“មនុស្សស្រីកាឡកិណី" អត្ថបទសាងកម្លាំងចិត្ត ដែលគ្រប់គ្នាគួរអានដល់ចប់
- 2018-09-24 08:42:48
- ចំនួនមតិ 0 | ចំនួនចែករំលែក 0
“មនុស្សស្រីកាឡកិណី" អត្ថបទសាងកម្លាំងចិត្ត ដែលគ្រប់គ្នាគួរអានដល់ចប់
គាត់លុតជង្គង់ហុចផ្កាកុលាបឲ្យនាង
“រៀបការជាមួយបងណា៎លីន បងមិនអាចរស់ខ្វះអូនបានទេ”
នាងមានអារម្មណ៍រំភើប ហើយក៏ឆ្លើយយល់ព្រមជាមួយគេភ្លាម។
“ពុកអើយ ម៉ែអើយ កូនសម្រេចចិត្តត្រូវឬអត់?”
នាងងើយមុខសម្លឹងផ្ទៃមេឃ និយាយក្នុងចិត្តទៅកាន់វិញ្ញាណឪពុកម្ដាយ។
កាលនោះលីនមានអាយុត្រឹមតែ ២៣ឆ្នាំប៉ុណ្ណោះ ហើយមានសម្រស់ស្រស់ដាច់គេនៅក្នុងភូមិ។ ក្រោយរៀបការរួច នាងបានរើសមកនៅផ្ទះប្ដី ដែលមានតែម្ដាយប៉ុណ្ណោះនៅជាមួយ។ ឪពុកក្មេករបស់នាងបានស្លាប់យូរហើយដូចគ្នា។ ម្ដាយក្មេក មិនសូវជាចូលចិត្តនាងប៉ុន្មានឡើយព្រោះនាងជាកូនកំព្រា ដូច្នេះហើយគាត់ក៏តែងរិះគន់នាងជានិច្ច។
“ម៉ាក់ចិញ្ចឹមបងតាំងពីតូចដល់ធំ អូនធ្វើល្អជាមួយម្ដាយបងខ្លះទៅមិនបាន? គាត់ជាម៉ាក់របស់បងណា!” ប្ដីរបស់នាងឆ្លើយតបទៅនាង នៅពេលនាងនិយាយរឿងដែលម្ដាយគេរិះគន់នាងកាលពីក្បាលព្រលប់ប្រាប់។ នាងបានត្រឹមតែឱនមុខទទួលយកទាំងអន់ចិត្ត។
ប្ដីរបស់លីនធ្វើការនៅទីរួមខេត្ត និងចូលចិត្តចូលបនល្បែងញឹកញាប់ ទម្រាំត្រលប់មកដល់ផ្ទះក៏កណ្ដាលយប់សឹងរាល់ថ្ងៃ។ នាងធ្វើការងារផ្ទះច្រើន តាមដែលម្ដាយក្មេកប្រើគ្រប់យ៉ាង ដោយគ្មានហ៊ានតមាត់មួយម៉ាត់ រាងកាយហត់នឿយស្ទើរដាច់ខ្យល់ ផ្ទៃមុខក្មេងស្រីដែលស្រស់ស្អាតពីមុន ក៏ប្រែជាជ្រុងស្លេកស្លាំង។ នៅថ្ងៃឈប់សម្រាក ឬ ថ្ងៃណាដែលប្ដីរបស់នាងបាននៅផ្ទះ នាងក៏សុំឲ្យគេជួយសម្រាលបន្ទុកការងាររបស់នាងខ្លះ ប៉ុន្តែបែរជាត្រូវម្ដាយក្មេកស្ដីឲ្យថា៖
“កូនប្រុសយើងហត់ជាមួយការងារវាស្រាប់ហើយ ថ្ងៃសម្រាក គួរឲ្យគេសម្រាកខ្លះ មិនមែនឲ្យគេមកធ្វើការងារផ្ទះជំនួសឯងទេ! នេះឯងជាប្រពន្ធស្អីហ្នឹងបានប្រើប្ដី!”
