ប្រពន្ធល្អនឹងមិនទាមទាររឿងទាំងនេះពីប្ដីដាច់ខាត
- 2020-02-19 10:00:00
- ចំនួនមតិ 0 | ចំនួនចែករំលែក 0
ប្រពន្ធល្អនឹងមិនទាមទាររឿងទាំងនេះពីប្ដីដាច់ខាត
ក្រោយរៀបការជាមួយគ្នា ប្ដីប្រពន្ធនឹងត្រូវចែករំលែកការស្រលាញ់ និងការយកចិត្តទុកដាក់ចំពោះគ្នានឹងគ្នា ជាជាងការទាមទារពីគ្នាមិនចេះចប់។ យ៉ាងណាមិញ បើទោះបីចរិតងរង៉ក់ ចង់បានការចាប់អារម្មណ៍ពីអ្នកដែលខ្លួនស្រលាញ់ជាធម្មជាតិរបស់មនុស្សស្រីក៏ដោយ តែក្នុងនាមជាភរិយាល្អ នាងនឹងមិនទាមទាររឿងខាងក្រោមនេះពីស្វាមីដាច់ខាត ព្រោះវានឹងធ្វើឱ្យប៉ះពាល់ដល់សេចក្ដីសុខក្នុងក្រុមគ្រួសារ។
ហាមប្ដីមិនឱ្យមើលស្រីផ្សេងដាច់ខាត
អ្នកណាក៏ដូចអ្នកណាតែងត្រូវទាក់ទាញដោយសម្រស់ និងភាពស្រស់ស្អាតពីមនុស្សផ្ទុយភេទ។ ដូច្នេះបើស្វាមីរបស់អ្នកគ្រាន់តែងាកមើលនារីម្នាក់ដែលស្អាត ឬតែងខ្លួនសិចស៊ី វាមិនមែនជារឿងធំដុំដែលអ្នកត្រូវរករឿង ជេរស្ដី ឬមួលក្ដិចខ្ញាំនៅមុខគេឯងឡើយ។ គួរតែយល់ថា ពេលខ្លះមិនថាតែស្វាមីទេ សូម្បីខ្លួនយើងក៏គង់ចេះចាប់អារម្មណ៍បុរសណាដែលសង្ហា ឡួយឆាយ តែមិនមែនជាការដាក់អារម្មណ៍ត្រូវតែតាមស្រលាញ់ឱ្យបាននោះទេ។ វាគ្រាន់តែជាការទាក់ទាញចំណាប់អារម្មណ៍មួយពេល ហើយក៏បាត់ទៅវិញ ពេលគេដើរហួសទៅប៉ុណ្ណឹងឯង។
ប៉ុន្តែបើស្វាមីរបស់អ្នកជាមនុស្សដែលភ្នែករវាម មាត់ក៏រវាម ឯដៃក៏ដល់ ទើបជាអ្វីដែលអ្នកគួរប្រុងប្រយ័ត្ន និងចេះរកវិធីនិយាយប្រាប់គាត់ពីអារម្មណ៍ពិត ដើម្បីកុំឱ្យប៉ះទង្គិចអារម្មណ៍នៅពេលក្រោយ។
ចុចអាន៖ រឿងសំខាន់ៗដែលប្ដីប្រពន្ធដាច់ខាតត្រូវផ្ដល់ឲ្យគ្នាទៅវិញទៅមក
ទាមទារឱ្យប្ដីត្រូវតែកាន់ជើង ពេលអ្នកឈ្លោះគ្នាជាមួយម្ដាយឬឪពុកក្មេក
ទោះបីគេមិនបាននិយាយ ប៉ុន្តែសម្រាប់គេ សម្រាប់យើង ម្ដាយឪពុកគឺជាមនុស្សសំខាន់បំផុតក្នុងជីវិតដែលមិនចង់ឱ្យអ្នកណាប៉ះពាល់ ឬមើលងាយឡើយ។ ដូច្នេះហើយ បើទោះប្ដីស្រលាញ់អ្នកខ្លាំងយ៉ាងណា សូមកុំព្យាយាមដាក់សម្ពាធគាត់ថាត្រូវតែកាន់ជើង ឬនៅខាងអ្នក ពេលអ្នកមានបញ្ហាជាមួយឪពុកម្ដាយក្មេក ព្រោះវានឹងធ្វើឱ្យគាត់ពិបាកអារកាត់ និងសម្រេចចិត្តឱ្យបានត្រឹមត្រូវ។
បើអ្នកធ្វើខុស ត្រូវទទួលស្គាល់ថាខុស ហើយចេះសុំទោសលោក តែបើអ្នកធ្វើត្រូវ នោះស្វាមីនឹងដឹងថាអ្នកណាត្រូវអ្នកណាខុស ហើយគាត់ក៏អាចជួយដោះស្រាយបញ្ហានេះឱ្យបានចប់ដោយត្រឹមត្រូវដែរ។
ទាមទារមិនឱ្យប្ដីជួបជុំជាមួយមិត្តភក្ដិ
ក្រៅពីពេលវេលាសម្រាប់ក្រុមគ្រួសារ ប្ដីប្រពន្ធក៏ត្រូវការពេលវេលាសម្រាប់ខ្លួនឯង និងអ្នកនៅជុំវិញខ្លួនដែរ។ មិត្តភ័ក្ដិ អ្នករួមការងារ អ្នករៀនថ្នាក់ជាមួយគ្នា ដៃគូរកស៊ី ឬអ្នករាប់អានផ្សេងទៀត គឺជាមិត្តភាពដែលមនុស្សគ្រប់គ្នាត្រូវចំណាយពេលជាមួយខ្លះដើម្បីបំពេញអត្ថន័យជីវិតឱ្យបានរីករាយ។ ដូច្នេះ ក្នុងនាមជាភរិយាល្អ មិនគួរហាមប្រាមប្ដីមិនឱ្យចេញទៅជួបជុំមិត្តភ័ក្ដិ ហើយចំណាយពេល២៤ម៉ោងជាមួយតែគ្រួសារ ប្រពន្ធកូនពេកនោះដែរ។
