អត្ថបទល្អសម្រាប់ដាស់តឿនកំលោះ និងក្រមុំ
- 2019-03-28 10:00:00
- ចំនួនមតិ 0 | ចំនួនចែករំលែក 0
អត្ថបទល្អសម្រាប់ដាស់តឿនកំលោះ និងក្រមុំ
បើយោងតាមការដកស្រង់អត្ថបទចេញពីសៀវភៅ សុជីវធម៌ប្រចាំសង្គមគ្រួសារ ដែលនិពន្ធដោយលោក សុង ស៊ីវ បានរៀបរាប់ពីសុជីវធម៌ដែលកំលោះ និងក្រមុំ គ្រប់រូបត្រូវមានចំពោះគ្នាទៅវិញទៅមក តាមឋានៈរៀងៗខ្លួន។
សម្រាប់កំលោះ
- កំលោះគឺជាមនុស្សពេញការ មានចិត្តគំនិត និងរូបកាយកំពុងពេញកម្លាំង ត្រូវប្រុងប្រយ័ត្នចេះអត់ធន់ កុំភ្លើតភ្លើនទៅតាមអំណាចចិត្តស្នេហា រំលោភមើលងាយស្រ្តីភេទ មានស្រីក្រមុំជាដើម ឲ្យជ្រុលខុសច្បាប់ទម្លាប់ប្រពៃណី ដែលនាំឲ្យសៅហ្មង ខូចកិត្តិយសខ្លួននិងគ្រសារ។
មិនខិលខូចល្មោភស្នេហា បំផ្លាញព្រហ្មចារីរបស់ស្ត្រីក្រមុំ និងអ្នកលេងស្រីផ្កាមាសជាដើម។
រាប់អានស្រ្តីក្រមុំ ដូចជាប្អូនក្រមុំ ឬបងក្រមុំរបស់ខ្លួន ប្រកបដោយសេចក្តីថ្លៃថ្នូរ កុំឲ្យស្និទ្ធស្នាលហួសព្រំដែន ប៉ុន្តែក៏មិនមែនឲ្យឆ្មើងឆ្មៃដាក់គ្នានោះដែរ។
បើឃើញស្ត្រីក្រមុំកំពុងឈរ ដើរ ឬអង្គុយ នៅទីណាមួយជាមួយគ្រួសារក្តី តែម្នាក់ឯងក្តី មិនត្រូវដើរទៅធ្វើច្រិមច្រុម ឲ្យប៉ះទង្គិច ឬនិយាយបញ្ជិតបញ្ឆៀង ហ៊ោកញ្ជ្រៀវ ដែលហាក់បីដូចជាមើលងាយគេនោះទេ។
ត្រូវមានកាយវិការ និងពាក្យសម្តីសុភាពគួរសម ហើយសច្ចៈទៀងត្រង់ និងកុំនិយាយមួលបង្កាច់គ្មានការពិត ដើរប្រាប់មិត្តភ័ក្តិជាការលេងសើច ថាគេស្រលាញ់ខ្លួន គេឲ្យនេះឲ្យនោះ ឬថាខ្លួនបានខ្លួនប្រាណគេជាដើម ទាំងដែលសាមីខ្លួនគេឥតបានប្រព្រឹត្តធ្វើបែបនោះជាមួយខ្លួនទាល់តែសោះ។
កុំប្រើស្នេហាបោកប្រាស់ បើទាក់ទងនឹងមនុស្សស្រី ធ្វើឲ្យគេបាក់ចិត្តហើយស្លាប់រស់នឹងខ្លួន ត្រូវតែប្ដូរផ្ដាច់ស៊ូស្លាប់រស់នឹងគេវិញជាដាច់ខាត ទោះមានឧបសគ្គយ៉ាងណា ក៏ត្រូវតែរក្សាពាក្យសច្ចៈឲ្យបាន ទើបជាបុរសថ្លៃថ្នូរ។
សម្រាប់ក្រមុំ
ស្រ្តីក្រមុំត្រូវចេះអត់ធន់រក្សាព្រហ្មចារីរបស់ខ្លួនឲ្យបរិសុទ្ធ កុំប្រព្រឹត្តកន្លងប្រពៃណី ដែលនាំឲ្យអាប់កិត្តិយសដល់វង្សត្រកូលរបស់ខ្លួន។
ត្រូវរាប់អានបុរសកំលោះ ដូចជាបងប្រុស ឬប្អូនប្រុសរបស់ខ្លួន គឺរាប់អានដោយថ្លៃថ្នូរ កុំស្និទ្ធស្នាលពេក ប៉ុន្តែក៏មិនខ្លាចពេកដែរ។
បើឃើញកំលោះនៅទីណា មិនគួរនៅទីនោះ ឲ្យប៉ះទង្គិច ឬនិយាយបញ្ឆិតបញ្ឆៀងសើចខ្លាំងៗ ធ្វើអាការៈញ៉ិកញ៉ក់កាច់រាង ឲ្យកំលោះហ៊ានមើលងាយនោះឡើយ។
ត្រូវមានកាយវិការ និងពាក្យសំដីសុភាពរាបសា ឱនលំទោន កុំប្រើឬកច្រងាងច្រងាង និយាយហៅអាមឹងជេរទ្រគោះបោះបោក ធ្វើទឹកមុខមើលងាយជាដើម។
បើខ្លួនមិនដាច់ខាត ប្តូរផ្តាច់ជាមួយកំលោះមួយណាទេ មកពីមានឧបសគ្គដោយឋានៈមិនប្រហាក់ប្រហែលគ្នានោះ កុំប្រើពាក្យសំដី និងចរិយាឲ្យកំលោះស្លាប់ចិត្តគំនិត ប្ដូរផ្ដាច់ចំពោះខ្លួន ដែលនាំឲ្យគ្នារងទុកវេទនា ក្នុងពេលខ្លួនទទួលយកស្វាមីតាមអំណាចមាតាបិតា។
ត្រូវមានចិត្តស្មោះត្រង់ កាន់ពាក្យសច្ចៈចំពោះកំលោះណាមួយ ដែលខ្លួនបានសន្យាដាច់ខាតហើយ កុំប្រែក្រឡាស់ទៅសន្យាជាមួយកំលោះដទៃទៀត សាវាតាមអំពើចិត្ត ដែលនាំឲ្យកំលោះខកចិត្តឆ្កួតវង្វេងដោយសារពាក្យសំដីខ្លួន៕
ចុចអានបន្ត៖