កូនប្រុសតែមួយគត់របស់ Jack Ma ស្អាតជាងឪពុក តែមានជីវិតគ្រួសារមិនកក់ក្ដៅ

2019-01-10 02:55:15
ចំនួនមតិ 0 | ចំនួនចែករំលែក 0

ដោយសារតែមិនបាននៅក្បែរឪពុកម្ដាយញឹកញាប់ ធ្លាប់មានពាក្យចចាមអារ៉ាមថា កូនប្រុសកំពូលមហាសេដ្ឋីចិន Jack Ma បានស្លាប់ហើយទៀតផង។

បើនិយាយពីមហាសេដ្ឋីលើពិភពលោក គឺគ្មានអ្នកមិនស្គាល់ ម្ចាស់សហព័ន្ធ Alibaba សេដ្ឋីលំដាប់កំពូល Jack Ma នោះទេ។ គិតត្រឹមចុងឆ្នាំ២០១៨ ទ្រព្យសម្បត្តិរបស់បុរសវ័យ ៥៤ឆ្នាំ បានកើនឡើងដល់៤០ពាន់លានដុល្លារហើយ។ និយាយពីជីវិតឯកជនវិញ លោកបានរៀបការនឹងលោកស្រី Cathy Zhang នៅឆ្នាំ១៩៨៨។ អ្នកទាំង២មានកូនបីនាក់គឺស្រី២ ប្រុស១ តែព័ត៌មានពីកូនស្រីគឺត្រូវបិទជិតឈឹងមិនដែលដឹងអ្វីពីពួកគេឡើយ ដែលធ្វើឲ្យគេចាប់អារម្មណ៍តែលើកូនប្រុសតែមួយគត់របស់លោកគឺ Jerry Ma។

Jerry Ma កើតឆ្នាំ១៩៩២ នៅពេលដែលប្ដីប្រពន្ធខាងលើមិនទាន់ជាអ្នកមាននៅឡើយ។ ដោយសារតែពេលនោះគឺជាពេលចាប់ផ្ដើមកសាងអាជីព ដូចនេះប្ដីប្រពន្ធរូបនេះមិនសូវមានពេលមើលកូននោះឡើយ ដោយកាលនោះ ផ្ទះរបស់ Jack Ma គឺតូចចង្អៀត ហើយត្រូវបានយកមកធ្វើជាការិយាល័យ និងផ្ទុកមនុស្សប្រមាណ៣០នាក់ជារៀងរាល់ថ្ងៃ។

ដល់អាយុ៤ឆ្នាំ Jerry ត្រូវបានបញ្ជូនឲ្យទៅរៀននៅសាលាមត្តេយ្យដែលស្នាក់នៅសាលាតែម្ដង ត្បតិឪពុកម្ដាយគ្មានពេលមើលថែ។ មួយឆ្នាំគឺត្រលប់មកផ្ទះវិញតែចុងឆ្នាំតែប៉ុណ្ណោះ។ ចូលវ័យ១០ឆ្នាំ លោកចាប់ផ្ដើមញៀនហ្គេមអនឡាញ មិនអាចផ្ដាច់បាន ដោយលោកគិតថាមានតែហ្គេមប៉ុណ្ណោះ ទើបអាចកំដរខ្លួនបាន។

ពេលដឹងថាកូនញៀនហ្គេម អ្នកមានគុណទាំង២បានស្ដីបន្ទោសកូនខ្លួនដែរ តែត្រូវស្ងាត់មាត់វិញ ពេលកូនប្រុសនិយាយថា៖ “ប៉ាម៉ាក់គ្មានពេលណានៅផ្ទះទាំងអស់ ខ្ញុំនៅផ្ទះក៏មានតែម្នាក់ឯង ចឹងខ្ញុំទៅហាងអ៊ីនធឺណិតសប្បាយជាង”។ លោកស្រី Zhang ក៏ទទួលដែរថា Jack Ma មិនមែនជាឪពុកល្អត្បិតនៅក្រៅសង្គម លោកអាចធ្វើអ្វីបានគ្រប់យ៉ាង តែក្នុងគ្រួសារ លោកមិនអាចផ្ដល់ភាពកក់ក្ដៅឲ្យកូនខ្លួនបាន។

ក្រោយពេលផ្ដាច់ហ្គេមបាន Jerry បានរើទៅរស់នៅប្រទេសកាណាដា និងរៀននៅទីនោះ។ សព្វថ្ងៃលោកកំពុងរស់នៅសហរដ្ឋអាមេរិក និងតាមរៀននៅសកលវិទ្យាល័យ Berkeley រដ្ឋកាលីហ្វញ៉ា៕

ចុចអាន៖រៀបការនឹងគ្នាតែ៤ឆ្នាំសោះ ទ្រព្យរួម Yang Mi និង Harwick Lau ឡើងដល់ ១ ពាន់លានដុល្លារ

ប្រភព៖ Eva ប្រែសម្រួល៖ Caramel