ឡូយហួសស្មាន! យូហ្គា ៧ក្បាច់ នេះមានគុណប្រយោជន៍ដល់សុខភាពដល់ម្លឹង

2019-12-18 06:35:00
ចំនួនមតិ 0 | ចំនួនចែករំលែក 0

ដូចដែលគ្រប់គ្នាបានដឹងស្រាប់ហើយថា យូហ្គាមានអត្ថប្រយោជន៍ជាច្រើនដល់សុខភាព និង សម្រស់។ អ្នកខ្លះជ្រើសរើសហាត់យូហ្គាដើម្បីសុខភាព ឯអ្នកខ្លះទៀតហាត់ក្នុងបំណងរក្សារាង ឬ សម្រកទម្ងន់ជាដើម។ គួរបញ្ចាក់ផងដែរថា ក្នុងនោះមានក្បាច់យូហ្គាមួយចំនួនដែលមានអត្ថប្រយោជន៍ដល់ការសម្រួលនូវចរន្តឈាម បំបាត់ការស្រ្តេស និង ជួយក្នុងការរក្សារាងបានយ៉ាងល្អ រួមមាន៖

១. ក្បាច់ Downward-Facing Dog

រូបតំណាង

សម្រាប់ក្បាច់នេះ អ្នកគួរហាត់ពេលព្រឹកមុនទទួលទានអាហារពេលព្រឹក ហើយ ពត់ក្បាច់នេះរយៈពេល ១-៣ នាទីឱ្យជាប់។ វាជួយសម្រួលចរន្តឈាម ព្រមទាំងធ្វើឱ្យឈាមរត់ចូលផ្នែកខួរក្បាល។ លើសពីនេះទៀត វាជួយសម្រួលដល់ការរំលាយអាហារ ជួយពន្លាតឆ្អឹងក និង ឆ្អឹងខ្នង ហើយ កាត់បន្ថយការស្រ្តេស ដោយជួយសម្រួលនូវភាពតានតឹងនៃខួរក្បាល។

២. ក្បាច់ Standing Forward Bend

រូបតំណាង

ក្បាច់នេះអាចជួយសម្រួលដល់ផ្លូវអារម្មណ៍បានច្រើន បើអ្នកអាចពត់បានពី ១៥-៣០វិនាទី។ យកល្អអ្នកគួរហាត់ពេលព្រឹកពេល ពោះទទេ ឬ ក៏ពេលល្ងាចក្រោយទទួលទានអាហារពី ៤-៦ម៉ោង។ ក្បាច់់នេះជួយផ្តល់ថាមពលដល់កោសិកាខួរក្បាល ជួយបំបាត់ការឈឺក្បាល និង ការគេងមិនលក់ជាដើម។ មិនថែមតែប៉ុណ្នោះ វាថែមទាំងជួយសម្រួលដល់បញ្ហាទល់លាមកទៀតផង។

៣. ក្បាច់ Camel Pose

រូបតំណាង

ការហាត់ Camel Pose ៣០-៦០វិនាទី ជួយផ្តល់នូវជំហរាងកាយល្អ និង ធ្វើឱ្យរាងកាយមានភាពរឹងមាំ។ បន្ថែមពីនេះ វាក៏ជួយឱ្យអ្នកបើកចំហដើមទ្រូង ដើម្បីបញ្ចេញនូវកង្វល់ និង ស្រ្តេសទាំងឡាយឱ្យចេញមកខាងក្រៅផងដែរ។ អ្នកអាចហាត់វាពេលព្រឹកព្រលឹមដើម្បីទទួលបានលទ្ធផលគាប់ចិត្ត។

