“អរគុណដែលក្បត់ខ្ញុំ” ការសងសឹករបស់ប្រពន្ធម្នាក់ដែលធ្វើឲ្យប្ដីនាងស្ដាយក្រោយបំផុត

2018-11-13 08:40:22
ចំនួនមតិ 0 | ចំនួនចែករំលែក 0

នៅកន្លែងធ្វើការខ្ញុំ មានមិត្តរួមការងារម្នាក់គឺជាបុរសវ័យកណ្ដាលដែលមានមន្តស្នេហ៍ និងមាន តំណែងខ្ពស់ ទៅណាមកណាក៏មានឡានក្រុមហ៊ុនជូនទៅជូនមក ប្រាក់ខែក៏ខ្ពស់ ដូច្នេះហើយទើបក្លាយខ្លួនជាគោលដៅរបស់នារីៗជាច្រើន។ ចុះឡើងៗ គេក៏មានស្នេហាលួចលាក់ជាមួយនារីម្នាក់ដែលជាអតិថិជនរបស់ក្រុមហ៊ុន ដោយនាងនៅក្មេងហើយស្អាតទៀត។

មួយរយៈនោះ ខ្ញុំសង្កេតឃើញគេញញឹមញញែមស្រស់ស្រាយរាល់ថ្ងៃ ដូចមិនខ្វល់បិទបាំងរឿងនេះជាមួយអ្នកគ្រប់គ្នា ហើយក៏មិនខ្វល់ដែរថាភរិយាដែលនៅផ្ទះនឹងដឹងរឿងនេះ មានតែគិតថាបើដឹងកាន់តែល្អ ទោះលែងលះគ្នាក៏មិនអី ព្រោះពេលនេះគេរកបាននារីថ្មីហើយ។

ប៉ុន្តែក្រោយមកមិនយូរប៉ុន្មាន គេក៏ប្រែប្រួល។ នៅពេលប្រពន្ធរបស់គេដឹងថាគេក្បត់ចិត្ត នាងក៏មិនបានរករឿង ឡូឡាដាក់គេអ្វីទាំងអស់។ នាងគ្រាន់តែនិយាយជាមួយគាត់ថា "អរគុណដែលក្បត់ខ្ញុំ”។ សកម្មភាពរបស់នាង ធ្វើឲ្យគេចម្លែកចិត្តខ្លាំង។ គេបានត្រៀមខ្លួនយ៉ាងល្អដើម្បីនិយាយរឿងនេះជាមួយនាង ប៉ុន្តែដល់ពេលឮនាងនិយាយបែបមិនរករឿងអ្វីសោះបែបនេះ គេក៏មានអារម្មណ៍មិនច្បាស់ថា អ្នកដែលត្រូវបោះបង់គឺជាប្រពន្ធ ឬជាគេឲ្យប្រាកដ។

ក្រោយមកគេក៏បានយល់អត្ថន័យពាក្យ “អរគុណ” របស់ប្រពន្ធ។ ខណៈពេលដែលគេកំពុងនៅយ៉ាងមានក្ដីសុខជាមួយមនុស្សស្រីដទៃ ភរិយារបស់គេបានរៀបចំការផ្ទេរទ្រព្យសម្បត្តិក្នុងផ្ទះទាំងអស់ និងបានផ្ញើភស្តុតាងដែលបង្ហាញថាគេក្បត់ចិត្តនាងទៅឲ្យមេធាវីដើម្បីរៀបចំការប្ដឹងលែងលះជាមួយគេ។ មិនថាផ្ទះ ឡាន លុយ ឬកូន គឺគេនឹងមិនទទួលបានទាំងអស់។ បើសិនគេមិនព្រមស៊ីញ៉េលែងលះ ប្រពន្ធរបស់គេនឹងបញ្ជូនរឿងនេះទៅតុលាការ។

គេស្ទើរតែមិនជឿឡើយថា ប្រពន្ធរបស់គេអាចធ្វើបែបនេះចំពោះគេបាន ព្រោះនាងធ្លាប់ស្រលាញ់គេខ្លាំងណាស់។ នាងជាមេផ្ទះដែលមើលថែគេបានយ៉ាងល្អ ប៉ុន្តែហេតុអីពេលនេះនាងធ្វើបែបនេះដាក់គេ? នាងឆ្លើយតប៖

