ឪពុកមហាសេដ្ឋីផ្ដាំកូនក្នុងថ្ងៃរៀបការ៖ ចង់ជោគជ័យ កូនកុំចាត់ទុកប្រពន្ធដូចជាមិត្តភ័ក្ដិ!
- 2019-03-29 01:03:00
- ចំនួនមតិ 0 | ចំនួនចែករំលែក 0
ឪពុកមហាសេដ្ឋីផ្ដាំកូនក្នុងថ្ងៃរៀបការ៖ ចង់ជោគជ័យ កូនកុំចាត់ទុកប្រពន្ធដូចជាមិត្តភ័ក្ដិ!
នេះជាដំណើររឿងដែលមហាសេដ្ឋី ម្ចាស់ភាគហ៊ុនធំលើពិភពលោកមួយរូបផ្ដាំផ្ញើកូនប្រុសរបស់ខ្លួនក្នុងថ្ងៃរៀបការអំពើគន្លឹះសម្ងាត់ដើម្បីក្លាយជាបុគ្គលជោគជ័យមានទ្រព្យសម្បត្តិហូរហៀរទៅថ្ងៃក្រោយ។
មុនឈានដល់ពិធីទទួលកូនក្រមុំ មហាសេដ្ឋីជាឪពុកបានខ្សឹបហៅកូនប្រុសរបស់ខ្លួនចូលក្នុងបន្ទប់ ហើយហុចសំបុត្រមួយឱ្យកូន រួចនិយាយថា "កូនប្រុស! នេះជាអាថ៌កំបាំងទាំង៤ដែលនាំឱ្យពុកជោគជ័យមកដល់សព្វថ្ងៃ! ត្រូវចងចាំវាទុក កុំឱ្យភ្លេចឱ្យសោះណា!”។ បន្ទាប់ពីពិធីមង្គលការចប់សព្វគ្រប់ហើយ បុរសជាកូនបានបើកសំបុត្រអាន ឃើញអាថ៌កំបាំងទាំង៤រួមមាន៖
ចុចអាន៖ បណ្ដាំម៉ែក្មេក៖ កូនស្រីម៉ែមិនល្អឥតខ្ចោះទេ (បុរសគ្រប់រូបគួរតែអាន)
កុំចាត់ទុកប្រពន្ធដូចមិត្តភ័ក្ដិ
បើកូនចង់បានជោគជ័យ កូនកុំចាត់ទុកប្រពន្ធខ្លួនដូចមិត្តភ័ក្ដិ ព្រោះកូនអាចទៅរកមិត្តភ័ក្ដិពេលមានបាន ពេលសប្បាយ ឬពេលកើតទុក្ខម្ដងឬ២ដងប៉ុណ្ណោះ មិនអាចទៅពឹងពាក់ស្នាក់អាស្រ័យគ្រប់ពេលនោះទេ។ ប៉ុន្តែក្នុងនាមជាប្រពន្ធ កូនអាចចែករំលែករឿងបានគ្រប់យ៉ាង ទាំងរឿងសុខ និងទុក្ខ។
អាពាហ៍ពិពាហ៍មិនមែនជាកន្លែងសម្រាប់គ្រប់គ្នាទទួលបានបទពិសោធន៍នៃការស្រលាញ់ និងអារម្មណ៍ត្រេកត្រអាលនោះទេ។ វាជាកន្លែងដែលនាំមកនូវភាពសប្បាយរីករាយ កំហឹង ទំនួលខុសត្រូវ និងស្ថានភាពលំបាកៗជាច្រើនដែលនឹងជំរុញឱ្យឯងទាំងពីរត្រូវខំតស៊ូជាមួយគ្នា ហើយនិយមន័យពិតប្រាកដនៃពាក្យថា អាពាហ៍ពិពាហ៍នឹងលេចចេញមកនៅពេលស្ថានភាពទាំងនោះមកដល់។
នៅពេលនោះ ប្រពន្ធនឹងជាមនុស្សតែម្នាក់គត់ដែលតាំងចិត្តនៅជាមួយកូន ស្ដាប់រឿងកូន និងចែករំលែកការលំបាកជាមួយកូន។ ទោះបីពុកនិងម្ដាយឯងអាចធ្វើអ្វីគ្រប់យ៉ាងដើម្បីកូនមែន តែពួកយើងមិនអាចនៅជាមួយកូនបានយូរអង្វែងទេ។ ថ្ងៃណាមួយ ពួកយើងនឹងចាកចោលកូនទៅកាន់ភពមួយទៀតមិនខាន។ អ្នកចុងក្រោយដែលនឹងនៅជាមួយកូនក្នុងជីវិតអាពាហ៍ពិពាហ៍នេះ គឺមានតែប្រពន្ធនោះឯង។
ចុចអាន៖ គុណសម្បត្តិ១០យ៉ាងរបស់ "ប្ដីល្អ" ដែលមនុស្សស្រីសម័យនេះចង់បានបំផុត
ធ្វើជាប្រពន្ធគឺជាការងារដ៏លំបាកបំផុតក្នុងលោក