ក្រោយរស់នៅជាមួយគ្នាជិតមួយឆ្នាំ នាងក៏មានផ្ទៃពោះ។ ម្ដាយក្មេកឃើញពោះរបស់នាងស្រួច ក៏ដើរទៅនិយាយប្រាប់គេឯងថាខ្លួននឹងបានចៅប្រុស។ ប្ដីរបស់នាងនៅតែធ្វើខ្លួនដូចពីមុន គឺចេញទៅធ្វើការតាំងពីព្រឹក ចូលផ្ទះវិញក៏យប់អាធ្រាត្រ។ ពេលគេចូលក្នុងបន្ទប់ ក៏តម្រង់មកអង្អែលពោះរបស់នាងហើយនិយាយ “ធ្វើជាក្មេងល្អណាកូន!” រួចហើយក៏ដាក់ខ្លួនគេងភ្លាម។
នាងចាញ់កូនខ្លាំង ធ្វើឲ្យគេងមិនលក់ ហូបមិនបានជិតកន្លះឆ្នាំ។ លើផ្ទៃមុខនាងពេលនេះមើលទៅស្លេកស្ទើរតែគ្មានឈាម គ្មានសល់ស្លាកស្នាមជាក្មេងស្រីស្រស់ស្អាតដូចកាលមុនសូម្បីបន្តិចឡើយ។ នៅថ្ងៃសម្រាល គ្រូពេទ្យក៏ប្រាប់ថា នាងបានកូនស្រី។ នាងញញឹមទាំងទឹកភ្នែក “កូនម៉ែគួរឲ្យស្អប់អីយ៉ាងនេះ!"
“ស្អីគេ? កូនស្រី? ទៅមិនរួចទេ! ផ្ទះខ្ញុំបីជំនាន់ហើយមានតែកូនប្រុសទេ។ កូនប្រសាខ្ញុំពោះស្រួចយ៉ាងនេះ កើតមកជាកូនស្រីយ៉ាងម៉េចកើត ខ្ញុំមិនជឿទេ!”
សំឡេងរបស់ម្ដាយក្មេងលាន់ឡើង បន្ទាប់ពីគ្រូពេទ្យប្រាប់ថា គាត់បានចៅស្រី។ គាត់ដើរចេញភ្លាម ដោយមិនអាចទទួលស្គាល់ ហើយក៏ទទួលយកមិនបានដែរ ដែលនាងបង្កើតបានកូនស្រី។
“ហើយពពោះកូនយ៉ាងម៉េចហ្នឹង! ហេតុអីមិនមែនកូនប្រុស?” ប្ដីរបស់នាងមកក៏ជះកំហឹងដាក់ម្ដងទៀត។ នាងបីកូនស្រីផ្អោបជាប់នឹងទ្រូង ទាំងទឹកភ្នែកហូរមិនឈប់។ គ្រូពេទ្យ និងគិលានុបដ្ឋាកសំឡឹងមកនាងដោយខ្សែភ្នែកអាណិតអាសូរ។
រយៈក្រោយមក ប្ដីរបស់នាងលេងល្បែងកាន់តែខ្លាំង មួយយប់ៗអស់លុយចូលរាប់សែន រហូតដល់ថ្នាក់ទៅចងការលុយគេយកមកលេង។ នាងឃើញសភាពការណ៍មិនសូវស្រួល ល្ងាចមួយក៏ដាច់ចិត្តនិយាយជាមួយប្ដី៖
“បងអ្ហើយឈប់ទៅ កុំលេងទៀតអី!”
ផាច់!! សំឡេងបាតដៃទង្គិចផែនថ្ពាល់របស់នាងរហូតធ្វើឲ្យនាងដួលពោបទៅនឹងឥដ្ឋ ហើយប្ដីនាងក៏ដើរចេញពីផ្ទះបាត់ទៅ។ ម្ដាយក្មេកចូលមកក៏ស្ដីឲ្យនាងបន្តថា៖
“ប្ដីតែមួយអ្ហែងទប់មិនជាប់ កើតកូនម៉ោស្រីទៀត ថ្ងៃក្រោយត្រៀមវេចខោអាវចេញពីផ្ទះអញម៉ងទៅ”។
ពីរថ្ងៃហើយដែលប្ដីនាងមិនត្រលប់មកផ្ទះ។ នៅយប់ថ្ងៃនោះ ប្ដីនាងត្រូវមនុស្សប្រុសពីរនាក់អូសកមកផ្ទះ។
“ប្ដីនាងឯងចាញ់ល្បែង ថែមទាំងខ្ចីលុយយើងរាប់លាន បើមិនរកមកសងក្នុងរយៈពេលមួយអាទិត្យ កុំថាពួកយើងចិត្តអាក្រក់ឲ្យសោះ!”
