បង្ហាញមុខស្ត្រីខ្មែរ៣រូបទទួលបានពានរង្វាន់អាជីវកម្មផ្សេងគ្នា ក្នុងចំណោមពានទាំង៧

2018-09-02 03:45:34
ចំនួនមតិ 0 | ចំនួនចែករំលែក 0

គម្រោង "ផ្លូវទៅស្រុកវគ្គ២" (RoadHome2) ដែលផ្ដោតលើប្រធានបទសហគ្រិនភាព និងមានឈ្មោះថា "របរគេរបរយើង" បានបញ្ចប់ទៅជាស្ថាពរ ដោយរកឃើញសហគ្រិនឆ្នើម និងមុខរបរលេចធ្លោទាំង៧ ក្នុងចំណោម៥០ នៅទូទាំងប្រទេសកម្ពុជា។

ក្រោយដំណើរការអស់រយៈពេលជាង ៥ ខែ គម្រោង "ផ្លូវទៅស្រុកវគ្គ២" (RoadHome2) បានរកឃើញសហគ្រិនកម្ពុជា ដែលពុះពារបង្កើត ពង្រឹងមុខរបរក្នុងស្រុកដោយខ្លួនឯង និងសក្ដិសមក្នុងការទទួលពានរង្វាន់ទាំង៧ ដែលក្នុងនោះមានពានរង្វាន់ចំនួន៣ ដែលគ្រប់គ្រងដោយសហគ្រិនជាស្ត្រីខ្មែរដូចជា៖

Unique Entrepreneur Award: ពានរង្វាន់សម្រាប់សហគ្រិន ដែលប្រកបអាជីវកម្មប្រភេទកម្រមាន ឬឃើញនៅប្រទេសកម្ពុជា បានទៅលើ អ្នកស្រី សូ សម្បត្តិ ម្ចាស់សិប្បកម្មកំប្លោក ភ្នំក្រោម ខេត្តសៀមរាប ដែលជាសិប្បកម្មផលិតកាបូបស្ត្រី និងគ្រឿងប្រើប្រាស់ធ្វើពីកំប្លោក។

អ្នកស្រីបានបែកគំនិតចាប់ផ្តើមផលិតកាបូបលក់ដោយខ្លួនឯងនៅឆ្នាំ ២០១០។ សិប្បកម្មកំប្លោកភ្នំក្រោមរបស់អ្នកស្រីអាចផលិតផលិតផលពីកំប្លោកបានពី១០ ទៅ ១៥ ក្នុងមួយថ្ងៃ។ ផលិតផលកំប្លោករបស់អ្នកស្រីផងដែរក៏ត្រូវបានបញ្ជាទិញទៅកាន់ប្រទេសជាច្រើនទូទាំងពិភពលោក មានទាំងសហរដ្ឋអាមេរិក ជប៉ុន កូរ៉េ ម៉ាឡេស៊ី និងបារាំង។

Women Entrepreneur Award: ពានរង្វាន់សម្រាប់សហគ្រិនស្ត្រីឆ្នើម បានទៅលើអ្នកស្រី លឹម លីម៉ា ម្ចាស់ក្រុមហ៊ុន LM Lima Angkor Food ខេត្តសៀមរាប ដែលផលិតនំ Cookies ស្រាដំណាប់ផ្លែឈើ និងសូកូឡា។ ៩០% នៃវត្ថុធាតុដើមដែលប្រើសម្រាប់ផលិតគឺជាធនធានក្នុងស្រុក។

លោកស្រី លីម៉ា និងស្វាមីបានចាប់ដៃគ្នាកសាងក្រុមហ៊ុននេះឡើងនៅចុងឆ្នាំ២០០៨។ ផលិតផលរបស់ LM LimaAngkor Food មានដាក់លក់នៅលើទីផ្សារទំនើបនានាក្នុងប្រទេស និងមាននាំចេញទៅលក់នៅក្រៅប្រទេសផងដែរ។

Handicraft Entrepreneur Award: ពានរង្វាន់សម្រាប់សិប្បករឆ្នើម បានទៅលើ អ្នកស្រី ដាំ មុំ ដែលជាម្ចាស់សិប្បកម្មតម្បាញសូត្រ ខេត្តបន្ទាយមានជ័យ ដោយមានផលិតផលិតផលធ្វើពីអំបោះ និងសូត្រ ដូចជា ភួយដណ្តប់ ក្រមាបង់ក កន្សែង និងក្រណាត់សូត្រជាដើម។

អ្នកស្រីចាប់ផ្តើមចងក្រងក្រុមស្ត្រីតម្បាញ និងបង្កើតជាសិប្បកម្មតម្បាញសូត្រនេះក្នុងឆ្នាំ២០០៨ ដោយសារតែអ្នកស្រីចេះត្បាញតពីដូនតាមកយូរ ហើយម្យ៉ាងទៀតអ្នកស្រីស្រលាញ់របរនេះតាំងពីតូចមកម្ល៉េះ។ ជាមធ្យមក្នុងមួយថ្ងៃ អ្នកស្រីអាចត្បាញបានក្រមាសូត្រមួយតែប៉ុណ្ណោះ។ ផលិតផលទាំងនេះ មានលក់នៅស្ទើរគ្រប់ខេត្តក្នុងប្រទេសកម្ពុជា ប៉ុន្តែទីផ្សារដែលធំជាងគេ គឺខេត្តសៀមរាប និងរាជធានីភ្នំពេញ។

ដោយឡែកពានរង្វាន់៤ផ្សេងទៀតមានដូចជា៖

ពានរង្វាន់សហគ្រិនផ្ដល់សេវាកម្មល្អ (Service Entrepreneur Award) បានទៅលើ លោក ឈម ប៊ុនហេន អ្នកបើកទូកដឹកភ្ញៀវទេសចរ ខេត្តស្ទឹងត្រែង
ពានរង្វាន់សម្រាប់សហគ្រិនដែលមានអាជីវកម្មមានទំនួលខុសត្រូវផ្នែកបរិស្ថាន (Sustainability Entrepreneur Award) បានទៅលើ លោក គឹម ចាន់ ម្ចាស់សិប្បកម្មឆ្នាំងចាក់ កំពង់ចាម
ពានរង្វាន់សហគ្រិនប្រកបដោយការច្នៃប្រឌិត (Creative Entrepreneur Award) បានទៅលើលោក ថៃ វ៉ាន់ថា ម្ចាស់ហាងថតរូប @homePhotography ភ្នំពេញ
ពានរង្វាន់សម្រាប់សហគ្រិនដែលជួយអភិរក្សវប្បធម៌ (Cultural Preservation Entrepreneur Award) បានទៅលើ លោក ចាន់ សេងគង់ ម្ចាស់សិប្បកម្មឥដ្ឋការ៉ូខ្មែរ សៀមរាប៕

ចុចអាន៖

អត្ថបទ៖ សរ សុគន្ធី