សាកល្បងវិធីមួយគត់ ជួយឱ្យអ្នកបំភ្លេចមនុស្សម្នាក់បានយ៉ាងមានប្រសិទ្ធភាពបំផុត

2020-02-24 08:00:00
ចំនួនមតិ 0 | ចំនួនចែករំលែក 0

គ្រប់គ្នាតែងធ្លាប់បានជួបប្រទះនូវការបែកបាក់ស្នេហា ឬ ទំនាក់ទំនងមិនសមបំណងជាដើម។ ពេលដែលទំនាក់ទំនងមួយដ៏សែនមានអត្ថន័យសម្រាប់អ្នកបានបញ្ចប់ទៅយ៉ាងផុយស្រួយ វានឹងធ្វើឱ្យអ្នកពិបាកទទួលយកការពិត។ ពេលនោះហើយដែលអ្នកនឹងប្រឈមនូវអារម្មណ៍ខូចចិត្តមួយនេះ។ មនុស្សម្នាក់ៗតែងតែគិតថានៅពេលខ្លួនពិបាកចិត្តគឺត្រូវធ្វើអ្វីៗដែលអាចបន្លប់ខួរក្បាលកុំឱ្យគិត កុំឱ្យនឹកដល់រឿងនោះ។

រូបតំណាង

អ្វីដែលគួរឱ្យខ្លាចអំពីការបាត់បង់ស្នេហានោះគឺអ្នកមិនមែននឹងឃើញរូបគេតែពេលអ្នកពិបាកចិត្តនោះទេ សូម្បីតែពេលដែលអ្នកកំពុងសើចសប្បាយត្រេកអរនោះក៏អាចនឹកឃើញអនុស្សាវរីយ៍របស់អ្នកទាំងពីរភ្លាមៗដែរ។ ភាគច្រើន ក្រោយបាត់បង់ស្នេហា មិនថានារីឬបុរសច្រើនរកនឹកធ្វើរឿងអ្វីដើម្បីឱ្យខ្លួនមើលទៅរវល់ គ្មានពេលគិតរឿងខកចិត្តដែលធ្លាប់កើតឡើង ក៏ប៉ុន្តែពួកគេមិនបានដឹងទេថាការបន្លប់អារម្មណ៍ខ្លួនឯងបែបនេះមិនមែនជាជម្រើសល្អក្នុងការកាត់ចិត្តនោះទេ។

រូបតំណាង

អ្នកខ្លះព្យាយាមបន្លប់អារម្មណ៍ខ្លួនឯងដោយការធ្វើរឿងមួយចំនួនដូចជា ទៅហាត់ប្រាណ មើលកុន ដើរលេងជាមួយមិត្តភក្តិ រាប់អានអ្នកថ្មី ឬ ទៅផឹកសុរាជាដើម ព្រោះពួកគេគិតថាការធ្វើបែបនេះនឹងអាចឱ្យពួកគេបំភ្លេចរឿងរ៉ាវអស់មួយរយៈ។ ផ្ទុយទៅវិញ ពេលអ្នកទំនេរពីសកម្មភាពទាំងនោះ អនុស្សាវរីយ៍ទាំងនោះនឹងផុសឡើងនៅមុខអ្នកទ្វេដងតែម្តង។ វិធីសាស្ត្រដ៏ល្អមួយដែលមិនចាំបាច់ឱ្យអ្នកត្រូវបង្ខំខ្លួនឯងឱ្យធ្វើរឿងដែលលោកអ្នកមិនចង់ ឬ ពិបាកនឹងធ្វើនោះគឺ ការបង្កើតនូវវឌ្ឍនភាពសម្រាប់ខ្លួនឯង។

រូបតំណាង

ជំហានដំបូងក្នុងការកាត់ចិត្តពីរឿងរ៉ាវដែលកន្លងហួសគឺការផ្តោតទៅលើរឿងបច្ចុប្បន្នដែលអាចផ្តល់ប្រយោជន៍ដល់អនាគតរបស់អ្នក។ វឌ្ឍនភាពនេះអាចសំដៅទៅលើភារកិច្ចអ្វីមួយដែលមានសារៈសំខាន់ក្នុងការងារ ឬ ជីវិតរបស់អ្នក ពោលគឺអ្នកគួរយកចិត្តទុកដាក់បំពេញកិច្ចការអ្វីមួយដែលមានអត្ថន័យសម្រាប់អ្នក ហើយពេលដែលអ្នកសម្រេចវាបាន នោះអ្នកនឹងមានអារម្មណ៍ត្រេកអរជាមួយការតាំងចិត្តនិងភាពជោគជ័យរបស់ខ្លួនឯង។ ពេលនោះហើយដែលអ្នកគិតថា អ្នកអាចមានសមត្ថភាពសម្រេចនូវអ្វីដែលសំខាន់ៗបានច្រើន ដូច្នេះទស្សនៈនោះនឹងដាស់តឿនអ្នកថា អ្នកមិនគួរចំណាយធ្វើអ្វីដែលគ្មានប្រយោជន៍សម្រាប់ជីវិតខ្លួនឯងទេ ជាពិសេសការចំណាយពេលឱបក្រសោបរឿងដែលកន្លងហួស និង បុគ្គលដែលបានចាកចេញបាត់ទៅហើយ៕