អ្នកម្តាយគួរអាន! ងូតទឹកក្នុងពេលទាំង ៣ នេះ អាចបង្កគ្រោះថ្នាក់ខ្លាំងដល់សុខភាពកូន
- 2019-03-27 07:55:00
- ចំនួនមតិ 0 | ចំនួនចែករំលែក 0
អ្នកម្តាយគួរអាន! ងូតទឹកក្នុងពេលទាំង ៣ នេះ អាចបង្កគ្រោះថ្នាក់ខ្លាំងដល់សុខភាពកូន
កូនតូចចាំបាច់ត្រូវងូតទឹកឲ្យបានទៀតទាត់ជាប្រចាំ ដើម្បីអនាម័យនិងសុខភាពល្អ។ យ៉ាងណាមិញ អ្នកម្តាយគ្រប់រូបត្រូវចាំថា ក្នុងអំឡុងពេលទាំង៣នេះ ដាច់ខាតកុំងូតទឹកឲ្យកូន ពុំដូច្នោះទេ វានឹងបង្កផលប៉ះពាល់ធ្ងន់ធ្ងរដល់សុខភាពរបស់ពួកគេ។
១. ពេលកូនទើបតែញ៉ាំឆ្អែត
បន្ទាប់ពីញ៉ាំបាយ ឬអាហារផ្សេងៗចូលពោះឆ្អែតហើយ ក្រពះរបស់កូនតូចត្រូវប្រើពេលវេលាយូរក្នុងការកិនរំលាយអាហារ។ ការងូតទឹកភ្លាមៗពេក ជាសញ្ញាគ្រោះថ្នាក់ខ្លាំង ព្រោះនៅពេលកូនញ៉ាំឆ្អែត ឈាមនឹងរត់ចុះទៅផ្នែកពោះ ក្រពះមិនអាចកិនអាហារបានល្អ និងអាចបណ្តាលឲ្យកូនមានអាការៈវិលមុខជាដើម។ ត្រូវរង់ចាំឲ្យបានប្រហែល១ម៉ោងសិន ចាំងូតទឹកគ្មានហានិភ័យចំពោះសុខភាព។
២. ពេលកូនឈឺ
កូនតូចងាយនឹងឈឺ ដូចជាផ្តាសាយ ក្តៅខ្លួន ឬឈឺពោះជៀសមិនរួច។ ក្នុងអំឡុងពេលនេះដែរ ម្តាយភាគច្រើនចូលចិត្តងូតទឹកសម្អាតខ្លួនឲ្យកូន។ នេះជាទង្វើខុសទាំងស្រុង ព្រោះរាងកាយរបស់ក្មេងកំពុងតែចុះខ្សោយ ដូច្នេះប្រព័ន្ធការពាររាងកាយក៏អន់ថយដូចគ្នា ជាហេតុធ្វើឲ្យសភាពជំងឺកាន់តែធ្ងន់ធ្ងរមិនងាយជាសះស្បើយ។ នៅពេលកូនៗ កំពុងក្តៅខ្លួន ផ្តាសាយ...គួរជូតខ្លួនដោយប្រើកន្សែងស្អាតជាមួយទឹកក្តៅឧណ្ឌៗ ឲ្យពួកគេគេងក្នុងបន្ទប់កក់ក្តៅ ជៀសវៀសកុំឲ្យត្រូវខ្យល់។
៣. ពេលកូនបែកញើស
ឃើញកូនប្រលែងឬរត់លេងបែកញើស អ្នកម្តាយត្រូវចាំដល់ស្ងួតសិន បើចង់ងូតទឹកឲ្យពួកគេ។ ពេលរាងកាយក្មេងបែកញើស រន្ធញើសក៏បើកធំជាងមុន ហើយពេលងូតទឹកភ្លាមៗ បណ្តាលឲ្យក្មេងឆាប់ឈឺផ្តាសាយខ្លាំងណាស់។ ចូរប្រុងប្រយ័ត្នឲ្យបានល្អ មុនពេលយកកូនជាទីស្រលាញ់ទៅងូតទឹក ដើម្បីការពារពួកគេពីជំងឺផ្សេងៗ៕