ស្ទើរតែគ្មានខុស! លាតត្រដាងចរិតពិតតាមរយៈការច្របាច់ថ្នាំដុសធ្មេញ

2019-11-14 06:00:00
ចំនួនមតិ 0 | ចំនួនចែករំលែក 0

អ្នកអាចនឹងភ្ញាក់ផ្អើល ឬហួសចិត្តពេលប្រាប់ថា គ្រាន់តែរបៀបប្រើនិងច្របាច់ថ្នាំដុសធ្មេញដែលអ្នកប្រើប្រចាំថ្ងៃសោះ ក៏អាចលាតត្រដាងចរិតពិតប្រាកដរបស់អ្នកបាន។ ពិតណាស់ គ្រប់ទង្វើនិងទម្លាប់ដែលយើងធ្វើជារៀងរាល់ថ្ងៃសុទ្ធតែបង្ហាញពីចរិតលក្ខណៈពិសេសរបស់មនុស្សម្នាក់ៗដោយឡែកៗពីគ្នា។ បើអ៊ីចឹង ចង់ដឹងថាវិធីនៃការច្របាច់ថ្នាំដុសធ្មេញអាចទាយពីខ្លួនអ្នកត្រូវបានកម្រិតណានោះ មកសាកល្បងអានចំណុចខាងក្រោមនេះទាំងអស់គ្នា៖

១. ច្របាច់ពីគូទក្រោមឡើងទៅលើ៖

អ្នកជាមនុស្សពូកែសន្សំសំចៃ និងរៀបរយល្អ។ អ្នកមិនត្រឹមតែផ្ដោតលើរបស់ដែលនៅជុំវិញខ្លួនប៉ុណ្ណោះទេ តែថែមទាំងឱ្យតម្លៃរបស់និងមនុស្សទាំងនោះទៀតផង។ អ្នកជាមនុស្សដែលតែងពិចារណាបានល្អិតល្អន់មុនសម្រេចចិត្តធ្វើអ្វីមួយ មិនថាទិញអ្វី បោះចោលអ្វី ជាពិសេសការចាយវាយ។ លក្ខណសម្បត្តិរបស់អ្នកនេះហើយដែលតែងធ្វើឱ្យអ្នកដទៃចូលចិត្តមកពឹងពាក់រូបអ្នក ហើយក៏មិនដែលអស់សង្ឃឹមដោយសារតែរូបអ្នកដែរ។

២. ច្របាច់ពីពាក់កណ្ដាលទីបទៅ៖

អ្នកជាមនុស្សសកម្ម មិនចូលចិត្តនៅមួយកន្លែង និងមានសមត្ថភាពអាចរស់បានមិនថាក្នុងកាលៈទេសៈលំបាកយ៉ាងណាឡើយ។ ហេតុនេះហើយទើបអ្នកមានពួកម៉ាកនិងមនុស្សស្រលាញ់រាប់អានគ្រប់ទីកន្លែង។ និយាយឱ្យខ្លី អ្នកជាមនុស្សដែលចូលចិត្តចូលក្នុងសង្គម ជួបមនុស្សដែលនៅខាងក្រៅឱ្យបានស្គាល់គេស្គាល់ឯង និងចេះបែងចែកសមតុល្យរវាងជីវិតនិងអារម្មណ៍បានយ៉ាងល្អ។

៣. ច្របាច់តែផ្នែកខាងលើ៖

អ្នកជាមនុស្សចចេសរឹងរូស តែចិត្តចង់ធ្វើអ្វីហើយគ្មានអ្នកណាអាចហាមឃាត់បានឡើយ ហើយមិនថាត្រូវចំណាយអ្វីក៏ដោយ ត្រូវតែធ្វើរឿងនោះឱ្យសម្រេចឱ្យបាន។ អ្នកទំនងជាមនុស្សសុទិដ្ឋិនិយម តែមិនសូវទុកចិត្តអ្នកណាងាយៗឡើយ។ អ្នកចូលចិត្តពឹងផ្អែកលើខ្លួនឯង ជាងពឹងអ្នកដទៃ ស្រលាញ់ខ្លួនឯងច្រើន និងចេះមើលថែខ្លួនឯងបានយ៉ាងល្អ។ ទោះជាយ៉ាងណា អ្នកមានចំណុចអវិជ្ជមានមួយគឺពេលខ្លះដែលអ្នកចង់សម្រេចបំណងពេក អាចក្លាយជាមនុស្សអាត្មានិយម ឬហ៊ានប្រើប្រាស់អ្នកដទៃដើម្បីជោគជ័យខ្លួនឯង។

៤. ច្របាច់ដោយមិនឱ្យខូចទ្រង់ទ្រាយដើម៖

អ្នកជាមនុស្សដែលចូលចិត្តនៅតែម្នាក់ឯង ជាងនៅកន្លែងអ៊ូអរ គ្នាច្រើន។ មនុស្សបែបនេះច្រើនតែមានក្ដីស្រមៃចង់ក្លាយជាអ្នកសិល្បៈ ឬអ្នកដែលប្រើគំនិតច្នៃប្រឌិតធ្វើអ្វីមួយ។ អ្នកជាមនុស្សសុភាពរាបសា ទន់ភ្លន់ និងចេះខ្វល់ខ្វាយពីអ្នកដទៃ គ្រាន់តែមិនសូវចង់អ៊ូអរជាមួយគេ។ អ្នកតែងតែមានគំនិតល្អៗ និងចង់ចែករំលែកជាមួយមនុស្សដែលអ្នកស្គាល់ផងដែរ។

៥. ច្របាច់តែតាពាស៖

អ្នកជាមនុស្សដែលចូលចិត្តមើលពិភពលោកនេះឃើញប្លែកពីអ្នកដទៃ។ អ្នកមានគំនិតច្នៃប្រឌិតខ្ពស់ ហើយតែងតែគំនិតថ្មីៗជាងមនុស្សដែលនៅជុំវិញខ្លួន។ បើនិយាយពីការរៀបចំទុកដាក់ឱ្យមានសណ្ដាប់ធ្នាប់ និងទៅណាមកណាគោរពពេលវេលា អាចពិបាកបន្តិចសម្រាប់អ្នក ប៉ុន្តែអ្នកជាមនុស្សដែលមានចិត្តទូលាយ អត្តចរិតល្អ មិនចូលចិត្តបៀតបៀនអ្នកដទៃ គ្រាន់តែពេលខ្លះអារម្មណ៍ផ្លាស់ប្ដូរញឹកញាប់បន្តិច ពិបាកឱ្យអ្នកដទៃស្វែងយល់ចិត្តអ្នកឱ្យច្បាស់៕

ចុចអាន៖ ចង់ដឹងអ្នកជាមនុស្សរឹងមាំ ឬទន់ជ្រាយក្នុងភ្នែកអ្នកដទៃ សាកល្បងរើសរូបមួយ

ប្រភព៖ Brightside ប្រែសម្រួល៖ សរ សុគន្ធី