ឈប់ឆាតទៅគេទៀត ទោះបីជាចូលចិត្តឬនឹកដល់គេខ្លាំងយ៉ាងណាក៏ដោយ
- 2020-03-06 08:10:00
- ចំនួនមតិ 0 | ចំនួនចែករំលែក 0
ឈប់ឆាតទៅគេទៀត ទោះបីជាចូលចិត្តឬនឹកដល់គេខ្លាំងយ៉ាងណាក៏ដោយ
ការឆាតលេងទៅកាន់នរណាម្នាក់ អាចនឹងធ្វើឲ្យអ្នកមានអារម្មណ៍ល្អ ឬបង្កើនទំនាក់ទំនងកាន់តែស្និទ្ធស្នាលជាងមុន។ ពេលខ្លះវាក៏កាន់តែធ្វើឲ្យអ្នកឈឺចាប់តូចចិត្តដោយមិនដឹងខ្លួន។ ដោយសារតែមនុស្សដែលអ្នកចាប់អារម្មណ៍ នឹករឭកចង់ឆាតជាមួយ បែរជាតបស្នងមកវិញ ខុសពីអ្វីដែលបានរំពឹងទុក។ ដើម្បីហាមឃាត់ផ្លូវចិត្ត មិនឲ្យគិតរវើរវាយផ្តេសផ្តាសតែឯង និងបង្ហិនពេលវេលាទៅលើរឿងឥតប្រយោជន៍ គួរឈប់ព្យាយាមឆាតទៅគេតទៀត បើសង្កេតឃើញសញ្ញា ៥យ៉ាងដូចខាងក្រោម។
១. គាត់តែងធ្វើឲ្យអ្នកមានអារម្មណ៍មិនល្អរាល់ពេលដែលព្យាយាមឆាតម្តងៗ
ឲ្យតែពេលឆាតទៅម្តងៗ គ្មានបានអ្វីមកវិញក្រៅពីមានអារម្មណ៍មិនល្អ ឬគិតថាមិនសមនឹងនិយាយបែបនេះបែបនោះទៅកាន់គាត់។ សូម្បីតែពាក្យពេចន៍ខ្លះ ដែលអ្នកខំរៀបចំយ៉ាងយូរទម្រាំហ៊ានផ្ញើចេញទៅ ប៉ុន្តែនៅទីបំផុត វានៅតែធ្វើឲ្យអ្នកមិនស្រណុកក្នុងចិត្ត និងយល់ថាស្តាយក្រោយ ដែលខំចំណាយពេលធ្វើរឿងបែបនេះ។
២. គាត់គ្មានបំណងចង់ឆាតតបមកវិញ
រាល់ពេលដែលអ្នកបានឆាតទៅ គាត់ហាក់បីដូចជាមិនចង់ចំណាយពេលតបមកវិញឲ្យស្រួលបួលបន្តិចឡើយ។ បើថារវល់ខ្លាំងគ្មានពេលតប ក៏គ្មានអ្វីត្រូវប្រកាន់ឬយកមកគិតអីដែរ ប៉ុន្តែឃើញអនឡាញជាប់រហូត ហើយនៅតែធ្វើហីៗព្រងើយកន្តើយ ទុកឆាតចោលរាប់ម៉ោង រាប់ថ្ងៃមិនខ្ចីមើល។ បែបនេះគួរដកខ្លួនចេញឲ្យហើយទៅ កុំនៅតោងទាមជាមួយមនុស្សដែលមិនអាចនិងមិនចង់ផ្តល់ឱកាសដល់អ្នក។
៣. គាត់មិនខ្វល់ខ្វាយនឹងបន្តការសន្ទនាជាមួយអ្នកឲ្យបានយូរ
មនុស្សប្រុសបើគេមិនចាប់អារម្មណ៍អ្នកហើយ គេក៏មិនចង់សួរដេញដោលស៊ីជម្រៅអីដែរ។ ពេលខ្លះអ្នកខំឆាតទៅយ៉ាងវែង ពោរពេញដោយអត្ថន័យ តែគេបែរជាតបយ៉ាងខ្លីគ្មានខ្លឹមសារទាល់តែសោះ។ ទង្វើបែបនេះ ពិតជាមិនសមនឹងឲ្យអ្នកខិតខំលះបង់កម្លាំងកាយចិត្តនោះទេ។ គួរចំណាយពេលនិយាយលេងជាមួយមនុស្ស ដែលមើលឃើញពីតម្លៃរបស់អ្នកវិញទើបមិនអសារបង់។
៤. គាត់មិនឆ្លើយតបមកវិញ
បើគាត់មិនតបមកវិញទេ ក៏គ្មានអ្វីចម្លែកដែរ សំខាន់អ្នកត្រូវតែឈប់ឆាតទៅទៀត។ គ្មានហេតុផលណា ដែលត្រូវបន្ត ដែលប្រៀបបានដូចជាការដាក់ទណ្ឌកម្មខ្លួនឯងឡើយ។
៦. គាត់ឆាតមកតែពេលត្រូវការអ្វីម្យ៉ាង
នេះសញ្ញាដែលអ្នកគួរប្រយ័ត្នបំផុត ពុំដូច្នោះទេ គាត់នឹងអាចយកអ្នកធ្វើជាឈ្នាន់ និងប្រើប្រាស់នៅពេលណាដែលត្រូវការតែប៉ុណ្ណោះ។ យល់ល្អគួរនៅឲ្យឆ្ងាយៗ ដាច់ខាតត្រូវចេះការពារខ្លួនឯង កុំឲ្យបាត់បង់ផលប្រយោជន៍ ដោយសារតែអ្នកដទៃ ដែលមានបំណងកេងប្រវ័ញ្ចទឹកចិត្តស្មោះសររបស់អ្នក៕
ចុចអានបន្ត៖ ទម្លាប់៥យ៉ាង ជួយឱ្យស្រីៗមើលទៅថ្លៃថ្នូរ ទៅណាមកណាក៏មានតែអ្នកចោមរោមស្រឡាញ់