ឃើញបាក់តេរីច្បាស់ៗណាស់! ពិសោធនំប៉័ងជាមួយការលាងដៃទឹកសាប៊ូ និងជែលលាងដៃ

2020-04-02 05:30:00
ចំនួនមតិ 0 | ចំនួនចែករំលែក 0

ពេលខ្លះការលើកឧទាហរណ៍ជាក់ស្ដែង គឺល្អជាងការប្រាប់ ជាពិសេសការពន្យល់ដល់ក្មេងៗឲ្យធ្វើអ្វីមួយ ឬប្រុងប្រយ័ត្នអ្វីផ្សេងជាដើម ប្រសិនបើពូកគេមិនឃើញការបង្ហាញនឹងភ្នែកផ្ទាល់ទេ គឺពូកគេក៏មិនងាយធ្វើតាមផងដែរ។ អ្នកគ្រូ Jaralee Metcalf ដែលមកពីរដ្ឋ Idahoនៃសហរដ្ឋអាមេរិក បានបង្ហាញពីការសម្អាតដៃឲ្យបានត្រឹមត្រូវ ដោយលើកយកការពន្យល់ពិតៗតាមរយៈនំប៉័ងដែលមានរូបរាងប្រែប្រួលដូចខាងក្រោម៖

ដើម្បីឲ្យកូនសិស្សដឹងថា ការរីករាលដាលនៃបាក់តេរីលឿនប៉ុណ្ណា និងហេតុអ្វីបានជាគួរលាងដៃឲ្យបានស្អាត និងញឹកញាប់។ អ្នកគ្រូបានលើយកនំប៉័ងថ្មីចំនួន៥ចំណិត មានលក្ខណៈខុសៗគ្នា ដូចជា ១.នំប៉័ងប៉ះដោយដៃប៉ះកុំព្យូទ័រ ២.នំប៉័ងស្អាតមិនមានប៉ះអ្វីទាំងអស់ ៣.នំប៉័ងប៉ះដោយដៃកខ្វក់ ៤.នំប៉័ងប៉ះដោយដៃលាងទឹកសាប៊ូ និង៥. នំប៉័ងប៉ះដោយដៃលាងទឹកជែល (កម្ចាត់មេរោគ) ហើយធ្វើការពិសោធន៍ ថានឹងមានអ្វីកើតឡើងទៅលើនំទាំងនោះក្នុងរយៈពេល១ខែ។

នេះគឺជានំប៉័ង៣ប្រភេទ ដែលមាន នំប៉័ងប៉ះជាមួយដៃកខ្វក់ នំប៉័ងប៉ះជាមួយដៃលាងដោយជែល និង នំប៉័ងប៉ះជាមួយដៃលាងទឹកសាប៊ូ។

រូបដំបូង នំប៉័ងប៉ះជាមួយដៃកខ្វក់ រូបកណ្ដាល នំប៉័ងប៉ះជាមួយដៃលាងដោយជែល និងរូបចុងក្រោយ នំប៉័ងប៉ះជាមួយដៃលាងទឹកសាប៊ូ

ដោយឡែករូបនេះ គឺសភាពនំប៉័ងដែលកាន់ដោយដៃប៉ះកុំព្យូទ័រ។ ក្នុងន័យនេះ គឺចង់ឲ្យអ្នកសម្អាតរបស់ប្រើប្រាស់ឲ្យស្អាត រួចហើយលាងសម្អាតដៃ សឹមកាន់ចំណីញ៉ាំ។ មិនគួរប្រើរបស់របរបណ្ដើរ ហើយកាន់ចំណីញ៉ាំបណ្ដើរនោះទេ។

នំប៉័ងដែលកាន់ដោយដៃប៉ះកុំព្យូទ័រ

ចំពោះរូបលេខ ៤ និង ២ គឺនំប៉័ងដែលប៉ះដោយដៃលាងនឹងទឹកសាប៊ូ និង នំប៉័ងមិនត្រូវបានប៉ះ។

រូបខាងឆ្វេង នំប៉័ងដែលប៉ះដោយដៃលាងនឹងទឹកសាប៊ូ និង ខាងស្ដាំ នំប៉័ងមិនត្រូវបានប៉ះ

នេះគឺជារូប លេខ ៣ និង ៥ ដែលនំប៉័ងដែលប៉ះដោយដៃកខ្វក់ និងនំប៉័ងប៉ះដោយដៃលាងទឹកជែល (កម្ចាត់មេរោគ)។ នំប៉័ងមានសភាព មានជាប់បាក់តេរី អាចមើលរូបជាក់ស្ដែង។

នំប៉័ងដែលប៉ះដោយដៃកខ្វក់

នំប៉័ងប៉ះដោយដៃលាងទឹកជែល (កម្ចាត់មេរោគ)

សរុបជាលទ្ធផល នំប៉័ងដែលគ្មានបាក់តេរីតោងជាប់ គឺជានំប៉័ងដែលកាន់ដោយដៃលាងនឹងទឹកសាប៊ូតែប៉ុណ្ណោះ។ ហេតុនេះ លោកអ្នកគួរណែនាំកូន និងកុមារឲ្យលាងសម្អាតដៃឲ្យបានស្អាត មុនចាប់កាន់អាហារញ៉ាំ បន្ទាប់ពីបង្ហាញឧទាហរណ៍ជាក់ស្ដែងនេះដល់ពួកគេ៕

ប្រភព៖ Brightside ប្រែសម្រួល៖ ស៊ិន សាវ៉េត