ្លួនមានតំណែងកាន់តែខ្ពស់ ការងារកាន់តែល្អ។ អត់ស្នេហាបាន តែអ្នកមិនអាចអត់លុយបាននោះទេ ព្រោះពេលអ្នកលំបាក សូម្បីតែខោអាវក៏មិនអាចទិញខ្លួនឯងនោះអ្នកពិតជាកាន់តែត្រូវគេមើលងាយ។ នៅពេលអ្នកមានការងារល្អ មានលុយចាយច្រើន មិនខ្វះទេមនុស្សប្រុសដែលចង់បានអ្នក ហើយពេលនោះកុំថាឡើយមុខគេ ស្រមោលគេក៏អ្នកមិនចង់ឃើញដែរ។
៥. ស្រស់ស្អាត
រឿងនេះគឺចាំបាច់ណាស់ ព្រោះបើបែកគ្នាហើយអ្នកអាក្រក់ជាងមុនប្រាកដជាត្រូវគេកាន់តែសើចចំអក។ យ៉ាងណាក៏ដោយការថែរក្សាសម្រស់ឲ្យខ្លួនបានស្អាត មិនមែនដើម្បីគេតែម្យ៉ាងទេ តែដើម្បីខ្លួនឯងដូចគ្នា ព្រោះអាក្រក់ក៏ជាអ្នក ស្អាតក៏ជាអ្នក ដូច្នេះហេតុអីមិនជ្រើសឲ្យខ្លួនឯងស្រស់ស្អាត? នៅពេលបែកគ្នា មនុស្សស្រីភាគច្រើនគឺតែងតែស្អាតជាងមុន ព្រោះនាងចង់ឲ្យគេដឹងខ្លួន ថានាងមិនមែនអន់នោះទេ។
នេះមិនមែនជាវិធីសងសឹកនោះទេ តែនេះជាវិធីដែលជួយឲ្យខ្លួនអ្នកដើរទៅកាន់ភាពថ្លៃថ្នូរ និងសប្បាយចិត្ត៕
ចុចអាន៖មនុស្សស្រី៖ ត្រូវរើសមនុស្សប្រុសដែលខឹងអ្នកខ្លាំងក៏មិនស្រែក ពេលអ្នកខឹងក៏គេមិនឈ្លោះ