មិនមែនតែស្រីៗ! ឃើញប្រុសៗសាច់ដុំ៦កង់ឥលូវ ភាគច្រើនវះកាត់ទេ

2019-05-02 09:31:30
ចំនួនមតិ 0 | ចំនួនចែករំលែក 0

ការវះកាត់កែសម្ផស្សសម្រាប់ពេលបច្ចុប្បន្នមិនមែនពេញនិយមសម្រាប់តែនារីៗទេ។ មានបុរសមិនតិចទេដែលទៅរកសេវានេះដើម្បីកែប្រែផ្នែកណាមួយនៃដងខ្លួនដែលពួកគេមិនពេញចិត្តឱ្យឥតខ្ចោះដូចក្ដីស្រមៃ។

ជាក់ស្ដែងថ្មីៗនេះ មានការចុះផ្សាយពីបុរសជនជាតិថៃម្នាក់ជាតារាម៉ូដែល ឈ្មោះថា Ome Pangpaparn ដែលបានព្យាយាមទៅ Gym តែមិនបានផលដូចចិត្ត ក៏សម្រេចចិត្តទទួលការវះកាត់ឱ្យមានសាច់ដុំ៦កង់វិញម្ដង។ ការចុះផ្សាយក៏បានបង្ហាញពីដំណើរការនៃការវះកាត់តាំងពីដំណាក់កាលដំបូង ភ្ជាប់ជាមួយរូបភាពដែលអាចធ្វើឱ្យមនុស្សមួយចំនួនដែលបានឃើញហើយស្រៀវ ឬខ្លាចមិនហ៊ានមើល។

រយៈពេលកំណត់មួយក្រោយការវះកាត់បានជោគជ័យ សាច់ដុំ៦កង់ក៏លេចចេញដូចធម្មជាតិ ប៉ុន្តែអ្នកប្រើបណ្ដាញសង្គមមួយចំនួនបានរិះគន់ថា មើលទៅឃើញសាច់ដុំពោះ៦កង់មែន តែដៃបុរសនេះមិនមានសាច់ដុំផង អ៊ីចឹងមើលទៅអត់សមគ្នា ហើយគ្រាន់តែមើល គេដឹងថាមិនមែនធម្មជាតិទៅហើយ។

ចុចអាន៖ ចង់បានសម្រស់ស្រស់ស្អាតដោយសារមុខកាំបិត មកមើលពីដំណើរការក្រោយវះកាត់នេះសិន

អ្នកខ្លះឱ្យយោបល់ថា ការទៅហាត់ឱ្យបានសាច់ដុំតាមបែបធម្មជាតិនៅ Gym អាចជួយឱ្យបានសាច់ដុំគ្រប់កន្លែង មើលទៅសង្ហាជាង ហើយអាចបានសុខភាពល្អទៀតផង។ ដោយឡែក បុរសដែលបានវះកាត់ខាងលើ មានមុខមាត់ស្រស់ស្អាត ជាហេតុធ្វើឱ្យអ្នកដែលបានឃើញដទៃទៀតបន្តនិយាយថា សង្ស័យតែមុខមាត់ក៏មិនមែនធម្មជាតិដែរ។

ឆ្លើយតបនឹងការរិះគន់ទាំងឡាយ Ome មិនមានការអៀនខ្មាសក្នុងការបង្ហាញថាខ្លួនគេមានសម្រស់ដូចសព្វថ្ងៃដោយសារដៃគ្រូពេទ្យកែសម្ផស្សឡើយ ដោយបានបង្ហោះនៅលើបណ្ដាញសង្គមថា "ការហាត់ប្រាណមិនអាចផ្ដល់ចម្លើយដ៏ពេញចិត្តដល់យើងឡើយ! ខ្ញុំខំហាត់ប្រាណរាល់ថ្ងៃ តែនៅតែមិនអាចកម្ចាត់ខ្លាញ់ពីពោះបាន" ព្រមទាំងបានបង្ហោះរូបមុន និងក្រោយវះកាត់មុខមាត់ទៀតផង។

ប្រធានមន្ទីរពេទ្យ Masterpiece ដែលជាកន្លែង Ome ទទួលការវះកាត់សាច់ដុំ៦កង់នេះ បានឱ្យដឹងថា "នេះមិនមែនការវះកាត់សាច់ដុំលើកទី១ទេ! ការពិតទៅ យើងបើកទទួលវះកាត់នេះប្រហែល៣-៤ឆ្នាំហើយ។ ជាធម្មតា យើងទទួលបានស្នើសុំវះកាត់សាច់ដុំ៦កង់នេះពី២០ ទៅ៣០អ្នកក្នុងមួយខែៗ"។

សម្រាប់តម្លៃវះកាត់វិញ គឺ១២ម៉ឺនបាត (៣ ៧០០ដុល្លារអាមេរិក) ដោយដំបូងគ្រូពេទ្យនឹងបូមខ្លាញ់ចេញពីបរិវេណពោះ ដើម្បីសូន្យតំបន់ត្រង់នោះឱ្យចេញជាសាច់ដុំ ហើយគ្មានគ្រោះថ្នាក់ ឬការឈឺចាប់អ្វីទេ។ លោកបានបញ្ជាក់បន្ថែមថា ដំណើរការវះកាត់នេះ មិនមានការដាក់ផ្លាស្ទិច ឬសីលីកូនចូលឡើយ៕

ចុចអាន៖ ខុសគ្នាដាច់! មកមើលសម្រស់ DJ Soda ពីមុននិងឥឡូវ

ប្រភព៖ Coconut ប្រែសម្រួល៖ សរ សុគន្ធី