ស្នេហានៅកន្លែងការងារមិនស្រួលទេណា៎! បើមិនចេះបែងចែក គូស្នេហ៍អាចនឹងប្រឈមមុខនឹងបញ្ហាទាំងនេះ

2020-02-13 09:25:00
ចំនួនមតិ 0 | ចំនួនចែករំលែក 0

មនុស្សភាគច្រើនតែងលង់ស្រឡាញ់មនុស្សដែលខ្លួនឧស្សាហ៍ជួប ឬ ចំណាយពេលជាមួយ ជាពិសេស មនុស្សដែលធ្វើការជាមួយគ្នាតែម្តង។ ថ្វីត្បិតតែការជួបមុខគ្នារាល់ថ្ងៃផ្តល់នូវភាពសប្បាយរីករាយដល់អ្នកទាំងពីរក៏ពិតមែន តែវាក៏មានផលវិបាករបស់វាដូចគ្នា។ អ្នកខ្លះពេញចិត្តនឹងមានទំនាក់ទំនងស្នេហាជាមួយមនុស្សដែលជួបមុខគ្នារាល់ថ្ងៃនៅកន្លែងការងារ ឯអ្នកខ្លះមិនចង់ឱ្យវាកើតឡើងនោះឡើយ ដោយសារតែហេតុផលមួយចំនួន រួមមាន៖

១. អាចប៉ះពាល់ដល់ការងាររៀងខ្លួន

រូបតំណាង

ស្ថាប័នភាគច្រើនមិនជម្រុញឱ្យបុគ្គលិកដែលធ្វើការកន្លែងរួមគ្នាផ្តើមមានទំនាក់ទំនងស្នេហាឡើយ។ ហេតុផលចម្បងដែលគេមិនចង់ឱ្យមានគូស្នេហ៍នៅកន្លែងការងារគឺព្រោះតែគេខ្លាចទំនាក់ទំនងរវាងអ្នកទាំងពីរអាចមានការប៉ះទង្គិចដល់សមិទ្ធផលការងាររៀងខ្លួន។ សម្រាប់អ្នកដែលគាត់ចេះបែងចែកអារម្មណ៍ផ្ទាល់ខ្លួន និង ការងារឱ្យដាច់ស្រេចពីគ្នា គឺមិនសូវជួបប្រទះនូវបញ្ហានេះប៉ុន្មានទេ តែផ្ទុយទៅវិញ សម្រាប់អ្នកងាយបែកចែកអារម្មណ៍វិញនោះ គឺអាចប៉ះពាល់ខ្លាំងដល់ការងាររបស់ខ្លួន។

២. មិនសូវមានសេរីភាពគ្រប់គ្រាន់

រូបតំណាង

មនុស្សមួយចំនួនចូលចិត្តឱ្យដៃគូរបស់ខ្លួននៅក្បែរ និង យកចិត្តទុកដាក់គ្រប់ពេលវេលា ប៉ុន្តែសម្រាប់អ្នកដែលចូលចិត្តសេរីភាពផ្ទាល់ខ្លួន គេច្រើនមិនចង់ប្រាថ្នាបែបនេះឡើយ ព្រោះពួកគេគិតថានឹងប៉ះពាល់ដល់សេរីភាព និង ការរស់នៅប្រចាំថ្ងៃរបស់ពួកគេពេក។ យ៉ាងណាមិញ បើអ្នកនឹងដៃគូ ជាមនុស្សដែលចេះយល់ពីគ្នា និង ផ្តល់សេរីភាពដល់គ្នាបានគ្រប់គ្រាន់ អ្នកប្រហែលជាអាចគេចផុតពីការប្រឈមមុខនឹងបញ្ហាមួយនេះ។

៣. ជួបគ្នាញឹកញាប់ពេក

រូបតំណាង

ការជួបមុខគ្នាជាមួយដៃគូជារឿងល្អសម្រាប់ដៃគូទាំងសងខាង ក៏ប៉ុន្តែការជួបមុខគ្នាញឹកញាប់ខ្លាំងពេកក៏មិនល្អប៉ុន្មានដែរ។ ការជួបគ្នារាល់ថ្ងៃ និង គ្រប់ពេលវេលាពេកអាចធ្វើឱ្យដៃគូទាំងសងខាងមិនសូវមានការរំភើបក្នុងការជួបចំណាយពេលជាមួយគ្នាប៉ុន្មានឡើយ។

៤. ប៉ះពាល់ដល់អ្នកធ្វើការជាមួយ

រូបតំណាង

ជួនកាលរឿងរបស់មនុស្ស២រូបអាចធ្វើឱ្យប៉ះពាល់ដល់អារម្មណ៍ និងការងាររបស់អ្នកធ្វើការរួមគ្នាជាមួយពួកគេ។ ពេលគូស្នេហ៍បញ្ចេញនូវមនោសញ្ចេតនា ឬ កាយវិការផ្អែមល្ហែមខ្លាំងពេកក៏អាចប៉ះពាល់ដល់គេឯងដែលនៅជុំវិញខ្លួន ហើយការដែលគូស្នេហ៍ឈ្លោះប្រកែកគ្នានៅកន្លែងការងារក៏រឹតតែរំខានដល់អ្នកដទៃ។

សរុបសេចក្តីមក ការមានទំនាក់ទំនងស្នេហាជាមួយដៃគូដែលស្ថិតនៅក្នុងស្ថាប័នការងារតែមួយគឺល្អម៉្យាងសម្រាប់អ្នកទាំងពីរ តែក៏មានផលវិបាកមួយចំនួនរបស់វាដូចគ្នា។ យ៉ាងណាមិញ បើដៃគូទាំងសងខាងជាមនុស្សដែលអាចបែងចែករវាងជីវិតនៅកន្លែងការងារ និង ខាងក្រៅបានល្អ ពួកគេក៏មិនងាយនឹងជួបប្រទះនឹងបញ្ហាទាំងអស់នោះដែរ៕