ពេលនារីម្នាក់ដើរចូលមាត់ទ្វារនៃអាពាហ៍ពិពាហ៍ ខួរក្បាលរបស់នាងនឹងនឹកឃើញតែរឿងទាំងឡាយជុំវិញគ្រួសារតូចរបស់នាងដែលនឹងត្រូវបង្កើតនៅពេលបន្តិចទៀតនេះ ដូចជាការរៀបចំទុកដាក់ផ្ទះសម្បែង ការដាំស្ល បោសសម្អាត មើលថែទាំកូន រៀបចំសម្រាប់ស្វាមីជាដើម ហើយនារីខ្លះត្រូវចេញទៅក្រៅរកលុយជួយទប់ចំណាយរបស់គ្រួសារទៀតក៏មាន។ ទោះបីត្រូវទៅរកលុយនៅខាងក្រៅហើយ មកផ្ទះវិញក៏ត្រូវរ៉ាប់រងការងារក្នុងផ្ទះ និងបម្រើប្ដីទៀត តែមនុស្សភាគច្រើនមិនបានឱ្យតម្លៃលើការងាររបស់នាងទេ។
សួរថាតើនាងទទួលបានអ្វីខ្លះ ពីលើការលះបង់របស់នាងដ៏ធំធេងនេះ? កូនត្រូវចាំថា ការប្រពន្ធយកមក គឺយកមកធ្វើជាប្រពន្ធ មិនមែនឱ្យនាងធ្វើជាខ្ញុំបម្រើនោះទេ។
ចុចអាន៖ ប៉ា ៥ ប្រភេទខុសៗគ្នាដែលកូនគ្រប់រូបគួរដឹង
ធ្វើជាឪពុកដ៏ល្អម្នាក់
កូនដឹងស្រាប់ហើយ ថាពុករវល់នឹងការងារយ៉ាងណា។ ប៉ុន្តែទោះបីត្រូវចេញទៅរកលុយ កាន់កាប់ក្រុមហ៊ុនធំ លុយវាល់លានក៏ពិតមែន តែពុកមិនដែលចោលកូននិងម្ដាយឯងឡើយ។ ពុកតែងមកផ្ទះញ៉ាំបាយជុំគ្នាជាមួយគ្រួសារយើងហោចណាស់ក៏៣ថ្ងៃក្នុងមួយអាទិត្យ ប្រឡែងជាមួយកូនៗ ឆែកកិច្ចការសាលា និងតាមដានការសិក្សារបស់កូនរហូត។
តាំងពីមានកូនមក ប៉ាសុខចិត្តផ្ដាច់បារី និងស្រា ហើយងាកមកអានសៀវភៅជំនួសវិញរាល់ព្រឹក ព្រោះតែប៉ាដឹងថា ឪពុកម្នាក់ដែលកាន់កន្ទុយបារី ឬដបស្រា ហើយដេកលេងហ្គេមពេញមួយថ្ងៃមិនអាចបង្រៀនកូន ឬធ្វើជាគំរូល្អឱ្យកូនចាប់សៀវភៅអានទេ។ កូនត្រូវចាំថា ចង់ឱ្យកូនក្លាយជាមនុស្សល្អ យើងត្រូវធ្វើជាឪពុកល្អឱ្យពួកគេឃើញជាមុនសិន។
មនុស្សប្រុសពិតដឹងពីវិធីធ្វើដាក់ប្រពន្ធ
កូនដឹងទេ ពាក្យមួយដែលត្រូវបំផុតនោះគឺ "ប្រពន្ធប្រៀបដូចជាត្បូងនាំសំណាងដល់គ្រួសារ" ។ បើកូនផ្ដល់ក្ដីស្រលាញ់ដល់ប្រពន្ធរបស់កូនបានដិតដល់ កូននឹងទទួលបានជោគជ័យក្នុងជីវិត ទៅណាក៏មិនបរាជ័យ ក៏មិនចេះក្រ ព្រោះតែហេតុផល២នេះ៖
១. គន្លឹះសំខាន់បំផុតដើម្បីក្លាយជាបុគ្គលជោគជ័យបានគឺការមានសុភមង្គលពីក្នុងចិត្តមកតែម្ដង។ ដូចពាក្យមួយពោលថា “កាលណាគ្រួសារមានសុភមង្គល អ្វីៗក៏ស្រស់បំព្រង”
២. កាលណាប្រពន្ធទទួលបានក្ដីស្រលាញ់កាន់តែច្រើន ការតាំងចិត្តដែលនាងមានសម្រាប់គ្រួសារ សម្រាប់ប្ដីក៏កាន់តែច្រើនដូចគ្នា។ អ៊ីចឹង នាងនឹងលះបង់ទាំងកម្លាំងកាយ កម្លាំងចិត្តដើម្បីជួយឱ្យកូនអាចតតាំងជាមួយពិភពលោកបានដោយអង់អាច៕