នារីៗប្រយ័ត្នផង! ជំងឺបាក់ទឹកចិត្តឃាតករឈាមត្រជាក់ណាស់

2019-08-02 08:30:00
ចំនួនមតិ 0 | ចំនួនចែករំលែក 0

បើនិយាយដល់ការបាក់ទឹកចិត្ត អ្នកប្រហែលជាគិតថាវាគ្រាន់តែជាបញ្ហាតូចតាច គ្មានអ្វីដែលត្រូវបារម្ភ។ មិនដូច្នេះទេ បាក់ទឹកចិត្តជាប្រភេទជំងឺម្យ៉ាងកាចសាហាវ លើសពីអ្វីដែលយើងធ្លាប់ដឹង បើយើងមិនយកចិត្តទុកដាក់។ វាធ្វើឲ្យបុគ្គលនោះមានអារម្មណ៍សោកសង្រេងធ្ងន់ធ្ងរ លែងមានចំណាប់អារម្មណ៍លើការរស់នៅប្រចាំថ្ងៃ។ មនុស្សស្រី ងាយប្រឈមនឹងជំងឺបាក់ទឹកចិត្ត នេះបើតាមរបាយការណ៍អង្គការសុខភាពពិភពលោក (WHO) ។

យើងអាចសម្គាល់បានតាមរយៈការបាត់បង់ការលើកទឹកចិត្តខ្លួនឯង ការផ្លាស់ប្ដូរចំណង់អាហារ គេងច្រើនពេក ឬតិចពេក ធុញថប់អារម្មណ៍ មិនមានការផ្ដោតអារម្មណ៍បានល្អ ធ្វើបាបខ្លួនឯង និងមានគំនិតធ្វើអត្តឃាតខ្លួន។

មិនមែនតែប៉ះពាល់ដល់ខ្លួនឯងផ្ទាល់ បាក់ទឹកចិត្តអាចមានឥទ្ធិពលធ្វើឲ្យគ្រួសារ សហគមន៍ និងសង្គមជាតិទាំងមូលផងដែរ។

សញ្ញាណដំបូងនៃអ្នកមានជំងឺ មានអាការៈផ្លូវចិត្តសោកសង្រេង ឆាប់មានអារម្មណ៍អន់ចិត្ត ឆាប់ឈឺចិត្ត ឆាប់អស់ចិត្តនិងនឿយណាយខ្លាំងពេលធ្វើអ្វីមួយ។ នៅពេលប្រឈមបញ្ហាអ្វីមួយ អ្នកជំងឺលែងមានកម្លាំងចិត្ត អស់សង្ឃឹមក្នុងការតស៊ូទៅមុខទៀត។

លោក ប៉ា ចាន់រឿន ជាប្រធានមជ្ឈមណ្ឌលទស្សនវិជ្ជាអនុវត្ត និងសីលធម៌កម្ពុជាបានរៀបរាប់ប្រាប់ គេហទំព័រ កញ្ញា ថា "អ្នកជំងឺធ្លាក់ទឹកចិត្ត មានសុខភាពផ្លូវចិត្តខ្សោយ ចូលចិត្តស្ដីបន្ទោសខ្លួនឯងរាល់បញ្ហាដែលកើតឡើង។ ពេលខ្លះបើអ្នកជំងឺអង្គុយតែឯង គាត់ច្រើនតែយំ ហៀរទឹកភ្នែកមកឯងៗ ដោយគ្មានមូលហេតុ។ គាត់ពិបាកគេង(មានវិបត្តិដំណេក) មិនឃ្លាន( បាត់ចង់ចំណង់អាហារ) ចង់រស់នៅតែឯង ហើយរស់នៅក្នុងអតីតកាល ជោគជាំក្នុងរឿងអតីតដោយគ្មានការមើលឃើញសេចក្ដីសង្ឃឹមនាពេលអនាគតឡើយ។"

