ហួសសម័យហើយ! ដែលថាមនុស្សស្រីពូកែៗ មានចំណូលខ្ពស់តែងអភ័ព្វស្នេហ៍
- 2020-02-29 13:30:00
- ចំនួនមតិ 0 | ចំនួនចែករំលែក 0
ហួសសម័យហើយ! ដែលថាមនុស្សស្រីពូកែៗ មានចំណូលខ្ពស់តែងអភ័ព្វស្នេហ៍
មានឃ្លា១ ដែលមនុស្សសម័យមុនគេច្រើនតែនិយាយលេងបន្លំមែនថា អ្នកក្រមិនហ៊ាន អ្នកមានក៏មិនចូល ដែលសំដៅលើស្ត្រី ដែលមិនងាយមានគូស្រករ។ ចាស់ៗ ឬអ្នកមានកូនស្រីទោល តែងបារម្ភ ច្រើននិយាយដាស់តឿន កុំឲ្យកូនស្រីនៅលាវយូរពេក ឬខ្លាចនាងគ្មានគូ ឬប្ដី ដែលប្រឈមនឹងនៅព្រៅម្នាក់ឯងជាដើម។
ជាការពិតនៅពេលលឺសម្ដីបែបនេះ ជាមនុស្សស្រីទូទៅតែងគិត និងពិចារណាខ្លះ! ប៉ុន្តែសម្រាប់មនុស្សស្រីពូកែៗ នាងមិនសូវខ្វល់ប៉ុន្មាននោះទេ ព្រោះនាងមានគោលដៅច្បាស់លាស់។ រឿងប្ដីសី នាងមិនសូវប្រញាប់ ដរាបណាបុរសល្អដែលត្រូវចិត្តនាង មិនទាន់បង្ហាញមុខ។ ដោយហេតុនេះហើយ គេច្រើនបង្អាប់ថា មនុស្សស្រីបើពូកែពេក មានការងារល្អ ចំណូលខ្ពស់ ច្រើនអភ័ព្វស្នេហ៍ ព្រោះហេតុផល ៣នេះ៖
១. ផ្ដោតលើការងារ
តាមពិតមនុស្សស្រីរឹងមាំបែបនេះ នាងច្រើនតែឆន្ទៈខ្ពស់ គួបផ្សំនឹងការខិតខំប្រឹងប្រែង រហូតរវល់សឹងតែរកពេលសម្រាកមិនចង់បាន ដើម្បីឲ្យខ្លួនឯងមានសមត្ថភាពខ្ពស់។ មនុស្សស្រីដែលមានឱកាសរៀនសូត្រជ្រៅជ្រះ គឺកាន់តែធ្វើឲ្យនាងមានភាពរឹងមាំ និងសមត្ថភាពបំពេញការងារបានល្អ។
ជាទូទៅមនុស្សស្រីពូកែៗ នាងច្រើនតែមានឆន្ទៈខ្ពស់ គួបផ្សំនឹងការខិតខំប្រឹងប្រែង រហូតរវល់សឹងតែរកពេលសម្រាកមិនចង់បាន។ តែយ៉ាងណា ក៏នាងនៅតែមិនធុញទ្រាន់ ដើម្បីឲ្យខ្លួនឯងមានសមត្ថភាពខ្ពស់ អាចកាន់ការងារធំដុំ មិនចាញ់មនុស្សប្រុស។
២. ប៉ិនរកចំណូល
មិនថាជាអ្នកធ្វើការឲ្យគេ ឬមានអាជីវកម្មខ្លួនឯង នារីប្រភេទនេះ តែងមិនទុកពេលវេលាចោលឥតប្រយោជន៍។ នាងរវៀសរវៃរហ័សរហួន និងតែងមានសមត្ថភាព ច្រើនតែចេះឆក់ចាប់ការងារតូច ធំ គ្មានទំនេរដៃ។
ថ្វីត្បិត នាង មិនសូវមានពេលសម្រាក ឬទំនេរដូចគេ តែនាងអាចឆ្លៀតបំពេញការងារ និងបង្កើនចំណូលសម្រាប់ខ្លួនឯងជានិច្ច។ ម្យ៉ាងវិញទៀត នាងតែមានទស្សនៈថា ទៅថ្ងៃមុខ ស្រ្តីគួរមានលំនឹងសេដ្ឋកិច្ចខ្លួនឯងជាមុន។ បន្ទាប់មកបើមានបុរសល្អជាដៃគូ មានលុយចាយមិនអស់ អាច ឬមិនអាចចិញ្ចឹមនាងយ៉ាងណាក៏ដោយ ក៏នាងនៅតែមានចំណូលសម្រាប់ចាយវាយខ្លួនឯងគ្រប់គ្រាន់ មិនមែនចាំលាដៃសុំគេចាយ។
៣. ចង់មានស្នេហាបែបចាស់ទុំ មិនមែនមួយឆាវៗដូចភ្លើងចំបើង
នារីបែបនេះ គ្មានទេពាក្យថា ស្រឡាញ់លេងៗ មួយឆាវ តាមកំសួលនៃអារម្មណ៍ដូចក្មេងស្ទាវ។ នាងប្រហែលជាចាត់ចូលជាប្រភេទមនុស្ស ដែលប្រុសៗ មិនងាយតាមស្រឡាញ់ឲ្យងាយៗ។ ពេលខ្លះអាចពិបាកយល់ចិត្តបន្តិច ក៏ថាបានព្រោះនាងមានលក្ខខណ្ឌផ្ទាល់ខ្លួនប្លែកពីនារីទូទៅ។ ធាតុពិត គឺអាចមកពី នាងមិនសូវបង្ហាញអារម្មណ៍ស្នេហាដាក់បុរសណា ដែលនាងគិតថាមិនសូវទំនង កុំឲ្យខាតពេលអត់បានការ។
ស្ត្រីរឹងមាំ និងមានសមត្ថភាពខ្លាំង នាងសុខចិត្តសង្កេតមើល ច្រើនជាងនិយាយ ធ្វើដូចមិនដឹងរឿង ហើយនាងក៏បន្តចំណាយពេលលើការងារច្រើនដដែល។ ចំណុចនេះ ដែលបុរសដែលបុរសធម្មតាៗ ពិបាកយល់ និងមិនងាយយកឈ្នះបានបេះដូងនាង។ ប៉ុន្តែបើជាប្រភេទបុរសរឹងមាំ ឬមានភ្នែកមុតបន្តិច តែងតែអាចឆក់ឱកាសមាស និងអាចត្រូវនារីពូកែៗ ទទួលយកស្នេហា។
អានបន្ត៖ មុនពេលរៀបការ សូមធ្វើរឿងទាំងនេះសិន ដើម្បីដឹងពីចរិតអាក្រក់របស់គ្នា
អានបន្ត៖ទម្លាប់ទាំង ៧ ជួយឲ្យអ្នកចេះគ្រប់គ្រងលុយយ៉ាងមានប្រសិទ្ធភាព