មិនសរសើរមិនបាន! យុវតីខ្មែររូបនេះបានផ្លាស់ប្តូរការរស់នៅទាំងស្រុង ដើម្បីបរិស្ថាន!
- 2020-03-02 04:15:00
- ចំនួនមតិ 0 | ចំនួនចែករំលែក 0
មិនសរសើរមិនបាន! យុវតីខ្មែររូបនេះបានផ្លាស់ប្តូរការរស់នៅទាំងស្រុង ដើម្បីបរិស្ថាន!
បញ្ហាបរិស្ថានគឺជារឿងសំខាន់។ ការចូលរួមចំណែកក្នុងការការពារពីសំណាក់បុគ្គលម្នាក់ៗរឹតតែសំខាន់។ ដោយហេតុស្រឡាញ់បរិស្ថាន យុវតីខ្មែរមួយរូបបានខិតខំត្រិះរិះរកវិធីដើម្បីជួយកាត់បន្ថយសំរាម អស់ពីលទ្ធភាពដែលខ្លួនមាន។
យុវតីដែលមានឆន្ទៈខ្ពស់នេះមានឈ្មោះថា ឱក សុចិន្តា។ នាងជាស្ថាបនិក ក៏ដូចជាអ្នកបង្កើតមាតិកាផ្នែកបរិស្ថាននៅ **ZEROW**។ នាងក៏ជានិស្សិតអាហារូបករណ៍ទើបបញ្ចប់ការសិក្សាផ្នែកគ្រប់គ្រងពាណិជ្ជកម្មពី **The University of Pécs** នៃប្រទេសហុងគ្រីផងដែរ។ យោងតាមបទសម្ភាសជាមួយ **"កញ្ញា”** តាមរយៈបណ្ដាញសង្គមបានឱ្យដឹងថា ចិន្តាបានស្គាល់ពីការរស់នៅបែប zero waste ពីក្រុមជជែកពិភាក្សា Life Group នៅពេលដែលពួកគេជជែកគ្នាអំពីបញ្ហាបរិស្ថាន។
ចិន្តាបាននិយាយថា៖ "បន្ទាប់ពីខ្ញុំបានចាប់អារម្មណ៍ទៅលើបញ្ហាបរិស្ថាន ខ្ញុំមើលឃើញថារបៀបរស់នៅរបស់យើងសព្វថ្ងៃ បានបង្កើតសំរាមជាច្រើន ជាពិសេសសំរាមដែលមិនចាំបាច់។ ដូចនេះហើយ ទើបខ្ញុំសម្រេចចិត្តប្តូររបៀបរស់នៅមកបែប zero waste ឬ ការរស់នៅដោយគ្មានសំណល់។ ទន្ទឹមនឹងនេះ ខ្ញុំក៏ចង់ចែករំលែកនូវដំណើរ និង វិធីនានាក្នុងការរស់នៅបែបនេះ ដើម្បីឱ្យប្រជាជនខ្មែរបានស្គាល់ និង យល់ដឹងបន្ថែម"។
ចិន្តាបានបន្តទៀតថា "ZEROW បាននាំខ្ញុំឱ្យស្គាល់មនុស្សថ្មីៗដែលមានការគិតស្រដៀងនឹងខ្ញុំ ហើយវាបានផ្តល់ឱកាសជាច្រើនដើម្បីឱ្យខ្ញុំអាចចូលរួមចំណែកក្នុងការដោះស្រាយបញ្ហាបរិស្ថាននៅកម្ពុជា។ ដោយពេលនេះដែរ មានប្រិយមិត្តរបស់ ZEROW មួយចំនួនចាប់ផ្តើមយល់ដឹង និង ព្យាយាមកាត់បន្ថយកាកសំណល់ ឬ សំរាមក្នុងការរស់នៅប្រចាំថ្ងៃរបស់ពួកគាត់ ZEROW ក៏បានក្លាយជាកម្លាំងចិត្តមួយសម្រាប់ខ្ញុំក្នុងការបន្តរស់នៅបែបនេះ"។
យុវតីគំរូរូបនេះក៏បានបញ្ចេញពីអារម្មណ៍រំភើបអបអរនៅពេលដែលមានមនុស្សជុំវិញខ្លួន ដូចជាគ្រួសារ មិត្តភក្តិ ក៏ដូចជាប្រិយមិត្តក្នុងបណ្ដាញសង្គមជាច្រើន បានផ្ញើសារប្រាប់នាងថា ក្រោយពីបានទស្សនាវីដេអូរបស់នាង ពួកគេបានតាំងចិត្តចូលរួមចំណែកក្នុងការជួយកាត់បន្ថយសំរាម ឬ ការឈប់ប្រើថង់ប្លាស្ទីកជាដើម ។ ពាក់ព័ន្ធទៅនឹងវិធីសាស្ត្រក្នុងការចែករំលែកបញ្ហាបរិស្ថាននេះផងដែរ ចិន្តាយល់ថា បណ្តាញសង្គម Facebook គឺជាកន្លែងមួយដ៏ល្អដើម្បីធ្វើការផ្សព្វផ្សាយនូវចំណេះដឹង ព្រមទាំងមាតិកាល្អៗ ព្រោះប្រជាជនខ្មែរនៅលើបណ្តាញ Facebook ប្រមាណពី ៥ទៅ ៦លាននាក់ កំពុងត្រូវការចែករំលែកនូវព័ត៌មានសំខាន់ៗ និងមាតិកាល្អៗ ដូចជា វិធីសាស្រ្ដក្នុងការកាត់បន្ថយសំរាម ឬ ថង់បា្លស្ទីកនេះជាដើម៕
អានបន្ត៖ ជម្នៈលើរូបរាងខាងក្រៅ ម៉ូដែលថ្មីម្នាក់យកទេពកោសល្យ និងភាពជឿជាក់ បោះជំហានចូលសិល្បៈ