គ្មានឡើយពាក្យថា មិត្តភាព ក្រោយស្នេហាមួយដែលបាត់បង់
- 2020-03-19 03:15:00
- ចំនួនមតិ 0 | ចំនួនចែករំលែក 0
គ្មានឡើយពាក្យថា មិត្តភាព ក្រោយស្នេហាមួយដែលបាត់បង់
ខ្ញុំមិនជឿថានៅមានមិត្តភាពក្រោយស្នេហាមួយដែលបែកបាក់ឡើយ។ បើអ្នកណាគិតថានោះគឺជាមិត្តភាពនោះ គឺបន្លប់ខ្លួនឯងហើយ ព្រោះនោះគឺជាអារម្មណ៍ដែលអ្នកមិនទាន់អស់ស្រលាញ់គេ។
ខ្ញុំចូលចិត្តរាល់ចំណងមនោសញ្ចេតនាណាដែលនៅពេលបញ្ចប់ គឺចប់ទាំងអស់ គ្មានអ្វីនៅពាក់ព័ន្ធនឹងគ្នាទៀត។ បើសិនជាអចេតនាជួបគ្នា ក៏ញញឺមមួយគឺគ្រប់គ្រាន់ហើយ។ ឬបើជ្រុលជាងនេះ អាចចាត់ទុកថាជាមនុស្សដែលមិនធ្លាប់ស្គាល់គ្នាតែម្ដងក៏បាន។
ស្នេហាមួយនៅពេលកំពុងស្រស់បំព្រង បើមិនចេះថែរក្សា ដល់ពេលក្រៀមស្វិតអស់ក្លិនហើយ ក៏មិនគួរតោងទាមគ្នាទៀតដែរ។
គេតែងតែយកពាក្យមិត្តភ័ក្ដិមកប្រើនៅពេលស្នេហាមួយខ្ទេចខ្ទាំដើម្បីបន្លំភ្នែកញាតិក៏ដូចជាខ្លួនឯងថា រវាងអ្នកទាំង២គ្មានអ្វីកើតឡើង។ យ៉ាងណាក្ដី ភាគច្រើនមនុស្សដែលគិតថានៅមានមិត្តភាពនៅពេលបែកបាក់គ្នាហើយនោះ គឺមកពីពួកគេមិនទាន់អស់ចិត្តពីភាគីម្ខាងទៀត។
ព្រោះប្រសិនបើអស់ចិត្តមែនទែនហើយ ប្រាកដជាគ្មានអារម្មណ៍នៅចង់រំខានគ្នាទៀតឡើយ។ បើមានម្នាក់ក្នុងចំណោម២នាក់ នៅចង់អូសក្រឡាទៀត អ្នកដែលគេធ្វើឲ្យឈឺមិនត្រឹមតែអ្នកទាំង២នោះឡើយ គឺអ្នកថ្មីរបស់ភាគីម្ខាងទៀត ក៏ជាជនរងគ្រោះម្នាក់ដែរ។ ព្រោះនៅសុខៗ ក៏ត្រូវគេអូសចូលរឿងដ្រាម៉ាដែលខ្លួនមិនមែនជាតួឯក។
ដូចនេះហើយ ខ្ញុំជឿជាក់ថា ក្រោយស្នេហាមួយដែលដើរដល់ផ្លូវទាល់ គឺគ្មានឡើយថាពាក្យមិត្តភាព។ សម្រាប់អ្នកប្រើពាក្យនេះដើម្បីរក្សាគេឲ្យនៅជិតខ្លួននោះ តាមការពិតគឺមិនទាន់អស់ចិត្តពីគេនៅឡើយទេ៕
អានបន្ត៖ បុរស៥ប្រភេទ ដែលស្រឡាញ់ហើយមានតែទឹកភ្នែកជូតក្បាលជង្គង់