និយាយចប់ បុរសទាំងពីរនាក់ក៏ប្រមូលរបស់របរមានតម្លៃក្នុងផ្ទះយកទៅចេញទៅ។
“នាងឯងនេះកាឡកិណីមែនៗ តាំងពីរៀបការមក យើងធ្វើការរកលុយមិនដែលឡើងសោះ លេងក៏មិនដែលឈ្នះដូចមុន ហើយមានកូនស្រីទៀត ម៉ោណេះ!”
គេអូសដៃនាងទៅវាយស្ដីជេរ ចំណែកម្ដាយក្មេកបានត្រឹមតែស្រែកយំអាណិតវាសនាកូនប្រុសដោយមិនព្រមមកជួយការពារនាងបន្តិចឡើយ។
“ចេញទៅ ចេញពីផ្ទះអញទៅ ទៅទាំងម៉ែទៅទាំងកូនទៅ មីមេស៊យ!”
នាងសំឡឹងមើលមុខប្ដីសឹងមិនជឿអ្វីដែលខ្លួនបានឮ។ នាងទ្រាំលែងបានទៀតហើយ។ នាងចូលបន្ទប់ប្រមូលខោអាវ និងរបស់របរចាំបាច់ ហើយក៏បីកូនចេញពីផ្ទះនោះទៅ ដោយគ្មានស្រក់ទឹកភ្នែកមួយតំណក់។ នាងដើរកាត់ផ្លូវងងឹតស្លុបទៅកាន់ផ្ទះម្ដាយមីងដែលនៅមិនឆ្ងាយពីនោះប៉ុន្មាន។ មនុស្សស្រីអាយុទើបតែ ២៥ឆ្នាំបានធ្លាក់ខ្លួនជាស្រីមេម៉ាយ និយាយថានាងបែកពីប្ដីក៏មិនត្រូវ តែនិយាយឲ្យចំគឺនាងត្រូវប្ដីបណ្ដេញក្បាលចេញតែម្ដង។
នៅព្រឹកបន្ទាប់ អ្នកស្រុកអ្នកភូមិក៏នាំគ្នានិយាយខ្សឹបខ្សៀវរឿងរបស់នាង។ អ្នកភូមិមួយក្រុមនឹកអាណិតវាសនារបស់នាង ឯមួយក្រុមទៀតក៏និយាយថាសមមុខហើយ ព្រោះនាងមិនបានបង្កើតកូនប្រុសឲ្យគេ ធ្វើឲ្យគ្រួសារគេត្រូវចុះអ័ព្ទ។ នាងដឹងថាដំណឹងនេះល្បីខ្ចរខ្ចាយមកពីណា ប៉ុន្តែនាងក៏លែងខ្វល់ ព្រោះគិតថាបានចេញពីផ្ទះនោះរួច ក៏ចាត់ទុកថានាងនៅមានសំណាងហើយ។ ត្រូវធ្វើយ៉ាងណាបន្ត? កូនរបស់នាងនឹងមានអីហូប? ក្នុងខួរក្បាលនាងឥលូវគិតតែពីរសំណួរនេះទេ។
ព្រឹកថ្ងៃមួយ នាងដើរចូលទៅសុំធ្វើការក្នុងហាងលក់ទឹកសណ្ដែករបស់អ៊ំស្រីម្នាក់។ នាងប្រាប់អ៊ំស្រីម្ចាស់ហាងថា នាងទើបតែបែកពីប្ដី ហើយមានកូនតូចជាប់ខ្លួនផង។
“បើអ៊ំស្រីអាណិតទទួលខ្ញុំឲ្យចូលធ្វើការ ខ្ញុំសុំយកកូនមកមើលនៅហ្នឹងផងបានទេអ៊ំ?"