ការជួបជុំផឹកស៊ី គឺជារឿងធម្មតារបស់បុរសពេលជួបគ្នាយូរៗម្ដង។ រឿងនេះប្រពន្ធក៏គួរយោគយល់ និងបើកចិត្តទូលាយសម្រាប់ប្ដីផងដែរ។ វាអាចជាការជួបជុំដើម្បីសួរសុខទុក្ខគ្នា ពេលខ្លះជាការពិភាក្សាការងារ ពេលខ្លះក៏ជាការបន្ធូរអារម្មណ៍តានតឹងពីការងារ។
ចុចអាន៖ ចង់បាននារីមានមហិច្ឆតាធំធ្វើជាភរិយា បុរសគួរមាន ៨ ចំណុចនេះក្នុងខ្លួនសិន
ទាមទារឱ្យប្ដីត្រូវតែធ្វើឱ្យបានល្អដូចគេផ្សេង
ការដែលត្រូវបានយកខ្លួនទៅប្រៀបធៀបជាមួយអ្នកដទៃ គ្មានអ្នកណាពេញចិត្តនោះទេ។ បើស្រលាញ់ប្ដី នាងមិនត្រូវយកប្ដីរបស់ខ្លួនទៅប្រៀបធៀបនឹងអ្នកនេះ អ្នកនោះ ហើយដាក់កំហិតថាគាត់ត្រូវតែធ្វើឱ្យបានដូចគេឡើយ ព្រោះមនុស្សម្នាក់ៗកើតមកមានចំណុចពិសេសខុសៗគ្នា។ បើឃើញគេល្អ គួរតែចេះរកវិធីនិយាយបង្ហាញឧទាហរណ៍ឱ្យគាត់មើល ឬប្រឹក្សាយោបល់ជាមួយគាត់ ជាជាងបង្ខំគាត់ឱ្យធ្វើតែម្នាក់ឯង។
ទាមទារឱ្យស្វាមីត្រូវតែមានកាដូគ្រប់ឱកាស
កាលពីនៅជាគូស្នេហ៍ គាត់តែងតែមានកាដូជូនអ្នកស្ទើរគ្រប់ពេល មិនថា គម្រប់ខួបនៃការស្រលាញ់គ្នា ថ្ងៃកំណើតអ្នក ថ្ងៃបុណ្យនៃក្ដីស្រលាញ់ បុណ្យណូអែល ឬឱកាសដទៃៗទៀត។ ប៉ុន្តែពេលក្លាយជាប្ដីប្រពន្ធរួមខ្នើយនឹងគ្នាហើយ ហេតុអីត្រូវទាមទារឱ្យគាត់យកចិត្តទុកដាក់ចងចាំថ្ងៃទាំងនោះដូចមុនទៀត? ពេលនេះអ្នកទាំងពីរមិនមែនក្មេងដូចមុនទេ ហើយទំនួលខុសត្រូវក៏លែងធម្មតាដូចមុនដែរ។ អ្នកទាំងពីរ ជាពិសេសស្វាមី ត្រូវមានទំនួលខុសត្រូវធំណាស់ដើម្បីរកប្រាក់ចិញ្ចឹមគ្រួសារមួយនេះ និងផ្ដល់ភាពកក់ក្ដៅសម្រាប់អ្នកនិងកូនៗ។
មួយវិញទៀត កុំយកអតីតកាលមករម្លឹកថា ហេតុអីកាលមិនទាន់រៀបការចេះទិញនេះទិញនោះឱ្យ ហើយរៀបការហើយបែរឈប់ទិញ ព្រោះវានឹងធ្វើឱ្យអ្នកទាំងពីរប៉ះទង្គិចគ្នា ហើយម្យ៉ាងទៀត ការស្រលាញ់មិនមែនអាស្រ័យលើកាដូ ឬអនុស្សាវរីយ៍ពីមុនៗទេ វាអាស្រ័យលើសកម្មភាពបច្ចុប្បន្នទៅវិញទេ។
អ្វីដែលលើកឡើងខាងលើនេះ សុទ្ធតែជារឿងដែលសូវចាំបាច់សម្រាប់បំពេញនិយមន័យនៃពាក្យសុភមង្គលគ្រួសារឡើយ។ ជំនួសឱ្យការទាមទារទាំងនេះ អ្នកគួរតែនឹកឃើញដល់សកម្មភាពល្អៗរបស់គាត់កន្លងមក ដូចជា គាត់សុខចិត្តធ្វើម្ហូប ពេលអ្នកត្អូញថាអស់កម្លាំង ឬឈឺ ពេលគាត់សុខចិត្តជិះទៅទិញថ្នាំ ពេលអ្នកឈឺ គាត់ពាក់មួកការពារ និងកិបគន្លឹះឱ្យអ្នក ពេលដៃអ្នកកំពុងជាប់កាន់របស់ ពេលគាត់មកពីហត់ ហើយនៅតែញញឹម និងឱបអ្នកជាដើម។ វាទើបជាការស្រលាញ់ពិតប្រាកដ ដូច្នេះមិនចាំបាច់មានរឿងខាងលើក៏បានដែរ៕