គន្លឹះសំខាន់ៗទាំង៥ អាចយករាងស្អាតមកវិញ ក្រោយពេលសម្រាលកូន

2020-01-20 08:00:00
ចំនួនមតិ 0 | ចំនួនចែករំលែក 0

នារីធ្លាប់មានបុត្រប្រាកដជាដឹងស្រាប់ហើយថា ក្រោយពេលសម្រាលកូន វាពិតជាមានការលំបាកក្នុងការធ្វើឱ្យរាងរបស់អ្នកត្រឡប់មកដូចមុនពេលមានកូនវិញ ព្រោះក្នុងកំឡុងពេលពពោះ នារីច្រើនទទួលរងនូវការឡើងទម្ងន់ជាលំដាប់ ដែលមិនងាយក្នុងការសម្រកមកវិញឡើយ។ យ៉ាងណាមិញ វាមិនមែនជាកង្វល់ទៀតឡើយ ប្រសិនបើអ្នកអាចអនុវត្តនូវគន្លឹះរក្សារាងទាំងនេះ ក្រោយពេលសម្រាលកូនរួច៖

១. ព្យាយាមឱ្យទារកបៅទឹកដោះ

រូបតំណាង

ការបំបៅទឹកដោះដល់កូនមិនត្រឹមតែល្អសម្រាប់សុខភាពទារកទេ ថែមទាំងល្អសម្រាប់ស្ត្រីជាម្តាយ។ វាជួយឱ្យរាងកាយរបស់ពួកគេមានការងាយស្រួលជាងមុនក្នុងការសម្រកទម្ងន់ ពីព្រោះជាតិខ្លាញ់មួយចំនួនធំត្រូវបានរំលាយដើម្បីផលិតជាទឹកដោះសម្រាប់ទារកបៅ។ នេះហើយជាមូលហេតុដែលការបំបៅកូនដោយទឹកដោះគឺ មានគុណប្រយោជន៍សម្រាប់ផ្តល់នូវសារជាតិចិញ្ចឹមដល់ទារកផង និង ជួយម្តាយក្នុងការសម្រកទម្ងន់ រក្សារាងរបស់ខ្លួនផង។

២. ឧស្សាហ៍ធ្វើចលនារាងកាយ

រូបតំណាង

ក្រោយពេលអ្នកសម្រាលកូនបានមួយរយៈ ហើយអ្នកអាចប្រមូលផ្តុំកម្លាំងវិញបានច្រើន អ្នកគួរតែចាប់ផ្តើមធ្វើចលនារាងកាយឡើងវិញដែលរួមមាន ការពរកូនដើរលេង ឬ ធ្វើកិច្ចការផ្ទះជាដើម។ ការធ្វើចលនារាងកាយអាចជួយជម្រុញដល់ការរំលាយអាហារ អាចឱ្យអាហាររំលាយបានលឿន ដូច្នេះវាអាចមានការងាយស្រួលក្នុងការសម្រករាងជាងអ្នកដែលគាត់មិនបញ្ចេញចលនារាងកាយសោះ។

៣. ធ្វើលំហាត់ប្រាណ

រូបតំណាង

ម្តាយដែលសម្រាលកូនដោយធម្មជាតិអាចចាប់ផ្តើមហាត់ប្រាណបានក្រោយពេលសម្រាល ២ទៅ៣ថ្ងៃ ឬ អ្នកខ្លះអាចចាប់ផ្តើមបានក្រោយ ២០ថ្ងៃក៏បានដែរ។ សម្រាប់ក្បាច់ហាត់ អ្នកត្រូវពិគ្រោះជាមួយអ្នកជំនាញឱ្យបានត្រឹមត្រូវសិន ឬ អាចជ្រើសរើសហាត់ដោយខ្លួនឯងដោយធ្វើការអនុវត្តតែក្បាច់ណាងាយៗតែប៉ុណ្ណោះ។

៤. ត្រូវលៃលករបបអាហារឱ្យបានត្រឹមត្រូវ

រូបតំណាង

ការសម្រកទម្ងន់មិនមែនត្រូវតែបង្អត់អាហារនោះទេ ជាពិសេសគឺសម្រាប់ស្ត្រីកូនខ្ចី ពីព្រោះអាចប៉ះពាល់ដល់សុខភាពខ្លួនឯង ព្រមទាំងកូនដែលបំបៅទឹកដោះ។ ដូច្នេះ ជំនួសការបង្អត់អាហារទៅជាការបរិភោគក្នុងកម្រិតល្មម និង ជាពិសេសបរិភោគអាហារសុខភាពវិញទើបប្រសើរ។

៥. ពិសារទឹកឱ្យបានច្រើន

រូបតំណាង

ការផឹកទឹកបានច្រើនក៏ជាកត្តាមួយដ៏សំខាន់ក្នុងការសម្រករាងដែរ។ ទឹកអាចជួយពន្លឿនល្បឿននៃការរំលាយអាហារ និង ប្រព័ន្ធសំខាន់ៗនៅក្នុងរាងកាយដែលជួយដល់ការរំលាយជាតិខ្លាញ់ក្នុងខ្លួនជាដើម។ ដូច្នេះ វិធីនេះអាចជាវិធីដែលងាយស្រួលជាងគេក្នុងចំណោមវិធីទាំងអស់ ហើយក៏មានប្រសិទ្ធភាពខ្ពស់ផងដែរ។

នារីជាម្តាយដែលកំពុងជួបប្រទះនូវវិបត្តិនៃការសម្រកទម្ងន់ សម្រករាង ឱ្យត្រឡប់ទៅដូចជាកាលពីមុនសម្រាលកូន សូមកុំស្ទាក់ស្ទើរក្នុងការសាកល្បងអនុវត្តនូវគន្លឹះសំខាន់ៗខាងលើ ព្រោះថារូបរាងគឺ ពិតជាមានសារៈសំខាន់សម្រាប់នារីគ្រប់រូប។ ដូចនេះ មិនថាស្ថិតក្នុងកាលៈទេសៈណា បើអាចជួយស្តាឡើងវិញនូវភាពជឿជាក់របស់ខ្លួនមកវិញបាន អ្នកគួរធ្វើដើម្បីខ្លួនឯង៕