“ខ្ញុំបានឮរឿងឯងខ្លះដែរ ការពិតខ្ញុំធ្វើតែពីរនាក់ម៉ែកូនក៏បានដែរ ប៉ុន្តែមិនអីទេ យើងស្រីដូចគ្នា មានឯងនៅពីរនាក់ទៀត ផ្ទះវាមិនស្ងាត់”។
នាងឱនក្បាលសំពះអរគុណអ៊ំស្រីម្ចាស់ហាងដោយរំភើបបំផុត។
នាងបានជួយធ្វើការគ្រប់យ៉ាងក្នុងផ្ទះយ៉ាងឧស្សាហ៍ព្យាយាម ហើយដោយសារនាងចេះធ្វើនំឆាខ្វៃត្រូវមាត់ម៉ូយ ធ្វើឲ្យហាងនាងត្រូវបានគេល្បីពីមាត់មួយទៅមាត់មួយ ហើយមុខរបរនៅផ្ទះនោះក៏កាន់តែរីកចម្រើនឡើងពីមួយថ្ងៃទៅមួយថ្ងៃ។
កូនប្រុសរបស់អ៊ំស្រីគឺជាមនុស្សមិនចេះមាត់ក ប៉ុន្តែបែរជាមាននិស្ស័យជាមួយនាងជាខ្លាំង។ ចំណែកអ៊ំស្រីក៏ពេញចិត្តពេញថ្លើមនាងខ្លាំងដូចគ្នា។ គាត់គិតក្នុងចិត្ត៖
“នេះឬស្រីកាឡកិណីដែលគេនិយាយគ្រប់គ្នានោះ? តាំងពីមាននាងចូលមកក្នុងផ្ទះ មុខរបររកស៊ីក៏ឡើងទៅៗ ចំណែកកូនប្រុសយើងក៏មើលទៅហាក់ស្រស់ស្រាយជាងមុនដែរ មើលទៅខ្ញុំត្រូវធ្វើអីម្យ៉ាងហើយ!” ព្រឹកថ្ងៃមួយ បន្ទាប់ពីលក់ទឹកសណ្ដែកអស់ហើយ កូនប្រុសរបស់អ៊ំស្រី ក៏បានយកទឹកសណ្ដែកមួយកែវមកហើយលុតជង្គង់ចុះមុខនាង។
“រៀបការជាមួយខ្ញុំទៅណា ខ្ញុំមិនសូវឆ្លាតរហ័សរហួន ខ្ញុំមិនសូវមានលុយដូចអ្នកដទៃ ប៉ុន្តែខ្ញុំស្បថបានថា ស្នេហារបស់ខ្ញុំដែលមានចំពោះលីន និងកូនគឺមិនឲ្យតិចជាងអ្នកណាទេ”។ នាងសំឡឹងមុខកំលោះស្ងប់ស្ងាត់ដែលពេលនេះកំពុងលុតជង្គង់ហុចទឹកសណ្ដែកមួយកែវឲ្យនាង ហើយក៏ងាកទៅមើលមុខម្ដាយរបស់គេ ដែលឈរនៅមិនឆ្ងាយ។ អ៊ំស្រីងក់ក្បាល ហើយក៏ឲ្យសញ្ញាឲ្យនាងយល់ព្រម។ នាងទទួលយកកែវទឹកសណ្ដែកទាំងទឹកភ្នែក។ កំលោះម្នាក់នេះ និងអ៊ំស្រីម្នាក់នេះហើយដែលធ្វើឲ្យនាងមានអារម្មណ៍មោទនភាពនឹងខ្លួនឯង និងយល់ថាខ្លួនឯងមានតម្លៃតាំងពីចូលមកស្នាក់អាស្រ័យ។
“ចាសយល់ព្រម ខ្ញុំសូមផ្ញើជីវិតខ្ញុំនិងជីវិតកូនស្រីជាមួយបងហើយ”។
សំឡេងទះដៃរបស់ម្ចាស់ផ្ទះវ័យស្ទើរជរារំពងឡើង ខណៈកូនកំលោះឡើងឱបនារីក្នុងរង្វង់ដៃ។ នាងងើយមុខនិយាយទៅកាន់មេឃម្ដងទៀត៖