“ខ្ញុំបានរៀបការ និងមើលថែបងបានយ៉ាងល្អក្នុងរយៈពេលជាង ១០ឆ្នាំនេះ មិនថាបងធ្វើអ្វីក៏ខ្ញុំគាំទ្រយ៉ាងពេញទំហឹង។ នៅខណៈដែលអ្នកមិនមានអ្វី ខ្ញុំក៏នៅតែនៅក្បែរបងជានិច្ច។ នៅយប់ណាដែលរងាខ្លាំងខ្ញុំក៏ងើបឡើងដើម្បីយកភួយឲ្យបងដណ្ដប់។ នៅថ្ងៃដែលត្រជាក់ខ្លាំង ខ្ញុំក៏ធ្វើស៊ុបត្រជាក់ឲ្យបង។ នៅពេលឪពុកម្ដាយបងឈឺ មិនស្រួលខ្លួន ខ្ញុំក៏ទៅមើលថែពួកគាត់ដោយមិនដែលរអ៊ូថាហត់សូម្បីមួយម៉ាត់។ ខ្ញុំស្រលាញ់បង និងលះបង់ដើម្បីបងមករហូត ប៉ុន្តែទីបំផុតបងបែរជាទៅរកស្រីផ្សេង។ ខ្ញុំមិនត្រូវការមនុស្សប្រុសដែលគ្មានបេះដូងបែបនេះទេ បែកគ្នាវិញល្អជាង”។

នាងនិយាយទៀតថា នាងពិតជាត្រូវអរគុណគេ ដែលធ្វើឲ្យនាងមានឱកាសធ្វើជាភាគីដែលសុំលែងលះជាមួយគេយ៉ាងស្រណុកចិត្ត។ បន្ទាប់ពីនេះ នាងនឹងមិនបាច់ត្រូវអង្គុយចាំអ្នកណាត្រលប់មកផ្ទះ និងមិនបាច់ហត់នឿយជាមួយការងារផ្ទះអីទៀតទេ។

មានបុរសនិងនារីជាច្រើនតែងមិនច្បាស់លាស់ចំពោះអ្វីដែលពួកគេត្រូវការ រហូតត្រូវសម្រេចចិត្តខុស។ ដូចជាបុរសខាងលើនេះ ទីបំផុត គេក៏ត្រូវបាត់បង់គ្រួសារដែលមានក្ដីសុខទៅ រហូតលែងសល់អ្វី ដោយសារតែស្នេហាងប់ងុលមួយឆាវ។ ទីបំផុតគេក៏បានត្រឹមតែអង្គុយអស់សង្ឃឹម និងសោកសៅពីមួយថ្ងៃទៅមួយថ្ងៃ។ បើជ្រើសរើសស្រលាញ់អ្នកណាហើយ សូមធ្វើល្អចំពោះគេដោយចិត្តស្មោះ មានទំនួលខុសត្រូវចំពោះគេ និងមើលថែគេឲ្យបានល្អ បើទោះបីជួបអ្នកដែលល្អជាង ក្មេងជាង ឬស្អាតជាងក៏ដោយ បើអ្នកជាមនុស្សល្អ អ្នកត្រូវចេះឈប់ត្រឹមមនុស្សដែលអ្នកជ្រើសរើស។ កុំធ្វើឲ្យគេត្រូវខូចចិត្ត ព្រោះអ្នកនឹងត្រូវស្ដាយក្រោយនៅពេលក្រោយ។

ជីវិតដែលមានប្ដីមួយ ប្រពន្ធមួយ មិនប្រព្រឹត្តខុសសីល៥ កាមេសុមិច្ឆា អាចនឹងមិនសូវសប្បាយ មិនរំភើបស្រើបស្រាល ដូចពេលដំបូងៗ ប៉ុន្តែវានឹងអាចឲ្យអ្នកស្គាល់ឋានសួគ៌ពិតប្រាកដ ៕

ប្រភព៖ liekr ប្រែសម្រួល៖ ស្វាយ វ៉ាន់ថន