មិត្តប្រុសច្បាស់ជាស្រលាញ់អ្នកខ្លាំងមិនប្រែប្រួល បើមនុស្សស្រីមានចំណុចទាំងនេះ
- 2019-05-16 10:40:00
- ចំនួនមតិ 0 | ចំនួនចែករំលែក 0
មិត្តប្រុសច្បាស់ជាស្រលាញ់អ្នកខ្លាំងមិនប្រែប្រួល បើមនុស្សស្រីមានចំណុចទាំងនេះ
ចាប់ផ្តើមទំនាក់ទំនងជាមួយអ្នកណាម្នាក់ តែងតែធ្វើមនុស្សស្រីមានអារម្មណ៍សប្បាយរីករាយ និងកក់ក្តៅក្នុងជីវិត។ តែពេលខ្លះ ពួកគេបារម្ភថា តើគួរធ្វើយ៉ាងណា ឲ្យមិត្តប្រុសកាន់តែស្រលាញ់ខ្លាំង និងមានមោទកភាព ក្នុងនាមជាសង្សារនឹងគ្នានោះ។
១. ជាមិត្តស្រី ដែលគាត់ចង់ដឹងកាន់តែខ្លាំងពីអ្នក
ក្នុងចំណងស្នេហ៍ អ្នកគួរធ្វើជាមិត្តស្រីដែលមិត្តប្រុសចង់សិក្សា ស្វែងយល់ច្រើនពីអ្នក ទើបជារឿងគួរឲ្យចាប់អារម្មណ៍។ ចំណុចនេះ មិនមែនមានន័យថា ឲ្យអ្នកត្រូវលាក់គ្រប់រឿងមិនឲ្យគាត់ដឹងនោះទេ តែអ្នកក៏គួរមានអ្វីពិសេសនិងអាថ៌កំបាំង ដែលធ្វើឲ្យគាត់ចង់ដឹងពីជីវិតរស់នៅរបស់អ្នកកាន់តែខ្លាំង។ ឧទាហរណ៍ដូចជា អ្នកមិនដែលប្រាប់គាត់ថា អ្នកចេះលេងហ្គីតាឡើយ តែនៅពេលមានពិធីជប់លៀង អ្នកបង្ហាញសមត្ថភាពលេងហ្គីតាយ៉ាងរស់រវើក ធ្វើឲ្យគាត់មើលអ្នកឡើងភ្លឹក និងសរសើរអ្នកមិនដាច់ពីមាត់។
២. ឲ្យគាត់មានអារម្មណ៍ថា អ្នកមានតម្លៃខ្លាំង
អ្នកជាមនុស្សចង់ចេះ ចង់ដឹង ចង់រៀនអ្វីថ្មីៗ ដែលមិនសូវទុកពេលវេលាឲ្យកន្លងហួសទៅ ឥតប្រយោជន៍នោះទេ។ អ្នកសាកគិតមើលថា បើសុខៗ ស្រាប់តែអ្នកជាប់លេខ១ ក្នុងថ្នាក់ ឬ ជាប់អាហារូបករណ៍ ឬអាចថា ឡើងតំណែងក្នុងការងារជាដើម តើចំណុចទាំងនេះ មិនបង្ហាញថាអ្នកមនុស្សស្រីខ្លាំងទេអី។ ដូច្នេះ មនុស្សប្រុសក៏ឲ្យតម្លៃអ្នកផងដែរ នៅពេលអ្នកបានបង្កើតសមិទ្ធផលល្អមួយសម្រាប់ខ្លួនឯង។
៣. ជា Fan ផ្គាប់មុខសម្រាប់គាត់លុះក្ស័យ
មិនដឹងជាមិត្តប្រុសអ្នកស្រលាញ់អ្នកខ្លាំងកម្រិតណាទៅ បើអ្នកធ្វើបាននូវចំណុចនេះ។ នៅពេលគាត់បាក់ទឹកចិត្ត មិនសប្បាយ ឬជួបបញ្ហា អ្នកតែងជាមនុស្សដែលលើកទឹកចិត្ត ផ្ដល់ស្នាមញញឹម និងកំប្លុកកំប្លែងឲ្យគាត់ញញឹមឡើង។ ធ្វើជាអ្នក Fan ម្នាក់ដែលមិនផ្លាស់ប្ដូរ គឺគាំទ្រគាត់ និងសរសើរគាត់នៅពេលគាត់ធ្វើបានល្អ ហើយលើកទឹកចិត្តគាត់នៅពេលគាត់ជួបរឿងបរាជ័យ។ មិនមែនចាំតែស្តីបន្ទោស ហើយកែប្រែគាត់ឲ្យធ្វើនេះធ្វើនោះ តាមតែចិត្តអ្នកដោយគ្មានសួរចិត្តគាត់បន្តិចនោះទេ។