“ពុក ម៉ែ កូនសូមបួងសួងឲ្យការសម្រេចចិត្តម្ដងនេះ គឺជាការសម្រេចចិត្តត្រឹមត្រូវចុះ”។
ការរៀបការលើកទីមួយរបស់នាង អ្វីដែលធ្វើឲ្យនាងមានអារម្មណ៍រំភើបគឺបាច់ផ្កាកុលាបដ៏ធំ ព្រមជាមួយពាក្យសម្ដីផ្អែមដល់បេះដូងដែលធ្វើឲ្យនាងញញឹមពេញមួយថ្ងៃ។ ប៉ុន្តែការរៀបការលើកនេះ គ្មានទៀតទេបាច់ផ្កាកុលាប គ្មានទេពាក្យផ្អែមល្ហែម គ្មានទេភាពរ៉ូមែនទិក គឺមានត្រឹមតែទឹកសណ្ដែកធម្មតាៗមួយកែវ ជាមួយបុរសស្ងប់ស្ងាត់ស្លូតបូតម្នាក់ និងពាក្យសន្យារបស់គេចំពោះនាងថា “ខ្ញុំនឹងមិនធ្វើឲ្យលីននិងកូនអត់ឃ្លានដាច់ខាត”។ អ្វីទាំងនេះហើយដែលធ្វើឲ្យនាងរំជួលចិត្តខ្លាំង។
ក្រោយរៀបការនឹងគ្នាមក នាងនិងប្ដីកាន់តែឧស្សាហ៍ប្រឹងប្រែងក្នុងការរកស៊ី។ នាងបានសុំអង្វរឲ្យអ៊ំស្រីម្ចាស់ហាងដែលពេលនេះក្លាយជាម្ដាយក្មេករបស់នាង ឲ្យគាត់សម្រាកឲ្យបានច្រើន។ ម្ដាយក្មេកក៏មិនបដិសេធទឹកចិត្តកូនប្រសា ទើបសុំមកជួយមើលថែចៅស្រីជំនួសវិញ។ អ៊ំស្រីមិនដែលគិតស្អប់ខ្ពើមកូនដើមរបស់កូនប្រសាឡើយ ប៉ុន្តែថែមទាំងស្រលាញ់នាងជាពិសេសថែមទៀត។ ប្ដីរបស់នាងពូកែធ្វើការ ចំណែកនាងពូកែទុកដាក់ និងចាត់ចែងការងារផ្ទះ។ គ្រប់ភ្ញៀវចេញចូលតែងឮសំឡេងសើចក្អាកក្អាយពីផ្ទះនេះជានិច្ចកាល។
ពីហាងលក់សណ្ដែកតូចតាច ពេលនេះពួកគេបានពង្រីកមុខជំនួញច្រើនសាខានិងមានបុគ្គលិកជាច្រើននាក់។ មិនដល់បីឆ្នាំបន្ទាប់ ពួកគេក៏បានបើករោងចក្រផលិតទឹកសណ្ដែកខ្នាតតូច ចំណែកនាងក៏បានផ្ដល់កំណើតឲ្យកូនប្រុសម្នាក់ទៀត។
ល្ងាចថ្ងៃមួយ អតីតម្ដាយក្មេករបស់នាងក៏បានជួបនឹងម្ដាយក្មេករបស់នាងបច្ចុប្បន្នដោយចៃដន្យនៅសួនសាធារណៈ។
“កូនប្រុសចែឯងសំណាងដល់ហើយហ្ន ធ្វើការក៏ពូកែ រកស៊ីធំដុំណាស់ឥលូវ ខ្ញុំសប្បាយចិត្តជំនួស” អតីតម្ដាយក្មេកនិយាយមុន។
