ម៉ូដសក់ទាំង៤កំពុងពេញនិយមខ្លាំង តែកុំប្រញាប់សាក ប្រយ័ត្នផុងខ្លួន

2019-01-26 05:13:36
ចំនួនមតិ 0 | ចំនួនចែករំលែក 0

ព្រោះជាក់ស្ដែង ម៉ូដសក់កំពុងពេញនិយមទាំងនេះ រើសទម្រង់មុខខ្លាំងណាស់។ បើឃើញគេកាត់ស្អាតហើយចេះតែកាត់តាមនោះ ប្រយ័ត្នស្ដាយក្រោយមិនទាន់។

ដាច់ឆ្នាំ ដាច់ខែគឺជាពេលវេលាអ្នកគ្រប់គ្នា តែងធ្វើខ្លួន ទិញសំលៀកបំពាក់ថ្មី ប្ដូរម៉ូដសក់ តរោមភ្នែក ធ្វើក្រចកជាដើម។ ដោយនៅក្នុងនោះ ប្ដូរម៉ូដសក់គឺជាកត្តាដែលធ្វើឲ្យយើងមើលទៅប្លែកបំផុត។ ខាងក្រោមនេះគឺជាម៉ូដសក់៤ដែលកំពុងមានការពេញនិយមខ្លាំង ចំពោះសិល្បៈករ ក៏ដូចជាលើបណ្ដាញសង្គម តែចំពោះយើងអ្នកសាមញ្ញមិនគួរប្រថុយឡើយ ត្បិតម៉ូដទាំងនេះសមតែជាមួយទម្រង់មុខភាគតិចណាស់។

១. សក់សេះលើចិញ្ចើម

សក់សេះលើចិញ្ចើមត្រូវបានសិល្បការិនីកូរ៉េឡង់សេយ៉ាងខ្លាំងក្នុងឆ្នាំ២០១៨ ក៏ដូចជានៅដើមឆ្នាំនេះ។ យ៉ាងណាក្ដី ម៉ូដសក់ដ៏កាលីបនេះមិនមែនសម្រាប់អ្នកគ្រប់គ្នាឡើយ ត្បិតមានតែអ្នកមានទម្រង់មុខពងក្រពើ ឬវីប៉ុណ្ណោះទើបសមនឹងម៉ូដនេះ អ្នកមុខជ្រុង ឬមូលបើកាត់មុខនេះ នឹងត្រូវគេចំអកមិនខាន។

២. សក់រួញសរសៃមីកូរ៉េ

ម៉ូដសក់រួញសរសៃតូចដូចមី ឬម៉ូដសក់ ahjuma (អ៊ុំស្រី) ជួយឲ្យអ្នកមានមុខធំ លាក់បាំងបានមុខធំនេះយ៉ាងងាយ។ យ៉ាងណាក៏ដោយ ម៉ូដសក់នេះស៊ីនឹងអ្នកធ្វើខ្លួនខ្លាំង ព្រោះបើអ៊ុតសក់ម៉ូដនេះហើយ តែបើមិនធ្វើខ្លួន ម្ចាស់សក់នឹងមើលទៅចាស់ជាខ្លាំង។

៣. ម៉ូដ Pixie

ម៉ូដ Pixie គឺពេញនិយមខ្លាំងនៅអឺរ៉ុប កាលពីប៉ុន្មានឆ្នាំមុន តែក្រោយពេល តួរឿង “She Was Prettty” កាត់ម៉ូដនេះនៅក្នុងរឿង វាក៏ពេញនិយមខ្លាំងនៅអាស៊ី។ ដូចគ្នានឹងម៉ូដ២ខាងលើដែរ ម៉ូដនេះរើសទម្រង់មុខខ្លាំងបំផុត។ ប្រសិនបើមុខអ្នកមានទម្រង់ខ្វះខាតត្រង់ណាតែបន្តិច គឺម៉ូដនេះមិនអាចជួយលាក់បាំងអ្វីបានទាំងអស់។

៤. សក់ពណ៌ទឹកប្រាក់

ចុងបញ្ចប់នេះមិនមែនជាម៉ូដសក់ទេ គឺពណ៌សក់។ ខណៈពណ៌សក់ខ្លះ លាបទៅលើកមុខនោះ សក់ពណ៌ទឹកប្រាក់នេះ មិនមែនរើសទម្រង់មុខទេ គឺរើសសម្បុរស្បែកវិញម្ដង។ អ្នកសម្បុរស្រអែម ឬស្រអាប់មិនភ្លឺ បើដាក់ពណ៌នេះភ្លាមគឺលិចទៅតែម្ដង។ ពណ៌សក់នេះស៊ីនឹងអ្នកដែលមានសម្បុរភ្លឺ ហើយសក់មាំ មិនខូច ព្រោះបើសក់ខូចលាបពណ៌នេះ គឺមើលទៅមិនខុសពីអំបោសឡើយ៕