៤. ក្លាយជាមនុស្សសំខាន់ ក្នុងសមាជិកគ្រួសារគាត់
ចំណុចនេះអាចថា ជារឿងលំបាកបន្តិច តែសុភាពនារីទាំងអស់មិនត្រូវរំលង ឬមិនអាចទៅដល់ចំណុចនេះបានឡើយ។ កុំធ្វើជាមនុស្ស ដែលគាត់ត្រូវជ្រើសរើស រវាង ស្នេហា និង ម្ដាយ របស់គាត់ ព្រោះបើដល់ដំណាក់កាលនេះហើយ មានន័យថា ស្នេហាអ្នកមិនរលូននោះទេ។ ថ្វីបើអ្នកឃើញថា មិត្តប្រុសជាមនុស្សស្ដាប់សំដីម្តាយខ្លាំង ហើយអ្នកមិនចូលចិត្ត បន្ទាប់មកអ្នកសម្តែងអាកប្បកិរិយាមិនថ្លៃថ្នូរ នោះជាអ្វីដែលគាត់នឹងពិចារណាមិនខាន។ ស៊ូធ្វើជាសង្សារ ដែលក្លាយជាសមាជិកម្នាក់ក្នុងគ្រូសារមិត្តប្រុស ដែលសាច់ញាតិគាត់គ្រប់គ្នា សុទ្ធតែស្រលាញ់និងគាំទ្រគាត់ឲ្យស្រលាញ់អ្នក ទើបធ្វើឲ្យមិត្តប្រុសកាន់តែពេញចិត្តអ្នកខ្លាំង។
៥. ទំនុកចិត្តខ្ពស់
ធ្វើជាមនុស្សស្រីសម័យទំនើប ដែលមានភាពឯករាជ្យ និងទំនុកចិត្ត ដែលគ្មានអ្នកណាមើលងាយបាន។ បើអ្នកមានភាពច្បាស់លាស់ឲ្យខ្លួនឯង មើលទៅម៉ត់ចត់ និងមិនរញ៉េរញ៉ៃច្រើន នេះជាមន្តស្នេហ៍សម្ងាត់ ដែលបុរសណាក៏ស្ងប់ស្ងែងអ្នកដែរ។
៦. បង្ហាញគាត់ឲ្យដឹងថា មិត្តប្រុសជាមនុស្សទីមួយក្នុងកែវភ្នែករបស់អ្នក
មិត្តប្រុសអ្នកនឹងមានអារម្មណ៍កក់ក្តៅ ហើយរឹតតែស្រលាញ់អ្នកខ្លាំង មិនប្រែប្រួលនៅពេលអ្នកផ្តល់តម្លៃថា គាត់ពិតជាមនុស្សសំខាន់ក្នុងកែវភ្នែករបស់អ្នកមែន។ អ្នកត្រូវបង្ហាញឲ្យគាត់ឃើញថា រាល់ការខំប្រឹងរបស់អ្នក គឺមូលហេតុចំបងដោយសារវត្តមានរបស់គាត់ គិតអ្វី ធ្វើអ្វី គឺអ្នកធ្វើដើម្បីគាត់ និងអនាគតរួមគ្នាទៅថ្ងៃមុខ។
៧. មិនបំបាក់មុខមិត្តប្រុស
មានមិត្តស្រីជាមនុស្សស្អាត អាចថានេះជារឿងមោទកភាពមួយសម្រាប់មនុស្សប្រុស។ មនុស្សប្រុសចូលចិត្តបង្អាប់គ្នាលេងណាស់ រឿងសម្រស់សង្សាររបស់មិត្តភិក្កិពួកគេ។ បើអ្នកចេញក្រៅម្ដងៗ តែងខ្លួនបានសមរម្យ ស្រស់ស្អាត នេះអាចបញ្ជាក់បានថា អ្នកបានផ្ដល់កិត្តិយសឲ្យគាត់ និងខ្លួនឯងដែរ ព្រោះអ្នកមិនបំបាក់មុខគាត់ចំពោះមនុស្សជាច្រើន។ លើសពីនេះ តែងខ្លួនស្អាតសមរម្យ ត្រូវកាលៈទេសៈ ក៏ជាផ្នែកមួយឲ្យគាត់ឃើញអ្នកស្អាត ក្នុងកែវភ្នែកគាត់ ដែលធ្វើឲ្យមិត្តប្រុសមិនអាចសម្លឹងនារីផ្សេងបាន ក្រៅពីអ្នកនោះទេ។ តែបើអ្នកចេញក្រៅម្ដងៗ មិនខ្វល់ពីការតែងខ្លួន សក់ក្បាលកន្ត្រឺង ក្លិនខ្លួនស្អុយងោង គិតទៅមើលថា មិត្តប្រុសអ្នកនៅចាប់អារម្មណ៍នឹងអ្នកទៀតអត់?