“មិនមែនដោយសារកូនប្រុសខ្ញុំទេ តែកូនប្រសាខ្ញុំទៅវិញទេបានពូកែ តាំងពីពួកគេការជាមួយគ្នាមក នាងក៏ជួយធ្វើការងារនានាជំនួសខ្ញុំ និងកូនប្រុសបានគ្រប់យ៉ាង។ កូនប្រុសខ្ញុំបានតែឧស្សាហ៍មួយមុខគត់ បានមុខរបររីកចម្រើនដូចរាល់ថ្ងៃ បានកូនប្រសាហ្នឹងហើយអ្នកគំនិត ពូកែទុកដាក់”។ “ស្អីគេ កូនប្រុសចែឯងអ្នកខំរក ហើយយកលុយមកឲ្យកូនប្រសាអ្នកទុកដាក់? ចែឯងសុខចិត្តឲ្យកូនប្រុសលំបាកអីចឹង?” អតីតម្ដាយក្មេកលាន់មាត់ដោយស្ទើរមិនជឿអ្វីដែលគាត់បានឮ។
“ខ្ញុំចិញ្ចឹមកូនមកតាំងពីតូច ដល់ថ្ងៃមួយមានមនុស្សមកមើលថែវាជួសខ្ញុំ ខ្ញុំមិនសប្បាយចិត្ត? ម្យ៉ាងទៀត កូនប្រុសធ្វើការធ្ងន់តិចវាមិនអីទេ វាជាមេគ្រួសារ បើអត់ធ្មត់ការងារធ្ងន់មិនបាន ឲ្យគ្រប់គ្រងកូនចៅយ៉ាងម៉េច។ ម្យ៉ាងកូនប្រសាខ្ញុំ ជាមនុស្សល្អ ពូកែការងារផ្ទះទៀត អីចឹងបានជាខ្ញុំពេញចិត្តពេញមុខពេញមាត់នឹងវាហ្នឹងណា៎”។ អតីតម្ដាយក្មេកចំហមាត់ធ្លុងមិនដឹងថានិយាយអ្វីល្អ ទើបងាកទៅប្រឡែងជាមួយកូនតូចក្នុងរទេះរុញវិញ។
“ចៅប្រុសចែឯងគួរឲ្យស្រលាញ់ដល់ហើយ កាលនៅជាមួយខ្ញុំ វាទៅជាបង្កើតបានកូនស្រី ធ្វើឲ្យគ្រួសារខ្ញុំជួបរឿងស៊យឡើងយូរឆ្នាំ”។
“ប៉ុន្តែចៅស្រីខ្ញុំនោះជាក្មេងល្អនិងគួរឲ្យស្រលាញ់ណាស់តើ ដោយសារបានចៅស្រីជាក្មេងល្អ ទើបផ្ទះពួកយើងពេលនេះមានចៅប្រុសម្នាក់ទៀត បើមិនបានចៅស្រីម្នាក់ហ្នឹងទេ ខ្ញុំក៏មិនបានចៅប្រុសដែរ”។
បានឮអតីតម្ដាយក្មេករបស់កូនប្រសាបន្ទោសចៅស្រីសំណព្វចិត្តរបស់ខ្លួនថាធ្វើឲ្យគ្រួសារគេធ្លាក់ខ្លួន ធ្វើឲ្យម្ដាយក្មេកថ្មីមិនពេញចិត្តជាខ្លាំង ទើបលេងទៅវិញយ៉ាងចាស់ដៃតែម្ដង។
“ម៉ែ! ល្មមទៅផ្ទះវិញហើយ”
សំឡេងកូនប្រុស និងកូនប្រសាស្រែកហៅព្រមគ្នា។
នៅពេលអតីតម្ដាយក្មេកងាកទៅមើល ក៏ឃើញប្ដីប្រពន្ធមួយគូកំពុងដឹកដៃកូនស្រីដើរចូលមក។ ផ្ទៃមុខនារីស្អាតម៉ដ្ឋខៃបានត្រលប់មកជាស្រស់ថ្លាសមវ័យម្ដងទៀត។
