ថ្នាំវេទមន្តដែលអ្នកជ្រើសរើស អាចបញ្ជាក់ពីអ្វីដែលចិត្តរបស់អ្នកកំពុងតែចង់បានបំផុត

2020-01-30 07:10:00
ចំនួនមតិ 0 | ចំនួនចែករំលែក 0

ខាងក្រោមនេះគឺជារូបភាពថ្នាំវេទមន្ត ៥ ប្រភេទដែលមានមុខងារផ្សេងគ្នាៗ សម្រាប់ឲ្យអ្នកជ្រើសរើស ដើម្បីធ្វើការពិសោធទៅលើអ្វី ដែលចិត្តរបស់អ្នកកំពុងតែចង់បានបំផុត។ ចូរសន្មតថា បន្ទាប់ពីផឹករួច វាពិតជាស័ក្ដិសិទ្ធិ អាចជួយសម្រេចបំណងប្រាថ្នារបស់អ្នក ដូច្នេះហើយតើអ្នកនឹងយកមួយណា?

ដបទី១៖ ថ្នាំវេទមន្តពណ៌បៃតង អាចជួយឲ្យអ្នកមានវ័យក្មេងរៀងរហូត

បើអ្នកជ្រើសរើសដបទី១នេះ មានន័យថា អ្នកកំពុងតែចង់កែប្រែបញ្ហាទាំងអស់នាពេលអតីតកាល ឲ្យមានភាពល្អប្រសើរឡើងវិញ។ ម្យ៉ាងវិញទៀត ការចង់ឲ្យខ្លួនឯងនៅក្មេងរហូត ព្រោះអ្នកមានបំណងចង់ស្វែងរកផ្លូវ ដើម្បីត្រលប់ទៅប្រើជីវិតរស់នៅក្នុងពេលអតីតកាល ឲ្យបានត្រឹមត្រូវប្រកប ដោយសុភមង្គល ថែមទាំងអាចសម្រេចចិត្តនិងធ្វើការជ្រើសរើសវិថីជីវិតមួយផ្សេងទៀត ដែលផ្ទុយគ្នាពីសព្វថ្ងៃ។

យ៉ាងណាក៏ដោយ អ្វីៗនៅមិនទាន់ហួសពេលនៅឡើយទេ ប្រសិនបើអ្នកចង់ជ្រើសរើសផ្លូវផ្សេងសម្រាប់ជីវិត គួរចាប់ផ្តើមពីឥលូវនេះតទៅ។ មានឱកាសល្អៗជាច្រើនកំពុងតែរង់ចាំអ្នក ព្យាយាមឲ្យដល់ទីបំផុត អ្នកប្រាកដជាអាចឈានទៅដល់គោលដៅមិនខាន។

ឃ្លាដែលគួរចងចាំទុក៖ "មេរៀនដែលមិនអាចកាត់ថ្លៃបាន គឺការរៀនសូត្រស្វែងយល់ពីកំហុស។ កំហុសអតីតកាលប្រៀបបានដូចជាពន្លឺដើម្បីជួយឲ្យអ្នកជោគជ័យទៅថ្ងៃអនាគត”។

ដបទី២៖ ថ្នាំវេទមន្តពណ៌ខៀវ អាចធ្វើឲ្យអ្នកដកដង្ហើមក្នុងទឹកបាន

ជម្រើសមួយនេះ ហាក់បីដូចជាអ្នកកំពុងចង់តែចង់ក្លាយជាមច្ឆារស់នៅក្នុងទឹក ដើម្បីគេចវេះពីមនុស្សលោក។ ទំនាក់ទំនងក្លែងក្លាយ រួមទាំងបញ្ហានានា ដែលអ្នកខំលះបង់តតាំងជាមួយ ពិតជាធ្វើឲ្យអ្នកហត់នឿយធុញទ្រាន់ខ្លាំងណាស់។ ហេតុនេះហើយទើបបានជាអ្នក សុខចិត្តជ្រើសរើសរស់នៅក្នុងទឹក ដើម្បីនៅឲ្យឆ្ងាយពីមនុស្ស និងមិនចង់ឲ្យមានការរំខាន។

ឃ្លាដែលគួរចងចាំទុក៖ "អ្វីៗនឹងល្អប្រសើរឡើងមិនគួរឲ្យជឿ ប្រសិនបើអ្នកព្យាយាមនៅឲ្យឆ្ងាយពីប្រភេទមនុស្សពិសពុល”។