៤. ក្បាច់ Thunderbolt Pose ឬ Diamond Pose

រូបតំណាង

គេហៅវាថាជា ក្បាច់គ្រាប់ពេជ្រ ព្រោះវាជួយឱ្យរាងកាយរបស់អ្នករឹងមាំដូចគ្រាប់ពេជ្រអ៊ីចឹង។ យ៉ាងណាមិញ អ្នកគួរហាត់ក្បាច់នេះរយៈពេលពី ៥-១០នាទី យ៉ាងតិច ដើម្បីឱ្យវាមានប្រសិទ្ធភាព។ វាជួយឱ្យខួរក្បាលមានភាពនឹងនរ កាត់បន្ថយជាតិខ្លាញ់ និង ស្រ្តេសផងដែរ។ មិនតែប៉ុណ្នោះ វាជួយដល់ភាពមិនប្រក្រតីនៅក្នុងពោះ សម្រួលចរន្តឈាម និង ជួយឱ្យសាច់ដុំរឹងមាំ។

៥. ក្បាច់ឈរលើស្មា ឬ Shoulder Stand

រូបតំណាង

ក្បាច់ឈរលើស្មានេះ គួរហាត់នូវពេលព្រឹកព្រលឹមដូចក្បាច់ដទៃទៀតដែរ ហើយគួរពត់វារយៈពេលពី ៣០ទៅ៦០វិនាទីឱ្យជាប់។ ក្បាច់នេះជួយសម្រួលដល់ស្មារតី បំបាត់ការស្រ្តេស ជួយពន្លាតក និង ស្មា ធ្វើឱ្យរាងកាយអ្នកមានភាពសកម្ម និង មិនមានការឈឺ ចុក រោយនានា។

៦. ក្បាច់បញ្ចេញខ្យល់ ឬ Wind Relieving

រូបតំណាង

ក្បាច់នេះគឺមានភាពងាយស្រួលសម្រាប់អ្នកទើបចាប់ផ្តើមហាត់ ហើយ បើអាចហាត់ពេលព្រឹកគឺល្អខ្លាំងព្រោះវាបញ្ចេញនូវខ្យល់ទាំងឡាយដែលស្ថិតនៅក្នុងពោះ បំបាត់បញ្ហាទល់ខ្យល់ ត្រឹមតែការហាត់ក្នុងរយៈពេលពី ៣០-៦០វិនាទី។ វាជួយសម្រួលដល់សរីរាង្គក្នុងរាងកាយ ជាពិសេសគឺផ្នែកពោះវៀន និង ផ្នែកខាងក្រោមនៃខ្នង ព្រមទាំងជួយឱ្យចរន្តឈាមដើរល្អ និង ជួយសម្រកខ្លាញ់ក្បាលពោះទៀតផង។

៧. ក្បាច់ឈរលើក្បាល ឬ Headstand Pose

រូបតំណាង

ក្បាច់ឈរលើក្បាលនេះ គឺមានការលំបាកក្នុងការធ្វើ ហើយ ច្រើនតែអ្នកដែលហាត់ច្រើនឆ្នាំទើបអាចធ្វើបាន ព្រោះត្រូវការទាំងកម្លាំង ទាំងលំនឹង និង តិចនិក។ បើទប់ជាប់បានប្រមាណ ១-៥នាទី អ្នកនឹងទទួលបានអត្ថប្រយោជន៍របស់វាកាន់តែច្រើន។ ក្បាច់នេះ ជួយបន្ធូរអារម្មណ៍ ដោយកាត់បន្ថយភាពតានតឹងនៅក្នុងខួរក្បាល។ វាក៏ជួយឱ្យឈាមរត់ចូលស្បែកក្បាល ជួយឱ្យសាច់ដុំរឹងមាំ និង សម្រួលដល់ស្មារតីទាំងមូលតែម្តង។ ជាពិសេសទៅទៀត ក្បាច់នេះជួយសម្រួលដល់ក្រពេញទីរ៉ួអ៊ីត និង កាត់បន្ថយនូវភាពល្ហិតល្ហៃនៅក្នុងខ្លួនផងដែរ៕

អានបន្ត៖ ផ្លែឈើ ៥មុខ ដែលគួរចៀសវាង ប្រសិនបើអ្នកចង់សម្រកទម្ងន់ ឬ រក្សារាង

ប្រភព៖ Stylecraze ប្រែសម្រួល៖ Siyou Tang