“តាំងពីរៀបការចូលផ្ទះអ្នកមាន អ្ហែងមើលទៅស្អាតជាងកាលជាងនៅផ្ទះយើងច្រើនណាស់ហ្ន” អតីតម្ដាយក្មេកលាន់មាត់ ពេលអ្នកទាំងបីដើរមកដល់ហើយជម្រាបសួរ។ “ខ្ញុំប្រាប់យកតែបុណ្យទេណា៎ សំណាបវាយោងដី ស្រីយោងប្រុស សំណាបល្អយ៉ាងណា តែបើយកទៅស្ទូងក្នុងដីខ្សាច់ខ្សោះនោះ វាគង់តែរលួយ។ មនុស្សស្រីដែលរៀបការជាមួយមនុស្សប្រុសអាក្រក់ ក៏មិនខុសពីធ្លាក់នរកទាំងរស់ដែរ។ កុំគិតតែបន្ទោសកូនប្រសាថាចង្រៃ គ្មានហុងស៊ុយ ក្នុងផ្ទះដែលមានមនុស្សអាក្រក់ ពូកែបំផ្លាញហើយ ទោះលុយធ្លាក់ពីលើមេឃច្រើនយ៉ាងម៉េច វាក៏វាមិនសល់ដែរ”។
និយាយចប់ គាត់ងាកទៅពចៅស្រី ហើយក៏ប្រាប់ឲ្យកូនប្រុសរុញរទេះចៅប្រុសមកតាមក្រោយ។
“ទៅផ្ទះវិញទៅកូន ភ្លៀងឥលូវហើយ” គាត់លើកដៃទះស្មាកូនប្រសា ហើយក៏នាំគ្នាដើរឡើងឡានត្រលប់ទៅផ្ទះវិញ ទុកឲ្យអតីតម្ដាយក្មេកនៅទាំងខឹង និងអាម៉ាស់មុខតែម្នាក់ឯង។
មនុស្សប្រុសគឺអ្នករក មនុស្សស្រីគឺអ្នកទុកដាក់
មនុស្សប្រុសធ្វើការរកប្រាក់ចូលផ្ទះ មនុស្សស្រីមើលថែផ្ទះ មើលថែទ្រព្យសម្បត្តិ មិនចាយវាយខ្ជះខ្ជាយ។
មនុស្សប្រុសជាដី មនុស្សស្រីគឺផ្កា
មនុស្សស្រីត្រូវការការមើលថែពីមនុស្សប្រុស មនុស្សប្រុសត្រូវការមោទនភាពក្នុងខ្លួនរបស់មនុស្សស្រី។ មនុស្សប្រុសអាក្រក់ៗក៏មិនខុសអ្វីពីដីខ្សាច់ ខ្យល់ផាត់បន្តិចក៏ប៉ើងអស់ ពេលនោះពាក្យសម្ដីផ្អែមពីរោះ ក៏គ្មានន័យទៀតដែរ។ ទោះបីជាពូជផ្កាស្រស់ស្អាតយ៉ាងណា ប៉ុន្តែបើដាំលើដីបែបនោះវានឹងត្រូវក្រៀមរលួយស្លាប់ជៀសមិនផុត។
មនុស្សល្អៗក៏ប្រៀបដូចនឹងដីខ្មៅដ៏មានជីវជាតិ មើលទៅហាក់ដូចគ្មានតម្លៃ ប៉ុន្តែធ្វើអ្វីក៏ច្បាស់លាស់ ស្មោះត្រង់។ គេអាចមិនសូវនិយាយថា “បងស្រលាញ់អូន” ប៉ុន្តែគេមានទំនួលខុសត្រូវចំពោះគ្រួសារ។ ទោះបីជាពូជផ្កាដែលមិនពេញលក្ខណៈ ប៉ុន្តែបើដាំនៅដីល្អ វានឹងអាចចេញផ្ការីកស្គុសស្គាយឲ្យអ្នកផងបានគយគន់។
កុំរុញភាពមិនចម្រុងចម្រើននៃគ្រួសារថាជាកំហុសមនុស្សស្រីតែម្ខាងអី។ មនុស្សប្រុសដែលមិនស្រលាញ់ប្រពន្ធនោះហើយគឺជាប្រុសមិនបានការ ដូច្នេះកុំអាងតែបន្ទោសប្រពន្ធថាជាមេស៊យទៀតអី ៕