ដបទី៣៖ ថ្នាំវេទមន្តពណ៌ខ្មៅ អាចធ្វើឲ្យបំបាំងកាយបាន

វាជាថ្នាំវេទមន្តដែលអាចជួយបំបាំងកាយបានគ្រប់ពេលដែលអ្នកចង់។ អ្នកអាចដេក ដើរ និងធ្វើអ្វីៗគ្រប់បែបយ៉ាង ដោយគ្មាននរណាមើលឃើញ។ នេះអាចបណ្តាលមកពីអ្នកខ្វះទំនុកចិត្ត មិនជឿជាក់លើអ្វីដែលខ្លួនបានជ្រើសរើស ឬបានទទួលរងសម្ពាធពីរបត់សង្គមដែលកំពុងតែរស់នៅសព្វថ្ងៃ។ ទាំងនេះហើយទើបបានជាអ្នករើសយកថ្នាំវេទមន្តពណ៌ខ្មៅ ដែលអាចផ្ដល់ពេលវេលាគ្រប់គ្រាន់សម្រាប់ធ្វើអ្វីដែលខ្លួនចង់ធ្វើឲ្យសប្បាយរីករាយដោយមិនខ្វល់ពីគំនិតឬពាក្យរិះគន់របស់អ្នកដទៃ។

ឃ្លាដែលគួរចងចាំទុក៖ "បង្កើនភាពជឿជាក់លើខ្លួនឯង បន្តគំនិតវិជ្ជមាន ទើបគំនិតអ្នកដទៃមិនអាចជះឥទ្ធិពលមកលើអ្នកបាន”។

ដបទី៤៖ ថ្នាំវេទមន្តពណ៌ក្រហម អាចធ្វើឲ្យអ្នកមានថាមពលពន្លត់ភ្លើង

បើដបទី៤ ជាជម្រើសរបស់អ្នកមានន័យថា អ្នកគឺជាមនុស្សដែលមានចិត្តគំនិតរឹងមាំខ្លាំងខ្លាប្រៀបបានដូចជាភ្លើង។ សមត្ថភាពអាចពន្លត់ភ្លើងដែលអ្នកចង់បាន ដោយសារតែអ្នកចង់គ្រប់គ្រងអារម្មណ៍ ក្តីស្រលាញ់ ភាពឆេវឆាវ ដែលបានឆាបឆួលនៅក្នុងខ្លួនមិនចេះចប់មិនចេះហើយ។ ពេលខ្លះចង់បញ្ឈប់ចិត្តកុំឲ្យនឹកគិតដល់មនុស្សដែលមិនគួរ ក៏មិនអាចធ្វើបាន ទើបបង្កទៅជាផលលំបាកសម្រាប់អ្នក។

ឃ្លាដែលគួរចងចាំទុក៖ "កុំបណ្តោយឲ្យអារម្មណ៍មួយឆាវមករារាំងបង្អាក់ផ្លូវរបស់អ្នក គួរយកការគិតនិងហេតុផលជាធំ ទើបអាចទៅដល់គោលដៅពិតប្រាកដ”។

ដបទី៥៖ ថ្នាំវេទមន្តពណ៌ស្វាយ អាចឲ្យអ្នកដើរលេងគ្រប់ទិសទី

មិនថាទៅដល់ទីណា ទោះជានៅភពផ្សេងក៏អ្នកអាចជប់បានទៅដល់ភ្លាម។ មូលហេតុដែលអ្នកជ្រើសរើសដបចុងក្រោយនេះ គឺដោយសារតែអ្នកបានដឹងពីគោលបំណងពិតប្រាកដដែលខ្លួនចង់បាននៅក្នុងជីវិត។ អ្នកមានភាពច្បាស់លាស់នឹងជម្រើសរបស់ខ្លួន គ្រាន់តែពេលខ្លះហាក់ដូចជាខ្វះភាពជាដៃគូ ឬកម្លាំងថាមពល។ លើសពីនេះទៅទៀត អ្នកចង់ចំណាយពេលបន្ថែម ធ្វើដំណើរទៅគ្រប់ទីកន្លែង ដើម្បីវាយតម្លៃនិងស្គាល់ពីខ្លួនឯងឲ្យកាន់តែច្បាស់ជាងមុន។

ឃ្លាដែលគួរចងចាំទុក៖ "ដំណើរផ្សងព្រេងទាំងអស់ដែលអ្នកបានឆ្លងកាត់ ត្រូវរក្សាទុកជាបទពិសោធល្អៗសម្រាប់ខ្លួនឯងនិងអ្នកដទៃ ហើយកុំភ្លេចស្វែងរកអ្វីដែលជាចំណង់ចំណូលចិត្តពិតប្រាកដ"។

ចុះអ្នកវិញ ចង់បានដបវេទមន្តមួយណាជាងគេ?

ចុចអានបន្ត៖ ល្បងប្រាជ្ញា៖ តើកាហ្វេនឹងចូលទៅពែងមួយណាមុនគេ?

ប្រភព៖ themindsjournal ប្រែសម្រួល៖ ដេត ឈុនអ៉ី