លោក ប៉ា ចាន់រឿន

លោកបន្តទៀតថា "ប្រសិនបើទុកឲ្យអ្នកជំងឺស្ថិតក្នុងស្ថានភាពបែបនេះ មិនរកវិធីសាស្ត្រព្យាបាលឬផ្លាស់ប្ដូរបញ្ហាផ្លូវចិត្តនោះទេ អ្នកជំងឺអាចវិវត្តពីកម្រិតស្រាល ទៅជាកម្រិតមធ្យម នឹងឈានដល់កម្រិតធ្ងន់ធ្ងរមួយ។"

អ្នកជំងឺមានអាការៈចង់សម្លាប់ខ្លួន តែងរកគ្រប់មធ្យោបាយដើម្បីផ្ដាច់ជីវិតខ្លួន។ គាត់គិតរាល់បញ្ហាដោយយកមកដាក់ខ្លួន ទោះបីបញ្ហាទាំងនោះមិនមែនជារឿងគាត់ត្រូវគិត ក៏គាត់យកមកគិតដែរ។ អ្នកជំងឺលែងចាប់អារម្មណ៍លើអ្វីៗទាំងអស់ ភាសាសាមញ្ញគឺ លែងខ្វល់គ្រប់យ៉ាង ។ គាត់តែងតែគិតថា ខ្លួនឯងលែងមានតម្លៃ លែងយល់ដឹងពីសារៈសំខាន់របស់ខ្លូនដែលជាកូន ឪពុកម្ដាយ បុគ្គលិក សិស្សនិស្សិត ឬប្រជាពលរដ្ឋក្នុងសង្គម គាត់លែងមើលឃើញថាខ្លួនឯងមានតម្លៃក្នុងកែវភ្នែករបស់នរណាម្នាក់ ឬនៅកន្លែងណាមួយ។

ក្រៅពីផលប៉ះពាល់ទៅរាងកាយអ្នកជំងឺ អាការៈទាំងនោះបានឆ្លុះបញ្ជាំងពីសុខភាពផ្លូវចិត្តអ្នកលែងប្រក្រតីដូចមុនហើយ ហើយអាចឈានដល់ការសម្លាប់ខ្លួន។ លោក បន្ថែមទៀតថា បុគ្គលបាក់ទឹកជាអ្នករងគ្រោះខ្លាំងជាងគេ គឺខ្លួនឯងតែម្ដង ជាពិសេសប៉ះពាល់ដល់ផ្លូវអារម្មណ៍គ្រួសារ ហើយក៏អាចប៉ះពាល់ដល់សុខមាលភាពសហគមន៍ ក្រុមគ្រួសារនឹងពិបាកចិត្តពេលឃើញសមាជិកណាម្នាក់មានសភាពបែបនេះ ដោយបាត់បង់ភាពរហ័សរហួន លែងចង់និយាយស្ដី ទឹកមុខស្រពាប់ស្រពោន គិតតែនៅមួយកន្លែងដែលគ្មានមនុស្សក្បែរខ្លួន។

គួរបញ្ជាក់ដែរថា មានមនុស្សចំនួនប្រមាណ ៨០ម៉ឺននាក់ បានធ្វើអត្តឃាតខ្លួនឯងជារៀងរាល់ឆ្នាំ។ ក្នុងនោះមានមនុស្សម្នាក់បានសម្លាប់ខ្លួនរាល់ ៤០វិនាទីម្ដង ។ ជាងនេះទៅទៀត រាល់ការធ្វើអត្តឃាតនីមួយៗមានការប៉ុនប៉ងធ្វើអត្តឃាតខ្លួនឯងច្រើនជាង ២០ ដង នេះបើតាមរបាយការណ៍អង្គការសុខភាពពិភពលោក។

ចុចអានបន្ត៖ការសិក្សាបង្ហាញថា៖ ការផ្អាកប្រើប្រាស់ហ្វេសប៊ុក អាចធ្វើឲ្យសុខភាពផ្លូវចិត្តល្អប្រសើរ

អត្ថបទ៖ ង៉ាន់ សុគុន